Read Phom Naga ISAIAH 55 Bible Online

ISAIAH 55 - Phom Naga bible

ISAIAH 55

¹Hey, amphong yung lepüthü peü, yung touei peikei; Üami lop ne-ang, peikei, shakei yingtuh! Peikei, lop neshiüi, bhei neshuoh-i yiü hatü amma shakhahtuh.

²Hahying nevaipü kü mehekei ammi lop tüknya? Mepai am hüneshemhü, ha kü mehekei nang mahnya? Ngei epü kü kenhingei bangtuh: mehe mei, ha hahtuh, hatü hetmei kü mong hüshemtuh.

³Ammei dhaong shaangtuh, hatü ngei touei peikei; Am yemmü nyuhen nangkü ngei epü bangtuh. Ngei am mü nedohnetenpü vangpüshuwpü linghen, hatü ngei David kü lahpü moihiman shuohhen.

⁴Veituh, ngei büpayü nanglakthü kü denbü hük, hatü nanglakthü shing mübü hük leihüpeih.

⁵Mehenangkü SHEMBÜPA, ammei Kahvang, daülangpü Israel Kahvangi am kü müknyinshekhang dhüm shuohpü nangkü, ammi nenyingpü jatthü am kü nyükhen, hatü am nenyingpü jatthüi am yemei mokkemkahen.

⁶SHEMBÜPA dangaokhen mü nyushingkü büpa yemtuh; büpa yopailei nyushingkü büpa kü nyüktuh.

⁷Nemeipüthüi laophülei lem, hatü mang shennyakthüi laophülei chudeih ten yakphongtuh. Jom peüi SHEMBÜPA Kahvang touei mong lepeileituh, hatü büpai jom kü phahjihen hatü mang tükhen.

⁸Mehenangkü ngei deihpeyü ammei mongdeih nevai, nevaijü ammei lemthüyü ngelei lem nevai shei SHEMBÜPAi enyüke.

⁹Kahdoknyü meyü vangshothü shaopü keiha, ngelei lemthü ammei lemthü mü, hatü ngelei chudeih ammei chudeih mü shaoshi nyüpeih.

¹⁰Vang hatü shü vangsho leipü vünyüpeih, hatü kahdoknyü kü yung shuoh-ei, pübong pungei betjük jükei, sheili haipüthü kü sheili shuoh-ei hahying mangshuoh thahshi nyokei neleipü keiha,

¹¹Ngelei ju kübü vamei epü shah kong mü nyokei neleikahen, shejao ngei mehe dükhen tem, hapa jiükahen, hatü mehe shingvaishi hapa epa, ha kü aokpü danghen.

¹²Mehenangkü am mongong kü vamei daihen, hatü chingmeivangmei kü müei leihen, kahshang hatü shangchingthü am touei mongongpai kesho lokhen, hatü jahpan kübü pühivungi lak aphen.

¹³Hühhihang nangjei awkaongpüthü kohkahen, hatü daümnyak hüh nangjei vong meipü myrtle püthü kohkahen. Hapayü SHEMBÜPA kü nebepü dou hük, mechemao nemahhen denshing nyangeihepü hük nyukahen.