Read Phom Naga LEVI 15 Bible Online

LEVI 15 - Phom Naga bible

LEVI 15

¹SHEMBÜPAi Mosa hatü Aaron nyi kü eteke,

²“Israel am kü hei eyeishuoh: Mechem baha kü hangyung vamhenshang, hapayü nedaüpü nyüke.

³Hapa hangyung nedoh-i yenjao nevaijü dohdaijao hayü büpa shingvaishi nedaüpü nyüke.”

⁴Hangyung vampü shennyaki shipü shinshing, büpa uopü uoshing kemei nedaüpü nyüke.

⁵Shennyak hanei büpalei shinshing kü hongjema ashakviha dhotükhen hatü hangha laktükhen vongbong, hatü büpa om dhüshi nedaüpü leihen.

⁶Hangyung daipü shennyaki uotükphei shinghiphei kü üpai uohenshang, büpai ashakviha dhotükhen, hatü hangha laktükhen vongbong; hatü büpa om dhüshi nedaüpü leihen.

⁷Üpai hangyung daipü shennyak kü honghenshang, büpai ashakviha dhotükhen hatü hangha laktükhen vongbong, hatü büpa om dhüshi nedaüpü leihen.

⁸Hangyung daipü shennyaki daülangpü shennyak kü yu-op shaojema, büpai ashakviha dhotükhen, hatü hangha laktükhen vongbong, hatü büpa om dhüshi nedaüpü leihen.

⁹Hangyung daipü shennyaki uopü yem hatü uoshing kemei nedaüpü nyüke.

¹⁰Üpai hapa shennyakei dou lemhük kü-üng honghenshang, büpa om dhüshi nedaüpü leihen; üpai hapa shennyaki uopü yemha kü dou lemhük dangkao koei leihenshang, büpai ashakviha dhotükhen hatü hangha laktükhen hatü om dhüshi nedaüpü leihen.

¹¹Hangyung daipü shennyaki shongei lak meishi nehüh-i hanei kü hongjema, hapa shennyaki ashakviha dhotükhen, hangha laktükhen, hatü büpa om dhüshi nedaüpü leihen.

¹²Hangyung daipü shennyaki hongtükpü haümdük bhaotükhen, hatü pü-i lingpü dou vaijema meishi thitei daütükhen.

¹³Mechem hapa shennyak hangyung daipü dohhen, büpai nyih nyet ittü laophülei ashakviha dhotükhen, hangha laktükhen, hatü büpa daüdaihen.

¹⁴Nyih shetpabü kü büpai athuba nyi nevaijü khakhi ou nyi ashakshemei SHEMBÜPA tou kü yah-ei peiyei ngongpa kü shuohhen.

¹⁵Ngongpai hapa hük yah-ei mang moila, hatü hükpa yah-ei jakpü moila shuohhen. Hapa keiha hangyung daipü shennyak nangkü büpai SHEMBÜPA tou kü moila shuohhen.

¹⁶Shennyak hanei kü hangyung vamjema, büpai büm kemei hangha lakhen, hatü büpa om dhüshi nedaüpü leihen.

¹⁷Hangyungi sheihtükpü dou, ashakviha vaijao, phaishuwi lingpü dou vaijao meishi dhotükhen, hatü hapa om dhüshi nedaüpü leihen.

¹⁸Nyüha baha nyi jemteipheikü jijinyipheni hangha laktükhen vongbong, hatü jijinyiphen om dhüshi nedaüpü leihen.

¹⁹Mechem nyüha hük hangha tenhenshang pinnyü nedaüpü nyih nyet nyuhen, hatü üpai pinnyü kü honghenshang om dhüshi nedaüpü leihen.

²⁰Hangha tenpü hepak kü pinnyüi uopü hatü lempü shinghiphei kemei nedaüpü leihen.

²¹Üpai pinnyülei shinshing kü honghenshang, büpai ashakviha dhotükhen, hatü hangha laktükhen, hatü büpa om dhüshi nedaüpü leihen.

²²Üpai pinnyüi uopü uoshing kü honghenshang büpai ashakviha dhotükhen, hatü hangha laktükhen, hatü büpa om dhüshi nedaüpü leihen.

²³Shinshing vaijao pinnyüi uopü uoshing vaijao mechem hanei-i ha kü honghenshang, om dhüshi nedaüpü leihen.

²⁴Shennyak hanei pinnyü mü hangha tenpü hepak kü jemteijema, hatü hapa iy-i büpa kü sheüjema, büpa nyih nyet nedaüpü leihen, hatü büpai lempü shinshingao nedaüpü leihen.

²⁵Nyüha hanei pinnyü hangha tenpü hepak nevaipheikü iy nedoh-i daijema, nevaijü hangha tenpü nyih peih-ei iy daijema, pinnyü hangha tenpü nyih kü kei iy daipü thahshi pinnyü nedaüpü leihen.

²⁶Pinnyü hangha tenpü nyih kü kei iy daipü thahshi pinnyülei shinshing nedaüpü leihen, hatü pinnyüi uopü shinghiphei kemei nedaüpü leihen.

²⁷Üami hathü kü honghen, nedaüpü leihen; büpai ashakviha dhotükhen, hatü hangha laktükhen, hatü om dhüshi nedaüpü leihen.

²⁸Mechem pinnyü kü hapa iy dohhenshang, nyih nyet daipheikü pinnyü daütükhen.

²⁹Nyih shetpabü kü pinnyüi athuba nyi nevaijü khakhi ou nyi yah-ei ashakshemei ngongpa touei peihen.

³⁰Ngongpai hapa hük yah-ei mang moila hatü hükpa yah-ei jakpü moila shuohhen, hatü hapa keiha büpai pinnyü nedaüpü shingvaishi SHEMBÜPA tou kü daüei moilahen.

³¹Jomei baümtap jiamei nyupü ashakshem nedaünelangi leihüpai jom nedihen shingvaishi SHEMBÜPAi Mosa kü Israel am nedaünelangpü lemphü kübü khaatei nyuhen eteke.

³²Hapayü baha hük hangyung daipai nedaüpü leipü,

³³hatü nyüha hük hangha tenpü, nyüha nevaijü baha hük jemteipü nangkü shuohpü shahkungnyü nyüke.