Read Phom Naga ISAIAH 51 Bible Online

ISAIAH 51 - Phom Naga bible

ISAIAH 51

¹Ngei epü bangtuh, amphong daülangshemshepü kü chongphopüthü, hatü SHEMBÜPA yempüthü. Amphong meleipü bhaokei yahpa, hapa yaongnyü kü veituh, am meleipü lokei ngaipa hapa yaongdung kü veituh.

²Ampa Abraham hi am bühpü Sarah nyi kü veituh; Ngei mechem büpa kü nyükpa, büpa hapeü nenyuham, shejao ngei büpa kü moihiman, hatü hühiha longi dahüpeih.

³Mehenangkü SHEMBÜPAi Zion nyiushem meihühen, hatü lavüngtoiyei tuhphongpü shingthü kü phahjiei veihen; Büpai jahpan kemei Eden pemong keiha, hatü bhih kahdok kemei SHEMBÜPAlei pemong keiha leihühen; Mongongmongle, menvih shuohpü, hatü kesho lokpü ngeü pinnyü kü eehen.

⁴Ngei epü bangtuh, ngelei nanglak, ngei epü kü kenhingtuh ngelei jatli. Ngei leipü nyuhpüvenpü daihen, ngelei shahhingü jatthü shing vangngai leihen.

⁵Ngelei yemleipü shülangi yopailei koei peikahen, ngelei yemleipü peikünyüke, hatü shahhingi ngelei laki jatthü kü shahhingi vanglem lemhen; Yungkungei nyupü kahmükthüi ngei om veihen, ngelei laki jom yangshuohhen shei monglemei dannyüke.

⁶Vangshothü kü ngangei veituh, kahdoknyü kü thaungei veituh! Mehenangkü vangshothü peü awshit keiha mahdaihen, hatü kahdoknyü ashak kei chang leidaihen, hatü halei nyupüthü peü maanha keiha didaikemhen. Shejao ngelei yemleipü denden kü nyuhen, ngelei daülangshemshe mechemao nekemdaihen.

⁷Ngei epü bangtuh, am jiüpü nyingpüthü, hatü ngelei shahkung mongdangei tuhpüthü; Hangkui eelapü hatü depünaampü kü tenyem.

⁸Mehenangkü jomphongü ashakviha keiha laongi, hatü dhaüpi hahtükhen; Shejao ngelei daülangshemshepü hatü yemleipü hüdenhalenshi nyukahen.

⁹Paotuh, paotuh, wong antuh, hatü ham yangshih, Oh SHEMBÜPA; Paotuh, peihdaipü nyihthü kü keiha, meyangmeyangpü denshemthü kü keiha. Rahab khih mü nihtükpü hatü dragon kü peiyei hümtükpeyü nüng nevaipü je?

¹⁰Yungching chüpü ilangmong jeptükpü, hatü laophüi yanglangpüthü homei daihen shingvaishi ilangmong homei lemnyüshong lingpeyü nüng nevaipü je?

¹¹Hanangkü SHEMBÜPAi anglangpüthü nyokei leihen, hatü kesho lokei Zionlei leihen; Nedohnetenpü mongong jomei shangjing kü dheanhen; Jomi mongongmonglepü danghen, mongmang mongyim hatü huipü dohdaihen.

¹²Ngeiyü am nyiushem meihüpü SHEMBÜPA, Didai mahdaihen hangku kü mehekei ammi nyemnya? Jomü phenha kei kaudaihen shennyakthü mon.

¹³Amü am Lingbü SHEMBÜPA, vangshothü paanei deishihpü, kahdoknyü chongnyiam yaong haübü betükteke. Amü am kü shüveipüthülei mongshih eeyei, am mahtükhen khih shei nyihjeih nyempü vüngpai maei nyunyüke. Shejao am kü shüveipüthülei mongshih melei nyüpa?

¹⁴Khoklatei nyupüthü lomi vamdaihen; jom khoklatei nyuei nedihen, nevaijü hahying taoei nenyuhen.

¹⁵Mehenangkü ngeiyü yungching yungmokao ngeü anhüpü SHEMBÜPA, ammei Kahvang. Jeiyong SHEMBÜPAyü ngelei men.

¹⁶Ngei ngelei shah ammei ju kü shihtepih, hatü ngelei laki dhümshi am yangpeih; Vangshothü paanei deishih, hatü kahdoknyü chongnyiam yaong sheitük, hatü Zion kü, “Amü ngelei nanglak” shei epeih.

¹⁷Thaeimatuh, thaeimatuh, paotuh, Oh Jerusalem, Am SHEMBÜPAlei lak leipü mongshih yungshong yingpüthü; Ammi ha hienei yingteke, hatü tüngtüngmüngi kamnyüke.

¹⁸Pinnyüi bühhahpü hapeüthü khongkü pinnyü kü lem mühen hükao neshiü; Pinnyüi haümei laongpü hapeü khongkü pinnyü kü lak kü khaaihen hükao neshiü.

¹⁹Hapa shanghah lemnyi am kü hetteke, üpai am nyiumeihühen? Lomoh aühaü, mahpüchahpü, shaühile, hatü baonghok kungve kü üpai am kü phahjihen?

²⁰Ammei hapeüthü peü chingyangshongei shoukhinuk kemei kü shaok tailok kü manpükei yüh-eiyangei lemlemleyei nyüke; Jomü SHEMBÜPAlei mongshih-i, hatü ammei Kahvang lohpai maei nyüke.

²¹Hanangkü ha bangtuh, am shangpongpü shennyakthü; Yiüi nevaivai-i yiüi chokpükei tüngtüngmüngilongteipüthü.

²²Ammei Jeiyong SHEMBÜPA, laophülei nanglak yangpü ammei Kahvangi hapakei enyüke: Veituh, am tüngtüngmüngi longteipü ammei lak leipü yungshong ngei yahlangtih; Hapa yungshong kübü sheyü ngelei mongshih neyinghen.

²³Ngei hapayü am kü shüveipüthü üami am kü, “Hami ammei dok shangkü kamphanüng aümei lemtuh shei e, hatü chingshongei nyüphinya kü keiha lemhütü am kü shouppa, hayü jom kü shuohhen.”