Read Phom Naga LEVI 14 Bible Online

LEVI 14 - Phom Naga bible

LEVI 14

²Hathüyü ngomdin kohpü shennyak meidaijü daüpü hepak kü dükhen shahkungnyü nyüke. Büpa daüteke shei baonghen nyih ngongpa touei müei peihen,

³hatü ngongpai büpa baümtap haolei müei deiyei büpa kü dokei veihen. Hapa shennyak kübü ngomma meidaitü nyujema,

⁴ngongpai daülangpü ou yem nyi, hatü cedar pü, ashak hakla hatü sapon yah-ei daühen shennyak shingvaishi koei peihen ngeükhüam shuohhen.

⁵Ngongpai ou hük yah-ei daülangpü yunglok yung shihpü haümdük shangkü jühen ngeükhüam shuohhen.

⁶Büpai ou yem, cedar pü, ashak hakla hatü sapon yah-ei jüpü ouhalei iy kü hinghen.

⁷Büpai hapa ngomma kohpü daühen shennyak kü nyetpa haihen, hatü ngongpai hapa ou yem hük shangei piyei deishihhen.

⁸Hapa shennyaki büpalei ashak dhotükhen, sho kuptükhen, hatü hangha lakhen; büpa sheyü daülangpü vaihen. Büpa baümtap mongei shühen, shejao büpalei ashakshem haolei nyih nyet nyuhen.

⁹Nyih nyetpabü kü büpa shao sho, jumum, mükmum, hatü büm kü nyupü mum kemei kuphen; büpai büpalei ashakviha dhotükhen, hatü hangha lakhen, hapheikü büpa daülangpü leidaihen.

¹⁰Nyih shetpabü kü büpai kawhikang neshiüpü vangbong hük lompü mi chebaongha nyi hatü mi chebiha hük, olive mainga nyettü atta dok jem, hatü olive mainga dok hük kü jem antü phaihan hük koei peihen.

¹¹Ngongpa üpai büpa daüteke shei baonghen nyüpa, büpai hapa shennyak hatü moilathü ashakshem shadenei SHEMBÜPA toumü yah-ei peihen.

¹²Hatü ngongpai mi chebaongha hük, hatü mainga dok hük kü jem anpü phaihan hük yah-ei büpai SHEMBÜPA kü pungpü moila shuohhen. Büpai hathü SHEMBÜPA kü hayaoha thintho kei shuohhen.

¹³Büpai hapa mi mang moila hatü jakpü moila jüteipü daülangpü shingei jühen. Mang moila keiha pungpü moila shuohhenao ngongpalei hean nyüke; hapayü longi daülangpü nyüke.

¹⁴Ngongpai hapa pungpü moila leipü iy hanei yah-ei daühen shennyakei lakdahphi dhongshü kü, lakdahphi lakphienyü kü hatü ladahphi laphiennyü kü nyiohen.

¹⁵Ngongpai olive mainga yah-ei büpalei laknyongphi lakbha kü shihhen,

¹⁶büpalei lakdahphi lakjaangi ha kü hünghen, hatü SHEMBÜPA tou kü nyetpa haihen.

¹⁷Ngongpai büpalei lakbha kübü mainga hatü pungpü moila shuohpü iy hanei yah-ei daühen shennyakei lakdahphi dhongshü kü, lakdahphi lakphienyü kü, hatü ladahphi laphiennyü kü nyiohen.

¹⁸Büpalei lakbhalei aopü mainga kemei ngongpai daühen shennyakei shangjing kü nyiohen, hatü büpa shingvaishi SHEMBÜPA tou kü moila shuohhen.

¹⁹Hapheikü ngongpai hapa shennyak nedaüpü kübü daühen shingvaishi mang moila shuohhen hatü hapakei daühüpü dou dükhen. Hapheikü ngongpai jakpü moila jühen,

²⁰hatü moidü shangei hahying moila mü hapa moila shuohhen, hatü büpa daüdaihen.

²¹Shejao büpa taopü nangkü hapa neshuoh-aokjema, büpai pungpü moila shuohhen mi chebaongha hük büpa daühen shingvaishi moila shuohhen, hamü chemi hahying moila shuohhen olive mainga mü nyettü atta dok hük hatü olive mainga dok hük kü jem anpü phaihan hük,

²²hatü athuba nyi nevaijü khakhi ouha nyi büpai aokshampü, hük mang moila shuohhen hatü hükpayü jakpü moila shuohhen koei peihen.

²³Nyih shetpabü kü büpai hathü yah-ei büpa daühen shingvaishi ngongpa touei ashakshem shadenei SHEMBÜPA kü shuohhen koei peihen.

²⁴Ngongpai pungpü moila shuohhen mi cheha mü mainga yah-ei SHEMBÜPA kü hayaoha thintho shuohhen.

²⁵Büpai mi cheha yah-ei pungpü moila shuohhen nangkü jühen hatü hapalei iy hanei yah-ei daühen shennyakei lakdahphi dhongshü, büpalei lakdahphi lakphienyü kü hatü ladahphi laphienyü kü nyiohen.

