Read Phom Naga ISAIAH 63 Bible Online

ISAIAH 63 - Phom Naga bible

ISAIAH 63

¹Laophülei ashakviha kü iy hoidaitü Edom hatü Bozrah leipü peiküpü üpaang? Ow meishi owtü laophülei wong kemei mokei peiküpü üpaang? Hapayü SHEMBÜPA ngei, yanghen wong kohpü, büpa aokpü baongei peikünyüke.

²“Nyalingngupai bhitpü amei owhiai keiha nüngei ow hakpüh-i mekeiang?”

³“Ngei mongshih wong kempai, hatü ngei mongmangei yiü bhitnüng nyalingngupai kü nyeüpükei, hatü shouppü keiha ngei jatthü kü nyeüpeih, hatü üpaiyao ngei kü nesheühpha-angpih; Jomei iy phaatei ngelei owhiai, hatü ngelei bhagthuh kü lüppü khih.

⁴Ngelei nanglakthülei bhüh yemhen, ngelei mongei nyüpeih, hatü ngei hathü yanghen dou dükhen vangbong ngoiteke.

⁵Ngei sheühbü yemshingkü hükao nenyuang, ngei kü haohphahen veijü üpayao nedangang; Hanangkü ngelei mongshih-i ngei wong kohhü, hatü ngelei laki monha aokpü dangpeih.

⁶Ngei mongshih-ei jatthü peü shouptükpeih, ngei mongmangei jom peü ngümtükpeih, hatü jomei iy kahdokei yenhüpeih” shei SHEMBÜPAi enyüke.

⁷SHEMBÜPAlei phahji yahyang douthü jung ngei ehen; Büpai ham kü dükpü lemphüli shingvaishi ngei büpa kü menvih shuohhen. Büpai Israel nanglakthü kü longi moihimanteke, hatü phahji longi huteke.

⁸“Hingmei, jomü ngelei nanglakthü, jomi ngei kü ne-ühingphapih” shei SHEMBÜPAi enyüke, hatü büpayü jom Yangbü leiteke.

⁹Jomei shanghah peü kü phongmokbü nevaijü phongshani nevai, shejao büpa ompai jom yangpeih; Büpalei phahji yahyangi jom yangpeih, Büpai jom longei anshihpeih, hatü peihdaipü nyihthü peü kü büpai jom kü jungpeih.

¹⁰Shejao jomi büpa khüei yaong, hatü büpalei Laangha Daülangpü mongmanghü; Hanangkü büpa jomei vepa leipeih, hatü büpai jom khüei hokpeih.

¹¹Hahepak kü jomphongi SHEMBÜPAlei chongphobü Mosalei nyih deih-ei dang, hatü jomi, “Laophülei mi yombüthü mü hathü yungching leipü yangpübamelei nyüpa? Jomphong kü laophülei Laangha Daülangpü shuohpü melei nyüpa?

¹²Mosalei lakdah philei laophülei müknyinshekhang laki ngan shompü, hatü nedohnetenpü menmei danghen nangkü jom toueiyungching hantükpü,

¹³jom ilangmong homei mülangpü üpaang? Koshoya kü koyei-i keiha jomi huluh neshuoh,

¹⁴Mohohthü kahjishongei müei yiüpü keiha, jom kü SHEMBÜPAlei laanghai nyiushemmei shuohpeih. Hapa keiha nüngi laophülei men müknyinshekhanghühen shingvaishi nüngi laophülei nanglakthü mülangpeih.

¹⁵Nüngei daülangpü hatü müknyinshekhangpü nyushing vangsho leipü ham kü veishih. Nüngi nyakpükenpü hatü nüngei wong melei nyüpa? Nüngei phahji yahyang hatü bampü ham toueipü shonglangteke.

¹⁶Abraham hatü Jakobi ham nenyingjao, nüng hamei Pa; Nüngü, Oh SHEMBÜPA, hamei Pa; Aivang den mebü nüngei menü ham Yangbü.

¹⁷Hami nüng kü nenyemhen mü mehekei ham nüngei lem kübü lemnyongei mülangnya, hatü hamei mong vaanhünya? Nüngei chongphobüthülei men kü, nüngei mükjüp jatthü men kü ham lemei lepkütuh.

¹⁸Kanja shing mon nüngei nanglakthüi daülangpü shing khüamei nyuteke, shejao hamei vepathüi hapa shing nyeütükteke.

¹⁹Aivang den mebü hamü nüngei nanglak nyuhampeih; shejao luangi nüngi vanglem nelempü nanglakthü keiha, hatü nüngei men kü nenyükpü shennyakthü kei nyupeih.”