Read Phom Naga ISAIAH 62 Bible Online

ISAIAH 62 - Phom Naga bible

ISAIAH 62

¹Zionlei daülangshemshepü vanghela kei mangnya thahshi, hatü Jerusalemei yemleipü awnya kei mangnya thahshi, Zion men kü ngei nenmü nenyupih, hatü Jerusalem nangkü ngei nyiumeiyei nenyupih.

²Jatthüi ammei daülangshemshepü, hatü ongthüi ammei müknyinshekhang eehen; Amphong kü men ja hük menhen, hapayü SHEMBÜPAlei ju kübü vamei menhen.

³Amü SHEMBÜPAlei lakei nopü nethe meipü athen, hatü ammei Kahvangei lak leipü ong athen vaihen.

⁴Am kü hajük kü, “Yaktükpü am” nevaijü ammei kahdok kü, “Lavüngtoipü” shei nenyükhen; Shejao ngei amphong kü, “Hephzibah” hatü ammei kahdok kü, “Beulah” shei men ja menhen. Mehenangkü SHEMBÜPAi am kü mong hahhen, hatü ammei kahdok shem yemhen.

⁵Nethe hüki nela hük mü shem yempü keiha, am Lingbüi am mü shem yemhen. Doidainyüi laophülei baha mü mongongpü keiha, ammei Kahvangi am mü mongonghen.

⁶Ammei bham kü, Oh Jerusalem, ngei yombü tuh-ei nyüpeih; Nyihnüng yanüng kemei jom nenmü nenyukahen. Am üami SHEMBÜPA kü nyüknya, nyiumeiyei tenyu.

⁷Büpai Jerusalem mangling thahshi büpa kü nyiumeihen teshuoh, hatü hapayü kahdoknyü kemeilei men-e leihütuh.

⁸SHEMBÜPAi laophülei lakdah-i, hatü büpalei laklu wong longpai, “Hajük kü ammei mop ammei vepathü kü neshuohpih, ammi nyiueinangei linghahpü yiüja hajük kü kung am kü neshuohpih.

⁹Shejao üami vethahnya, hayü jomi hahhen, hatü SHEMBÜPAlei men longhen, Üami nyalingngupai vaümhahnya, hapayü ngelei Phopshem chingshelei jomi ha yinghen” shei lahteke.

¹⁰Penyüsha homei daituh, leiküpü nanglakthü shing lem temtuh; Lemnyüshong lingtuh, yaonghipü yaktüktuh, jatthüi nyinghen shangmü khüamlung haongtuh.

¹¹SHEMBÜPAi kahdoknyü dohpü thahshi hapakei baongteke: “Zion nela kü etuh, veituh, ammei Yemleipüba peikünyüke! Veituh, büpai thintho koei peikünyüke!”

¹²Amphong keyü, “Daülangpü Nanglak, SHEMBÜPAi yanglangpüthü” shei nyükhen; hatü Jerusalem kü, “Yemei Dangpü, Kahvangi Neyakphongpü Chingnyü” shei nyükhen.