Read Phom Naga ISAIAH 53 Bible Online

ISAIAH 53 - Phom Naga bible

ISAIAH 53

¹Hamei shahjang kü üpai hinglempa? hatü üpa kü SHEMBÜPAlei lak shakei vampa?

²Büpayü SHEMBÜPA touei sheili pü hük keiha, hatü kahvan kü nyem phaatpükei longpeih. Jeni büpa kü mük shahhen mü, nevaijü jeni lümhen mü büpa kü meheyao dhemeilaüma, nevaijü bethünghangbong neshiü.

³Büpayü hangkuthüi ne-ienelemi yaktük; mongong hatü shangpongpü shennyak hük. Üpaiyao büpa kü nevei-i peüi laophülei dhe jolangkem, peüi büpa yaktük, hatü jeni büpa kü lümeivaüei nedeih.

⁴Hingmei mü büpai jenei shanghah yahlang, hatü jenei mongshang kolang, Shejao jeni büpa keyü Kahvangi üpshuohpü khih, hatü ponghüpü khih shei deihnyüke.

⁵Shejao jeni pungpü nangkü büpa mashateke, jenei mang tata kü büpalei büm mintük; Büpai ponghahpü hanghi homei jen meitükpü dang, hatü büpa mashapü homei jen meitük.

⁶Jen peü mi keiha lemnyongei dai, jen peü laophüi mongpü lem kü lüdaikem; hatü SHEMBÜPAi jen peüei mang büpai kolang.

⁷Büpa kü shüvei, hatü hanghihü, shejao büpai laophülei ju ne-ap; Büpayü miha jüshingei deipükei, hatü mi hük mum japjü nenpü keiha, büpai laophülei ju kübü shah phahükao nevam.

⁸Shahhingi nyongpü leitüktü büpa müei dai, hatü üpaiyao büpa nang mong-aaei nedeih. Mehenangkü büpayü yangnyu nyupü kahdok kübü jütük; Ngelei nanglakthüi mang thahpü nangkü büpa kü bheiteke.

⁹Büpai iy-aongmako dou nedükjao, nevaijü büpalei jui lueilemei ne-ejao, büpayü nemeipüthü mü mahngchong hük kü tuh, büpalei mahng shemmeithü mü vü.

¹⁰Büpalei büm mintükhen, hatü hanghihühenü SHEMBÜPAi mongpü nyuteke, hatü SHEMBÜPAi büpalei yangnyu-ü mangthü shingvaishi moila hük leitükjao, büpai laophülei hühiha eehen, hatü yangnyu shoshoshi nyuhen, hatü büpa homei SHEMBÜPAi mongpü aokpü danghen.

¹¹Büpa shangpong pheikü büpai yangnyu vangngai danghen, hatü büpa shangpongpeyü angsha nevai shei nyingei mongonghen. Ngelei hingshangpü chongphobü homei longi dah shakhühen, hatü büpai jomei mangthü kolanghen.

¹²Hanangkü ngei büpa kü longpüthü mü büpalei phaihan shuohhen, hatü büpai wong kohpüthü mü hean hanteihen; Mehenangkü büpai laophülei yangnyu dihen shuoh, hatü mangthü mü bhei-ie kü shih; Shejao büpai mangthü peüei mang kolang, hatü mangthü shingvaishi phop.