Read Phom Naga LEVI 13 Bible Online

LEVI 13 - Phom Naga bible

LEVI 13

¹SHEMBÜPAi Mosa hatü Aaron nyi kü eteke,

²“Mechem shennyak hanei poukei nevaijü makaw nevaijü shukshang ampü hangshuw kü vamei thahteibenüng maten kei büpalei büm kü eehenshang, büpa ngongpa Aaron nevaijü cheha ngongpathü touei müei peihen.

³Ngongpai büpalei hangshuw kübü ma kü dokei veihen, hatü ma kübü hangmum shoei hatü lebü hangshuw mü masha chüei shüdaitü nyujema, hayü ngomdin. Ngongpai büpa dokei veitü büpa nedaüang shei baonghen.

⁴Büpalei hangshuw kübü makaw shotoh-i shejao lebü hangshuw mü masha chüei neshü, hatü ma kübü hangmum nesho-i nyujema, ngongpai hapa din kohpü shennyak hayaoha khaatei nyih nyet tuhhen.

⁵Nyih nyetpabü kü ngongpai büpa kü dokei veihen hatü hapa ma neyeiya-i hatü hangshuw kü daei nedai-i nyujema ngongpai shao büpa nyih nyet hayaoha khaatei tuhhen.

⁶Nyih nyetpabü kü ngongpai büpa kü shao chem dokei veihen, maju vanei, hatü daei nedaijema, ngongpai büpayü daüteke shei baonghen; mehenangkü hapayü ma kohpü mon nyüke. Hapa shennyaki büpalei ashakviha dhotükhen, hatü büpa daüdaihen.

⁷Shejao daüteke shei baonghen shingvaishi ngongpa kü huphei kü shao büm kü ma daei daijema, büpai ngongpa touei shao peihen vongbong.

⁸Ngongpai büpa kü dokei veihen, hatü büm kü ma daei daijema, büpa nedaüang shei ngongpai baonghen; hapayü ngomdin nyüke.”

⁹Mechem shennyak hanei kü ngomdin vamhen, büpa ngongpa touei müei deihen vongbong.

¹⁰Ngongpai büpa kü dokei veihen, hatü hangshuw poukei shoei ma kübü hangmum shoei phaithüng kei ma bhaoei shü vamjema,

¹¹hapayü longi nemeipü maten nyüke, hatü ngongpai büpayü nedaü shei baonghen; hapayü ngomdin nyüke.

¹²Büpalei büm lüpei ma vamjema, hatü ngongpai veipülei ma vampü shennyak kü shangnyüshang kübü lajaang laishi ma hoiyei vamjema,

¹³ngongpai büpa kü dokei veihen, hatü büpalei büm lüpei ma vamei nyujema, ngongpai büpayü daülangpü shei baonghen; mehenangkü büpalei ma kemei shotoh-i leidaipü nangkü büpa daülangpü nyüke.

¹⁴Mechem büpa kü phaithüng kei ma bhaoei vamhenshang, büpayü nedaüpü nyüke.

¹⁵Mechem ngongpai mathüng eehen, büpayü nedaüpü shei baonghen. Hapa mathingü ngomma nyüke.

¹⁶Shejao hapa mathüng shoei leidaijema, büpa ngongpa touei peihen;

¹⁷ngongpai büpa kü dokei veihen, hatü hapa ma shotoh-i leidaijema, ngongpai hapa ma kohpü shennyakü daüteke shei baonghen. Hapheikü büpa daüdaihen.

¹⁸Mechem haneilei büm kü hihüma vamtü meidaipheikü,

¹⁹hapa makaw kü shotoh-i poukei nevaijü hakpühpüh-i shotohtoh-i kaw vamhenshang, büpa ngongpa touei müei deihen vongbong.

²⁰Ngongpai büpa kü dokei veihen, hatü hapa makaw lebü hangshuw mü hayaoha chüei shüdaitü nyujema, hatü haleipü hangmum shotoh-i leidaijema, büpayü nedaüang shei ngongpai baonghen. Hapayü hihüma kübü ngomma chongpangpü nyüke.

