Read Phom Naga ISAIAH 5 Bible Online

ISAIAH 5 - Phom Naga bible

ISAIAH 5

¹Ngei bampüba kü kesho hük lokshuohshah; ngelei maibong büpalei nyalingngupai kah kü shih-ei lokshah: Ngelei mongkhen küphülei nyalingngupai kah hük kahcheü kohpü kahshong hükei nyuteke.

²Büpai kahdok shotü yaongphaang peü yaktüktü peü mü meipü nyalingngupai sheiphong. Büpai hapa jiam kü shangdü hük dak, hatü nyalingngupai jiü bhithen shingao ling. Büpai halei nyalingngupai jükjahen shei ongyang, shejao phaü ngupai jükteke.

³Shaang Jerusalem hatü Judahlei nyupü shennyakthüi ngei hatü nyalingngupai kah nyi aa kü shahphennyüke.

⁴Ngei ngelei nyalingngupai kah kü dükpü mü lenei ngei mehe nyeinya dükhenang? Ngei nyalingngupai meipü jükkahen shei ongyangjü, mehekei hapa kü thiokpü phaü ngupai jükpa?

⁵Ngelei nyalingngupai kah kü ngei mehe dükhen ha ngei nüng kü ephüshah: Hapa kü showpü hühpe ngei bentükhen, hatü hapa mangtükhen; Ngei hapa kü showpü bham laamtükhen, hatü hapa kü la-i shuoptükhen.

⁶Ngei hapa shingü lavüngtoiyei yakphonghen, üpaiyao phenha nedakhen nevaijü kah nelinghen, Shejao hapa shingkü hühhihang mon kohhühen; hapa shing kü vang nekeihen ngei phum kü ngeükhüam shuohhen.

⁷Jeiyong SHEMBÜPAlei nyalingngupai kah-ü Israel phang, hatü Judah phangü büpalei mongongpü pemong. Büpai shahhing eehen shei veiteke, shejao iy-aongmashateipü eeteke; Daülangshemshepü veiteke, shejao hanghi homei vaüpü danteke.

⁸Mih nyushing neshiüi kahdok kü laophü mon nyuhen shingvaishi shem kü shem khaaiyei vepüthü, kah kü kah dheanei shakpüthü onyükei!

⁹Jeiyong SHEMBÜPAi ngei danshi vangei eteke: “Hingmei shem longpüthü longi lavüngtoiyei tuhhen; nethe meipü longpü shemthü kü nyuhen shennyak neshiüi leidaihen.”

¹⁰Nyalingngupai kahmoi an kü nyalingngupai jiü dok shet mon bhithen, hatü shelivang dok kho hük mü büali sheijü, hapa kü dok anpüshet mon vethen.

¹¹Yiü yinghen deihshi shin lomi lomi paopüthü, hatü yiüi chokei shinshi pheiteipüthü onyükei!

¹²Jomei mohitap kü harp hatü lyre vüngei, tambourin hatü liping vüngei nyunyüke, shejao jomi SHEMBÜPAlei douthü kü ieyeilemei neshiü nevaijü büpalei lakdouthü kü dhüm shuohpü neshiü.

¹³Danaokpü taopü nangkü ngelei nanglakthü wüpküpei daihen; aeipai hamhimanthü dikemhen, hatü nanglak khongnyü yung lepai dikemhen.

¹⁴Hanangkü mahngchongü hahju meipükei nyüke, hatü hapalei ju longi kanyüke; Halei Jerusalem leipü hamhimanthü, hatü nanglak khongnyü ngeümoh ngeüshepüthü peü shükemhen.

¹⁵Longpü hatü maanpü peü maanpü leihühen, hatü changmeipüthülei mükveinavei nyokei leitükhen.

¹⁶Shejao Jeiyong SHEMBÜPAi büpalei shahhing homei longei anshihhen, hatü daülangpü Kahvangi büpalei daülangshemshepai laophü nyingi daülangi huhen.

¹⁷Hahepak kü mopnyümopha laaipü shingei mi chehathüi phenha meekhahhen, hatü yumthüi phenni hah-ei longteihen.

¹⁸Shahshem vüthü mü mang vü shüpüthü, koyei kü shenpü vü mü mang shüpüthü;

¹⁹Jeni eehen shingvaishi SHEMBÜPAi dükhen shei epü douthü shülangi nyingshah shei epüthü onyükei!

²⁰Ten kü mei shei epüthü, hatü mei kü ten shei epüthü; Vangngai nangjei vangnyak, vangnyak nangjei vangngai leitükpüthü; Vüngnyang nangjei shahyak, shahyak nangjei vüngnyangpü shihpüthü onyükei!

²¹Laophü nyingi nahnyüpeih, hatü kon kohnyüpeih shei deihpüthü onyükei!

²²Yiü yingpü kü bapeühapeü shei, hatü yiü vukpü kü küphü hien aokpüba shei deihpüthü onyükei!

²³Yawhdou nangkü mang kü mang shei nedeihpü, shejao mang neshiüpüthü kü jiüpü nedükpüthü!

²⁴Hanangkü yei kübü vampü awlomi hahtang hahtükpükei, hatü awlom touei thüngvan hemdaipükei jomei tünglang shedaihen, hatü jomei chübong bhihla keiha piyei lüdaihen. Mehenangkü jomi Jeiyong SHEMBÜPAlei shahkungnyüthü yakphong, hatü Israel amei Daülangpü Hükei shah yaktük.

²⁵Hanangkü SHEMBÜPA mongshihpü laophülei nanglak khüei nyüke; büpalei lak noei büpai jom kü üpnyüke; kahshangthü jennyüke, hatü mahngthüyü chingshong leipü nyüphinya keiha nyüke.

²⁶Büpai tailu leipü jatthü kü khüamlung annyüke, büpai kahdoknyü dohpülei nyupüthü kü nyüknyüke, hatü hatouei jomphong shülangi peinyüke.

²⁷Jom hükao nenyiunenangnyu, nevaijü huluh neshuohnyu; Üpaiyao mükhet nedhaongnyu nevaijü neshinyu, nevaijü lathuhvü nephennyu.

²⁸Jomei lahhanü nahshi, jomei pülah peü kütüktü nyüke; jomei koyeithülei ladokü yaongnah keiha, hatü jomei koyei kharithü alüngleple kei nyüke.

²⁹Jomei ngeü mailang keiha, mailang cheha keiha jomi ngeü annyüke; jomi ngüngtü yemhathü yepnyüke, üpaiyao neyangaokhen mü jomi yah-ei lüdainyüke.

³⁰Yungching yungmok ngeü keiha hapa nyih jomi hapa nangkü ngünghen. Hanei-i kahdokei veijü vangnyak, hatü shanghah mon eehen, phumnyaki vangngaiyao vangnyak leitükhen.