Read Phom Naga LEVI 10 Bible Online

LEVI 10 - Phom Naga bible

LEVI 10

¹Aaronei cheha Nadab hatü Abihu nyi-i jijilei awjakshung yah-ei ha kü aw jaktü ayingshü jak, hatü SHEMBÜPAi jiji kü hapakei dükhen ne-epü kü büpa kü nedaünelangpü aw jakei shuohteke.

²SHEMBÜPAi ngangahük kü aw shomei jiji kü bahhü, hatü jiji nyiphen SHEMBÜPA touei di.

³Hahepak kü Mosai Aaron kü eteke, “Mechem SHEMBÜPAi epa, büpai hapa nang epeih: Üami ngei yopailei peiyei chongphonya, jom homei ngelei daülangshemshe huhen, hatü nanglakthü peü touei ngelei müknyinshekhang shakei vamhühen.” Shejao Aaroni ju kü shah nevami nendai.

⁴Mosai Aaronei chepa naü-eepa Uzzielei cheha Mishael hatü Elzaphan nyi nyükei jiji kü, “Hamü peikei, hatü am shem amei mahng daülangpü shing leipü baümtap haolei yah-ei lüdaituh” shei eteke.

⁵Mosai eshuohpükei jiji peiyei bhagthuh kü düktü shüei baümtap haolei deilang.

⁶Hahepak kü Mosai Aaron hatü büpalei cheha Eleazar hatü Ithamar nyi kü, “Am theppüyoungpü huei sho nehai-i tenyu, nevaijü ammei ashakviha teshaak; hapakei nevaijema amphongao dihen, hatü SHEMBÜPAi noknyü peü kü mongshihkahen. Shejao ammei shem amthü, Israel phang kemei SHEMBÜPAi henyi aw kü shamtükpü shingvaishi thepeiyounghen.

⁷Am ashakshem shaden peih-ei chingshelei nedaihen, hei nevaijema amao dihen; mehenangkü SHEMBÜPAlei mainga phupü am kü nyüke” shei e, hatü Mosai ngeükhüam shuohpükei jomi dükteke.

⁸SHEMBÜPAi Aaron kü,

⁹“Nüng hatü anhanyi-i yiü nevaijü yiüji yingtü mechemao ashakshemei neshühen, hei nevaijema amphong dihen; hapayü hüdenhalenshi den shing shahkung chongkahen.

¹⁰Ammi daülangpü hatü peüi nobenüng, hatü daülangshemshepü hatü nedaünelangpü baong hanhen vongbong,

¹¹hatü ammi Israel am peü kü SHEMBÜPAi Mosa homei shuohpü shahkungnyü nyuhhen vongbong” shei e.

¹²Mosai Aaron hatü büpalei cheha, Eleazar hatü Ithamar, aopü hapeü nyi kü, “SHEMBÜPA kü aw kü jakei moilapü hahying moila kübü aopü hahying yahtuh, hatü hapa daw neshih-i aan lingtü moidü touei hahtuh; mehenangkü hayü longi daülangpü nyüke.

¹³Hapayü daülangpü shingei hahtuh; mehenangkü hapayü SHEMBÜPA kü aw kü jakei moilapü kübü nüng hatü anhathülei phaihan nyüke; mehenangkü hapakei dükhen ngei kü ephopeih” shei e.

¹⁴Shejao nüng hatü amshemi SHEMBÜPA kü hayaoha thintho shuohpü amma hatü bhaghishüng hahhen aok. Ammi hayü daülangpü shingei hahhen aok; mehenangkü hapayü Israel nanglakthüi mongjempü moila shuohpü kübü nüng hatü anhathü kü shuohpü phaihan nyüke.

¹⁵Jomi SHEMBÜPA kü cheü yah-ei jakpü moila shuohshingkü bhaghishüng hatü amma yah-ei peikahen. SHEMBÜPAi epükei hapayü nüng hatü anhathü shing den kübü hean vaikahen.

¹⁶Mosai mang moila shuohhen yum nang hienshingkü hapa aw kü jaktüktü chongjateke. Büpai Aaronei aopü chehapeü, Eleazar hatü Ithamar nyi kü mongshih hatü,

¹⁷“Mehekei mang moila daülangpü shingei nehahpa? Hapayü longi daülangpü hih; mehenangkü hapayü SHEMBÜPA touei khongei men kü moilapü khongei mang tükhen shingvaishi Kahvangi ha anjinyi kü shuohpeih.

¹⁸Hapalei iy daülangpü shingei yah-ei neshüpai ngei epükei ha yumhayü daülangpü shingei hahhen vaipeih” shei eteke.

¹⁹Aaroni Mosa kü, “Veituh, jomi shinnyih-ang SHEMBÜPA kü mang moila hatü jakpü moila shuohnyüke, shejao hapa keipü shahhidou ngei kü hetei nyüpeih. Ngei shinnyih paoh mang moila hahlangmeyü SHEMBÜPAi ngei kü mongonghen je?” shei e.

²⁰Shaang Mosai ha danei büpai vaiteke shei deih.