²¹Shejao ngongpai dokei veishingkü hapa leipü hangmum nesho, hatü makaw lebü hangshuw mü chüei neshü, maju vanei meidaihen mü nyujema, ngongpai büpa nyih nyet khaatei tuhhen.

²²Hapa ma hangshuw kü daei daijema, büpa nedaüang shei ngongpai baonghen; mehenangkü hayü ngomma nyüke.

²³Shejao hapa makaw lakshing daei nedaijema, hapayü hihüma kaw mon nyüke, hatü ngongpai büpayü daülangi nyüke shei baonghen.

²⁴Mechem haneilei büm kü awma nyuhen, hatü ha awma kaw kü hakpühpüh-i shotohtoh-i nevaijü makaw shotoh-i vamjema,

²⁵ngongpai hapa makaw kü dokei veihen, hatü haleipü hangmum shotoh-i leidaijema, hatü lebü hangshuw mü chüei shüdaitü nyujema, hapayü ngomdin awma kaw kübü vampü nyüke. Ngongpai büpayü nedaü shei baonghen; mehenangkü hapayü ngomdin nyüke.

²⁶Shejao ngongpai hapa dokei veijü makaw kübü hangmum nesho-i nyujema, hatü lebü hangshuw mü chüei neshiü maju vanei meidaijema, ngongpai büpa nyih nyet khaatei tuhhen.

²⁷Nyih nyetpabü kü ngongpai büpa kü dokei veihen, hatü hapa büm kü daei daijema, ngongpai büpa nedaüang shei baonghen; mehenangkü hapayü ngomma nyüke.

²⁸Shejao makaw lakshing büm kü daei nedai-i maju vanei meidaijema, hayü awma kübü poukei vampü mon nyüke, hatü ngongpai büpayü daülangi nyüke shei baonghen; hapayü awma kübü kaw mon nyüke.

²⁹Mechem nyüha nevaijü baha hük kü shangjing kü nevaijü shahvangshong kü ma kohhen,

³⁰ngongpai büpa kü dokei veihen, hatü hapayü lebü hangshuw mü chüei shüdaitü, hatü haleipü hangmum vungpuh-i lah manshi nyujema, ngongpai hapa shennyakü nedaüang shei baonghen; hapayü ngühma nyüke, hatü shangjing nevaijü shahvangshong kübü thahteibenüng maten nyüke.

³¹Shejao mechem ngongpai henüng keipü ma dokei veihenshang, lebü hangshuw mü chüei neshü, shejao hatoumü hangmum nyaktüh-i vamei neshiüjema, ngongpai hapa shennyak nyih nyet khaatei tuhhen.

³²Nyih nyetpabü kü ngongpai hapa ma dokei veihen, hatü hapa ngühma daei nedai, hatü haleipü hangmum vungpuh-i nenyujema, hatü lebü hangshuw mü hayaoha chüei neshüjema,

³³büpai hapa makaw shinpü mü lenei sho hatü jumum kuptükhen vongbong, hatü ngongpai büpa shao nyih nyet khaatei tuhhen.

³⁴Nyih nyetpabü kü ngongpai hapa ngühma dokei veihen, hatü hapa ma daei nedai, hatü lebü hangshuw mü chüei neshü-i nyujema, ngongpai büpayü daülangpü shei baonghen.

³⁵Shejao büpa daüteke shei baongpheikü hapa ngühma daei daijema,

³⁶ngongpai büpa kü dokei veihen, hatü ngühma büm kü daei daijema, ngongpai sho hatü jumum vungpü veihen napü neshiü; hapa shennyakü nedaüpü nyüke.

³⁷Shejao büpai veiaokpülei hapayü lakshing hatü sho nyakla ha kü vamjema, hapa ngühmayü meidaipü vaihen. Büpayü daülangpü nyüke, hatü ngongpai büpa daüteke shei baonghen.

³⁸Mechem nyüha nevaijü baha hük kü shukshang vamhen,

³⁹ngongpai hapa shennyak kü dokei veihen, hatü hapa kaw hakeiüng shopü vaijema, hayü nethahbenüng kaw hei-üng hangshuw kü vampü nyüke, hatü hapa shennyakü daülangpü nyüke.

