Read Phom Naga ISAIAH 7 Bible Online

ISAIAH 7 - Phom Naga bible

ISAIAH 7

¹Mechem Jothamei cheha, Uzziahlei chehü Ahaz ongpai Judah kü vanglem lemei nyupa, Aram am Rezin ongpa hatü Remaliahlei cheha Pekah, Israel amei ongpa nyi Jerusalem hahhen shingvaishi aong, shejao jomi nehah-aok.

²Mechem Judah ongpai Aram am Israel kahdokei peiyei nyükeja shei danpa, Ahaz ongpa hatü nanglakthü peü yingnyülei vanglüki phenha jenhüpü keiha jomei mongdang kheüteke.

³Hahepak kü SHEMBÜPAi Isaiah kü, “Anha Shear-jeshub anji Ahaz ongpa mü pongteinüng aongtuh. Büpayü dokpa yungkuk leipü yunghow shanpü dohpü touei ashak dhopüthü uoteipü shingei lemnyülei uoshi chongkahen hih.

⁴Büpa kü, ‘Lishi nyutuh, nenmü nenyemi nyutuh. Rezin ongpa hi Aram am hatü Remaliahlei cheha Pekah nyi mongshihpeyü awjung shodaipü kübü awshit keipü mon hih — meheyao vongshüh neshiüpih, hapa nangkü shei nüng mongtemaan.

⁵Aram am hatü Israel am Remaliahlei chehai nüng lomohhühen phaüshah showteke.

⁶Jijinyi-i, Judah hahtü Tabeelei cheha halei ong vaiyei tuhshah shei eteinyüke’ ” shei eteke.

⁷Shejao SHEMBÜPA Kahvangi hapakei enyüke: “Hapa mechemao neheüpih hatü ha mechemao nevamküpih.

⁸Mehenangkü Aram amü jomei chingnyü Damaska mü wong kohpüba nevai, hatü Damaskayü Rezin mü wong kohpüba nevai. Israel am nangkeyü bong pejempünga thahshi jat hük shei ehen mü nevai-i nanglakthü peü haitükkemhen.

⁹Israel amü jomei chingnyü Samaria mü wong kohpü nevai, hatü Samariayü Pekah ongpa mü wong kohpüba nevai. Nüngi hinglempü kü wong nekohjema, nüng shenei nenyuaokpih.”

¹⁰Shao SHEMBÜPAi Ahaz kü,

¹¹“SHEMBÜPA, nüngei Kahvang kü nyangeihepü hük yütuh; hapayü dipü ching Sheol kei chüshi nevaijü vangsho kei shaoshi nyuhen aok” shei e.

¹²Shejao Ahaz-i, “Ngei neyüpih; ngei SHEMBÜPA kü nedokpih” shei e.

¹³Hapa kü Isaiah-i jangei, “Shaang bangtuh, Oh Davidei hühihathü! Shennyak nyiueinangei leihüpeyü maanteke shei deihshi ngelei Kahvangao nyiueinangei leihühen deihpü je?

¹⁴Hanangkü SHEMBÜPAi nüng kü nyangeihepü hük yahphahen. Veituh, pai mü ngühpü nela hüki yeshang hük bühkahen, hatü büpa kü Immanuel shei menhen.

¹⁵Büpai ten yaktükhen, hatü jiüpü jehen nyingshi longjü büpai ammacheü hatü nyahjiü hahhen.

¹⁶Shejao hapa naüi ten yaktükhen, hatü jiüpü jehen meishi nyinghen shekü nüng nyemhüpü hapa ongpa nyilei kahdok lavüngtoiyei nyuhen.

¹⁷SHEMBÜPAi nüng hatü nüngei nanglakthü hatü ongsha ongshem kemei kü Israel am Judah kübü yanhinüng chemao mangpeipü shanghah koei peikahen — büpai Assyria ongpa müei peikahen” shei e.

¹⁸Hapa nyih kü SHEMBÜPAi Nile yungyen leipü maanhayow kei Ijip am, hatü nyahnyüyow kei Assyria am nyükei thaikahen.

¹⁹Jom peü peiyei kahji peü kü, yaongsha peü kü hatü hüh kohpü phenha, hatü phenhavunglak peü kü bakhen.

²⁰Hapa nyih kü SHEMBÜPAi Euphrates yungdang leipü sho kupbü Assyria ongpa chüngei leihen, hatü büpai ammei sho, jumum hatü lamum kemei kuptükhen.

²¹Hapa nyih kü shennyak hüki mohoh cheha hük, hatü yumha nyi yemmü tuhhen,

²²hatü hathüi amma changshi shuohpü nangkü hapa kahdokei aoei nyupüthüi amma hatü nyahjiü mon hahhen.

²³Hapa nyih kü nyalingngupai kahlei ngupai vü haja longi, ngin haja longi shangshi nyupü shingkü hühvü vamei lümlanghen.

²⁴Shennyakthüi halei lahhilaong notü yemhimak jününg kamteihen; mehenangkü kahdok kemei hühvüi lümlangtü nyuhen.

²⁵Chem hepak kü kah linghampü shanghishong peü kü hühvüi jümlangpü nangkü üpaiyao halei nekamteihen; hapayü mohoh hi mi-i het meekshing leidaihen.