Read Phom Naga ISAIAH 52 Bible Online

ISAIAH 52 - Phom Naga bible

ISAIAH 52

¹Paotuh, Paotuh, Oh Zion, Wong kohtuh! Nethe meipü owhiai owtuh, Oh daülangpü chingnyü, Jerusalem. Mehenangkü nejaptükpü hatü nedaünelangpüthüi hajük kü ammei penyüshamongei neshüküpih.

²Bhihla kaongtüktuh; yaongtuh, hatü ong uoshing kü uotuh, Oh Jerusalem. Ammei üng kübü nyiamvü shetüktuh, Oh wüpküpei nyupü Zion nela.

³Mehenangkü SHEMBÜPAi hapakei enyüke: “Lop neyah-i am yutükpeih, lop neshuoh-i am angei leihen.”

⁴Jeiyong SHEMBÜPAi hapakei enyüke: “Shongpüba kü ngelei nanglakthüi jom nyingi Ijiplei lakeiloiyei nyuhen shingvaishi yiüpeih; Assyria ami meheyao nevaipü kü shüveipeih.

⁵Hatü shaang ngei hatouei mehe dükhen? shei SHEMBÜPAi enyüke. Mehenangkü meheyao shaipü neshiüpü kü ngelei nanglakthü yah-ei lüdaiteke, hatü jomphong shak kü vanglem lempüthüi ne-ienelemnyu, hatü helu shoei ngelei men yaüeilungnyüke” shei SHEMBÜPAi enyüke.

⁶Hanangkü ngelei nanglakthüi ngelei men nyinghen, hatü hapa shah epeyü ngei khih shei hapa nyih jomi nyinghen. Hih, hapayü ngei hih.

⁷Phongmokbü hüki kahshangthü homei chingmeivangmei baongei, shahjangmei kotü yemleipü baongei Zion am kü, “Ammei Kahvangü Ongpa” shei peipü la meshük nethe meipa!

⁸Bangtuh! ammei yombüthüi jomei ngeü anei chemi mongongpai lennyüke. Mechem SHEMBÜPA Zionlei leihen, jomei müki lekei ha eehen.

⁹Chemi mongongpai kesho loktuh, Oh bendailangdaipü Jerusalem; Mehenangkü SHEMBÜPAi laophülei nanglak nyiushem meihüteke, büpai Jerusalem angei leiteke.

¹⁰SHEMBÜPAi büpalei daülangpü lak jatthü peüei müki eeshi laiteke; hatü kahdoknyü dohpü peüei jenei Kahvang yemleipü eehen.

¹¹Layaongtuh, layaongtuh, haleipü lüdaituh! Nedaünelangpü dou kü tehong! Haleipü vamei lüdaituh, hatü SHEMBÜPAlei yungshongthüao kotuh.

¹²Shejao ammi shüshülangi nevaijü nyaipükei tedai; Mehenangkü SHEMBÜPAi am kü she shongshi müphahen, hatü Israel Kahvangi ngaümphei leiyao yomphahen.

¹³Veituh, ngelei chongphobüi kon kohshi dükkahen; Büpayü longei shangei anshihhen, hatü dhüm longi shuohhen.

¹⁴Büpa eeyei shennyakthü longi thamateke, hangku keiyao nevai-i büpa longi dheshihlaümangshi, hatü büpalei shaohi-ang, hangbong nemei-i nyuhampeih.

¹⁵Shejao jatthü longi büpa kü thamahen, büpa eeyei ongthüi shah mahdaihen; Jom kü üpaiyao ne-eshuohpü dou jomi eehen, hatü jomi mehe mangdan, ha jomi nyinghen.