Read Phom Naga LEVI 18 Bible Online

LEVI 18 - Phom Naga bible

LEVI 18

¹SHEMBÜPAi Mosa kü eteke,

²“Israel nanglakthü kü, ‘Ngeiyü SHEMBÜPA, ammei Kahvang’ shei etuh.

³Ammi am nyupü Ijip kahdokei jomi dükpü tedük, hatü shaang ngei am müei leipü Kanan kahdokei nyupü ami lingpükei teling. Ammi jomei dükhiling vanglem pheikü temü.

⁴Ngelei shahkungnyüthü bangtuh, hatü ngei epü düktuh. Ngeiyü SHEMBÜPA, ammei Kahvang.

⁵Ngei am kü shuohpü shahkungthü hatü vanglem kü mütuh; hapa dükpai am yemmü nyuhen. Ngei ammei SHEMBÜPA.”

⁶Üpaiyao laophülei shem am mü mükbongjuyung tedük. Ngeiyü SHEMBÜPA.

⁷Anyü mü mükbongjuyung dükpai ampa teveühü. Pinnyü-ü anyü; nüngi pinnyü mü mükbongjuyung tedük.

⁸Nüngi ampalei nyüha hük mao mükbongjuyung tedük; hapai ampa veü danghühen.

⁹Nüngi laophülei nyahinaü nevaijü nyü nevaijü pa mü jempü nyahinaü mü shemei bühpü vaijao lebülei bühpü vaijao mükbongjuyung tedük.

¹⁰Nüngi laophülei hüpeü mü mükbongjuyung tedük; hapai nüng veü danghen.

¹¹Nüngi ampai yahpü lebü nyüi bühpü yiükha mü mükbongjuyung tedük; mehenangkü pinnyüao nüngei nyahinaü khih.

¹²Nüngi anyei mü mükbongjuyung tedük; pinnyü-ü ampa mü jempü shem am nyüke.

¹³Nüngi anyülei nyahinaü mü mükbongjuyung tedük; mehenangkü pinnyü-ü anyü mü jempü shem am nyüke.

¹⁴Nüngi ampalei chehinaüthülei nyüha mü mükbongjuyung dükei ampa am teveühü; mehenangkü jomao anyünyü am nyüke.

¹⁵Nüngi hapeülei nyüha mü mükbongjuyung tedük; hapai jeihinaü veü danghühen.

¹⁶Nüngi anjeilei nyüha mü mükbongjuyung tedük; hapai nüngei anjei veühünyüke.

¹⁷Nüngi nyüha hük hatü pinnyülei cheha nyiphen mü mükbongjuyung tedük. Nüngi pinnyülei yeshangei yiükha nevaijü yiükhalei yiükha mü mükbongjuyung tedük; mehenangkü hathüyü nüngei iy hatü phai nyüke, hayü nejiüpü mang dou.

¹⁸Nüngei nyüha yemmü tuhtü anyühalei naüpeü shao nüngei nyüha vaishi teyah.

¹⁹Nyüha hük hangha tenpü hepak kü mükbongjuyung tedük.

²⁰Nüngei chingyowpalei nyüha mü mükbongjuyung dükei nüng nyingi mang tethah.

²¹Nüngi nüngei hapeüthü üpayao Molekh kahvang kü jakpü moila teshuoh; mehenangkü nüngi nüngei SHEMBÜPAlei men teten. Ngeiyü SHEMBÜPA.

²²Üpa bahaiyao nyüha mü kei lebü baha mü mükbongjuyung tedük; hapayü jiühitbenüng mang nyüke.

²³Üpa baha nevaijü nyühaiyao yemhimak mü mükbongjuyung tedük, hatü hapai nüng tenyethü. Nyingnyoi kü neshiüpü dou dükpai nüng jiühitbenüng telei.

²⁴Henüng keipü dou homei am nyingi nedaünelangi telei; mehenangkü henüng homei ngei am shekü changtükpü jatthü nedaünelangi leipeih.

²⁵Jomei douteni kahdokao nedaüi leihüpeih; hanangkü ngei jomei mang nangkü ngei jom kü hanghi shuohpeih, hatü kahdoki halei nyupüthü bhaitükpeih.

²⁶Shejao ammi ngelei shahkungnyüthü hatü ngei epü peü düktuh. Bühü vaituh, benha vaituh, am mü nyupü üpaiyao jiühitbenüng meheyao tedük;

²⁷mehenangkü henüng douthü kemei am shekü halei nyupüthüi dükteke, hatü kahdokao nedaüi leitükpeih.

²⁸Ammi hapa kahdok nyettükjema, am shekü jatthü bhaitükpükei amao haleipü bhaitükhen.

²⁹Üpai henüng keipü jiühitnalai dou dükhenshang, hapa shennyakü laophülei nanglakthü khong kübü katitükhen.

³⁰Am shekü nyupüthülei vanglem hatü jomi dükpükei jiühitnalaipü dou üpaiyao nedükhen shingvaishi ngelei shah ammi bangtuh, hatü hathüi am tenyethü. Ngeiyü SHEMBÜPA, ammei Kahvang.