⁴⁰Shennyak hük büpalei sho vüei shangpaangjao büpa daülangpü nyüke.

⁴¹Shennyak hük büpalei shangshe sho kaongdaitü shangpaangei leidaijao büpa daülangpü nyüke.

⁴²Shejao büpalei shangba nevaijü shangnyüshang kü hakpühpüh-i shotohtoh-i ma vamjema, hapayü ngomma büpalei shangjing kü vampü nyüke.

⁴³Ngongpai büpa dokei veihen, hatü büpalei shangjing kübü mayü hakpühpüh-i shotohtoh-i ngomma kei nyujema,

⁴⁴hapa shennyak ngomdin kohpü hatü nedaüpü nyüke. Büpalei shangjing kü ma kohpü nangkü ngongpai büpa nedaü shei baonghen.

⁴⁵Hapakei ngomma kohpü shennyakü shaakdaipü ashak ümhen, sho nehaihen, shapmaiphi kü jümtü, “Nedaüpü, nedaüpü!” shei lenhen.

⁴⁶Büpa kü hapa ma nyupü thahshi nedaüpü vaihen, hatü büpa mih kübü khaatei baümtap haolei nyuhen.

⁴⁷Mechem ashakviha phümphah ashak nevaijü nyemin ashak,

⁴⁸dakpü nevaijü hiupü nyemin ashak nevaijü phümphah ashak nevaijü phaishuw nevaijü phaishuwi lingpü kü mom aongei,

⁴⁹thüngshingi nevaijü hakpüh-i vamjema, hayü nemeipü dinten vampü hatü hapayü ngongpa kü huhen vongbong.

⁵⁰Ngongpai hapa mom hetpü dou kü dokei veihen, hatü nyih nyet khaatei tuhhen.

⁵¹Nyih nyetpabü kü büpai hapa dokei veihen, hatü ashak kü, nevaijü dakpü, hiupü ashak kü nevaijü phaishuwi lingpü noteipü dou kü hapa mom daei daijema, hapayü nemeibenüng mom hetpü nyüke.

⁵²Büpai hapa ashak nyemin vi-i dakpü nevaijü phümphah-i hiupü vaijao, nevaijü phaishuwi lingpü dou kü hetdaipü vaijao aw kü jaktükhen; mehenangkü hapa mom-ü nemeipü nyüke.

⁵³Ngongpai hapa dokei veishingkü ashakviha dakpü nevaijü hiupü nevaijü phaishuwi lingpü dou vaijao hapa mom daei nedaijema,

⁵⁴büpai hapa din kohpü ashak dhotükhen ngeükhüam shuohhen. Hapheikü büpai hapa dou nyih nyet khaatei tuhhen.

⁵⁵Din kohpü ashak dhopheikü ngongpai hapa dokei veihen, hatü hapa mom daei nedaijao lakshing nyujema, hayü nedaüpü nyüke. Mom shak lemei vaijao mong lemei vaijao hapayü aw kü jaktükhen.

⁵⁶Hapa dou dhotükpheikü ngongpai dokei veishingkü mom vandaitü nyujema, büpai hapa ashak nevaijü phaishuw nevaijü dakpü nevaijü hiupü dou kübü mom hetpü shing shaakei yaktükhen.

⁵⁷Shejao ashakviha kü, dakpü nevaijü hiupü ashak nevaijü phaishuwi lingpü dou kü mom shao vamjema, mehe keipü mom vaihenshang aw kü jaktükhen.

⁵⁸Ashakviha dakpü nevaijü hiupü nevaijü phaishuwi lingpü dou dhopheikü mom lüdaijema, shao chem dhohen, hatü hapayü daülangpü vaihen.

⁵⁹Hathüyü phümphah ashak nevaijü nyemin ashak, dakpü nevaijü hiupü nevaijü phaishuwi lingpü dou kü nedaüang nevaijü daüteke shei baonghen shahkungnyü nyüke.