Read Phom Naga LEVI 16 Bible Online

LEVI 16 - Phom Naga bible

LEVI 16

¹Aaronei cheha nyi SHEMBÜPA kü nedaüpü aw jakei moilapü nangkü jütükpheikü SHEMBÜPAi Mosa kü eteke.

²SHEMBÜPAi Mosa kü, “Jiüpü hepak kü mon Longi Daülangpü Shing touei haenpü ashak touei peihen anjei Aaron kü eyeishuoh, mehenangkü Vangpüshuwpü Pela kübü shaküp shangkü ngei phum mü vamnyüpeih. Büpai hapa nebangjema, büpayao dihen.

³Büpai mang moila shuohhen mohoh chebaongha hük, hatü jakpü moila shuohhen mi cheha hük yah-ei Longi Daülangpü Shingei shüaokhen” shei eteke.

⁴Büpai daülangpü nyemin bhagthuh, nyemin ashaki büpalei büm kü jümei thuhhen; nyemin shüngshep ngeihhen, hatü nyemin shangshak shakhen. Hathü daülangpü owhiai nyüke; büpai hathü thuhshekü hangha laktükhen vongbong.

⁵Israel am nanglakthü leipü büpai mang moila shuohhen yum chebaong nyi, hatü jakpü moila shuohhen mi chebaongha hük yahhen.

⁶Aaroni mohoh chebaong hük yah-ei büpalei mang tükhen shingvaishi mang moila hatü jom shem shing shuohhen.

⁷Hatü büpai yum chebaong nyi yah-ei SHEMBÜPA kü ashakshem shadenei shuohhen;

⁸hatü Aaroni yum chebaong nyi kü phongyomhenhük SHEMBÜPA shing hatü hükpayü Azazel shingvaishi.

⁹Mepa yum SHEMBÜPA shingvaishi phongkü hethen, Aaroni hapa yah-ei mang moila shuohhen;

¹⁰shejao mepa yum Azazel shingvaishi phongkü hethen, hapayü nanglakthülei mang koei Azazel jahpanei deishihtükhen shingvaishi SHEMBÜPA kü yemmü shuohhen.

¹¹Aaroni mohohbaongü büpa hatü büpalei shem am shingvaishi mang moila shuohhen,

¹²büpai SHEMBÜPAlei moidü leipü aw bah-ei nyupü ayingshü jakpü shung hatü ayingshü lakpaoh nyi yah-ei Longi Daülangpü Shingei koei peihen.

¹³Büpai ayingshü yah-ei SHEMBÜPA tou kü aw kü jakhen, hatü büpa nedihen shingvaishi Vangpüshuwpü Pela kübü shaküp vong büpü awshiti jümlanghen.

¹⁴Büpai mohohbaongei iy yah-ei büpalei lakjaangi shaküp shadenei haihen, hatü hapa hanei yah-ei Vangpüshuwpü Pela shadenei nyetpa haihen.

¹⁵Hapheikü büpai nanglakthü shingvaishi mang moila shuohhen yum jühen, hatü büpai mohohbaongei iy yah-ei dükpükei Longi Daülangpü Shingei heihhen, hatü shaküp hatü Vangpüshuwpü Pela shadenei haihen.

¹⁶Hapa keiha büpai Israel nanglakthü nedaünelangpü hatü khüpü mang lemphüli shingvaishi Longi Daülangpü Shing daütükhen. Jom nedaünelangpü chi kü nyupü ashakshemao hapakei daütükhen.

¹⁷Longi Daülangpü Shingei Aaroni büpa shing, jom shem shing, hatü Israel phang kempü shing moila shuohnüng shüdaipü mangvam thahshi üpaiyao ashakshem mongei nenyuhen.

¹⁸Hapheikü büpa SHEMBÜPA toueipü moidü touei vamei moila shuohhen. Büpai mohohbaongei iy hanei hatü yum iy hanei yah-ei moidü leipü vaung peü kü nyiohen.

¹⁹Büpai büpalei lakjaangi hapa iy hanei yah-ei Israel am nedaünelangpü kübü hapa daühen shingvaishi nyetpa haihen.

²⁰Mechem Aaroni Longi Daülangpü Shing, ashakshem hatü moidü daüei temhenshang, büpai yum hük yemmü yah-ei deihen,

²¹hatü Aaroni yum shangjing kü büpalei lak nyipheni dükhen, hatü hapa kü Israel nanglakthülei mang, jom pungpüshaipü, jomi khüei yaongpü lemphü mang yum shangjing kü kohühen hatü hapa dükhen shingvaishi jepü shennyaki müei hapa yum jahpanei deitükhen.

²²Hapa yum kü jomei mang kemei kohütü lavüngtoipü jahpanei deishihtükhen.

²³Hapheikü Aaroni Longi Daülangpü Shingei shüshekü owpü owhiai kemei ashakshem mongei shüei hathü bhüh-ei tuhphonghen.

²⁴Büpai daülangpü shingei hangha lakhen, hatü büpai düngei owteipü ow owhen, hatü büpa vamei büpa hatü nanglakthülei mang tükhen shingvaishi jakpü moila shuohhen.

²⁵Büpai mang moila kübü cheü moidülei jakhen.

²⁶Shennyak üpai hapa mang kopü yumha veyei deishihpa, büpai ashakviha dhotükhen; hapheikü mon büpa baümtap mongei shühen.

²⁷Mang moila shuohpü mohoh hatü yum iy mepa moilahen shingvaishi Longi Daülangpü Shingei yah-ei shüpa, hapalei shuw, phai, hatü thenleimongphang kemei baümtap haolei yah-ei deiyei jakhen.

²⁸Üpai hapa jaknya, büpai ashakviha dhotükhen hatü hangha lakhen, hatü hapheikü baümtap mongei shühen.

²⁹Hapayü am shingvaishi düngeipü shahkung nyukahen: Nyetpabü len nyih anpabü kü bühü vaituh nevaijü am mü nyupü benha vaituh shüaeiyunglehen, hatü dou nedükhen.

³⁰Mehenangkü hapa nyih kü SHEMBÜPA tou kü ammei mang lemphü kübü daühen shingvaishi mang tükhen moila shuohhen.

³¹Hapayü am chemjalak kü nyiumeihen Sabbath nyih nyüke; ha nyih nehahneyinghen, dou nedükhen. Hapa shahkungü hüdenhalenshi noteihen nyüke.

³²Ngongpa üpai chepalei shing kü jeihen thiteiphuei jehenshang, büpai daüpülangpü dou dükhen. Büpai ngong-ow owhen,

³³hatü Longi Daülangpü Shing, ashakshem, moidü, ngongpathü, hatü nanglakthü peü daütükhen.

³⁴Hapayü am shingvaishi düngeipü shahkung nyüke: Israel amei mang lemphü shingvaishi vangbong kü chem hapa mang tükhen moila shuohhen. SHEMBÜPAi büpa kü epükei Mosai dükteke.