²⁶Ngongpai büpalei laknyongphi lakbha kü mainga shihhen,

²⁷hatü büpalei lakdahphi lakjaangi büpalei lakbha leipü mainga-i SHEMBÜPA tou kü nyetpa haihen.

²⁸Büpalei lakbha leipü mainga hanei yah-ei mang moila kübü iy nyiopü shingkü daühen shennyakei lakdahphi dhongshü kü, lakdahphi lakphienyü kü, hatü ladahphi laphienyü kü nyiohen.

²⁹Büpalei lakbha leipü aopü mainga kemei ngongpai hapa shennyakei shangjing kü nyiohen, hatü hapakei büpalei men kü SHEMBÜPA kü moilahen.

³⁰Hapheikü hapa shennyaki shuoh-aokpükei ngongpai athuba nevaijü khakhi ou yah-ei moilahen,

³¹hahying moila mü hükü mang moila, hükpayü jakpü moila shuohhen. Hapa keiha daühen shennyakei men kü ngongpai SHEMBÜPA kü moila shuohhen.

³²Hapayü ngomdin kohpü shennyak shingvaishi hatü daühen shingvaishi nyingnyoi moila neshuoh-aokpü nangkü tempü shahkungnyü nyüke.

³³SHEMBÜPAi Mosa hatü Aaron nyi kü eteke,

³⁴“Am mükjüp danghen shingvaishi mechem am kü shuohpü Kanan kahdokei shühenshang, hapa kahdokei shem kü mom aongpü eejema,

³⁵shem shembüi ngongpa touei peiyei, ‘Ngelei shemei mom aongpükei eepeih’ shei ehen.

³⁶Ngongpai hapa mom dokei veinüng shem mongei shüshekü shem meheyao nedaüang shei ne-ehen shingvaishi shem dou kemei shetlanghen ngeükhüam shuohhen. Hapheikü ngongpa shem mongei shüei shem kü dokei veihen.

³⁷Büpai bham leipü mom kü dokei veihen, hatü thüngshingi nevaijü hakpüh-i lebü bham mü chüei shüdaitü nyujema,

³⁸hapa shem leipü ngongpa vamei daihen, hatü nyih nyet küpei tuhhen.

³⁹Nyih nyetpabü kü büpa nyokei leihen hatü shao dokei veihen. Bham kü mom daei daijema,

⁴⁰büpai hapa din kohpü yaong lokei chingnyü haolei nedaüpü shingei yaktükhen ngeükhüam shuohhen.

⁴¹Büpai mongphi bham kemei bhaoktükhen hatü bhaokpü kemei chingnyü haolei nedaüpü shingei yaktükhen,

⁴²hatü lebü yaong ja leiyei jeihen hatü ja vaishi jinei linghen.”

⁴³Shem kübü yaong bhaokei ja jinei lingphei kü shao mom aongjema,

⁴⁴ngongpai hapa dokei veinüng shühen, hatü shem kü mom daei vamjema, hapayü nemeibenüng mom nyüke; hapa shem nedaüpü nyüke.

⁴⁵Hapa shem bentükhen hatü haleipü yaong, pü hatü ha kü jinpü kemei chingnyü haolei nedaüpü shingei shetei deiyei yaktükhen.

⁴⁶Hapa shem küpei tuhpü hepak kü üpai halei shühenshang, büpa om dhüshi nedaüpü leihen.

⁴⁷Üpai hapa shem mongei hahyinghen nevaijü shihen, büpai laophülei ashakviha kemei dhotükhen vongbong.

⁴⁸Shejao ngongpai hapa mom dokei veinüng shüjü hapa jintükpheikü daei nedaijema, büpai hapa shemü daülangpü shei baonghen; mehenangkü mom mahdaiteke.

⁴⁹Hapa shem daühen shingvaishi büpai ou nyi, hatü cedar pü maani, ashak hakla hatü sapon yahhen.

⁵⁰Büpai ou hük yah-ei yunglok yung shihpü haümdük shangkü jühen.

⁵¹Hapheikü büpai cedar pü, sapon, ashak hakla hatü ou yem yah-ei jüpü ouhalei iy kü, hatü yungthüng kü hingtü shem kü nyetpa haihen.

⁵²Büpai ouhalei iy, yungthüng, ou yem, cedar pü, sapon hatü ashak hakla yah-ei shem daühen.

⁵³Hapheikü büpa ou yem yah-ei chingnyü haolei deiyei shangei piyei deishihhen. Hapa keiha büpai shem daüei dükhen hatü hapayü daüdaihen.

⁵⁴Hathüyü ngomdin, ngühma,

⁵⁵ashakviha nevaijü shem kü mom aongpü,

⁵⁶hatü poukpü, büm kü makaw, shukshang,

⁵⁷nedaüpü hatü daüpü nyinghen shahkungnyü nyüke.