Read Phom Naga LEVI 19 Bible Online

LEVI 19 - Phom Naga bible

LEVI 19

¹SHEMBÜPAi Mosa kü eteke,

²“Israel nanglak khong peü kü etuh. Am daülangi nyutuh; mehenangkü ngei, SHEMBÜPA, ammei Kahvangü daülangpü Kahvang.

³Am peüi laophülei nyü hatü pa kü dhüm shuohtuh, hatü Sabbath themtuh. Ngeiyü SHEMBÜPA, ammei Kahvang nyüke.”

⁴Ammi lajeithü philei telep nevaijü am nyingi am shing lajei kahvang teling. Ngeiyü SHEMBÜPA, ammei Kahvang nyüke.

⁵Mechem nüngi SHEMBÜPA kü mongjempü moila shuohhen, nüngei men kü hapayü yah-aoksham shuohtuh.

⁶Hapayü nüngi moilapü nyih nevaijü nyihphei thahshi hahkemhen; nyih jempabü thahshi lemhük-üng aojema aw kü jaktükhen vongbong.

⁷Haleipü lemhük-üng nyih jempabü kü hahjema, hayü nedaüpü vaihen, hatü hapa moila neyahhen.

⁸Üpai hapa hahhen hanghihühen; mehenangkü mehe SHEMBÜPA kü daülangpü nyüpa, ha nyettükteke, hatü hapa keipü shennyakü laophülei nanglak khong kübü katitükhen.

⁹Mechem ammei kah kübü hah vethen, dujung thah-ei tevet, nevaijü hahdhei tethai.

¹⁰Ammi nyalingngupai chaei tevaüm nevaijü vüdaipü nyalingngupai tehom; ammi taopathü hatü benhathü shingvaishi hathü tuhphongtuh. Ngeiyü SHEMBÜPA, ammei Kahvang.

¹¹Tegüh, tepeilei, shahshem te-e.

¹²Ammi shahshemi ammei Kahvang men tenei tevangteshuw. Ngeiyü SHEMBÜPA.

¹³Ammei chingyowpa kü telutelem nevaijü tegüh. Nepphei thahshi ammei kahlei nang shapü kü lat neshuoh-i tetuh.

¹⁴Dhaong aangdaipü shennyak kü tethaüvaü, nevaijü mükphüngpa kü huluh yaong tehaü; shejao ammei Kahvang kü nyemtuh. Ngeiyü SHEMBÜPA nyüke.

¹⁵Shahhingi shahshem teleihü; taopa kü baong hanei nevaijü longpü am kü hayaoha bamei teno, shejao shahhingi ammei chingyowpalei shahphentuh.

¹⁶Ammei nanglak khong kü shahshem langmaanei telongtei; chingyowpa lomohhütü nanglei danghen teyem. Ngeiyü SHEMBÜPA nyüke.

¹⁷Ammei jeihinaü üpa kao mongei jiühitei tedeih; nüngi chingyowpai pungpü kü neomhahen shingvaishi ngaihe-i loheishuoh.

¹⁸Ammi bhüh teyem, nevaijü laophülei nanglak hük eela-ei te-e, shejao nüngi laophü kü kei laophülei chingyowpa kü bamtuh. Ngeiyü SHEMBÜPA.

¹⁹Ngelei shahkungnyüthü noteituh. Ammi haümyem yah-ei lebü yemha mü tejemteihü. Ammei kah kü sheili lem nyi chemi teshei; nevaijü vilem laolao nyi yah-ei dakpü ashakviha te-ow.

²⁰Shennyak hük mih-i yahhen shei khampü nyüha aa hük shejao pinnyü angei nevaijü bümei leiyei mangyahpü mü mükbongjuyung dükjema, jijiphen hanghihühen shejao nejütükhen; mehenangkü pinnyü-ü aa nyüke,

²¹shejao hapa shennyaki büpa shing SHEMBÜPA kü pungpü moila shuohhen mi chebaongha hük ashakshem shadenei yah-ei peihen,

²²hatü ngongpai büpai thahpü mang tükhen shingvaishi SHEMBÜPA kü hapa pungpü moila mi shuohhen, hatü büpai thahpü mang tükhen.

²³Mechem am Kanan kahdokei leihen, hatü hahhen betjük vungjük sheihen, vangbong jem mongkü jükpü betjükü nedaüpü vaihen; hapa nehahhen vongbong.

²⁴Vangbong alipabü kü hapalei betjük kemei SHEMBÜPA, ngei kü ammi menvih shuoh-ei hapa daütükhen.

²⁵Shejao vangbong ngapabü kü ammi hapa betjük hahhen. Hapa keiha ammei betjük vungjük nyeinya jükhen. Ngeiyü SHEMBÜPA, ammei Kahvang.

²⁶Ammi iy kohshi mepa phai lemao tehah. Ammi phong teyomtei.

²⁷Ammi ammei sho tekup nevaijü jumum tekup.

²⁸Didaipü am nangkü ammei büm kü kaw teshahah, nevaijü am nyingi hüh tekaok. Ngeiyü SHEMBÜPA.

²⁹Ammi laophülei yiükha büm yupü am leihüei temangtük, hei vaijema kahdok kemei büm yupü am leihen, hatü nemeipai kahdok makahen.

³⁰Sabbath themtuh hatü ngelei khümshing dhüm kohshi noteituh. Ngeiyü SHEMBÜPA.

³¹Ammi yimpi laang mü shah eteipüthü nevaijü lashüh tetpüthü lemei tedai, hathü yemjema hathüi am mang thahhühen. Ngeiyü SHEMBÜPA, ammei Kahvang.

³²Viünyü viüpa kü sheühtuh; behe kü dhüm shuohtuh, hatü ammei Kahvang kü nyemtuh. Ngeiyü SHEMBÜPA.

³³Mechem ammei kahdokei ammei yenpa nyuhen, jom kü ne-ienelemi teno.

³⁴Jempü Israel jeihinaü kü kei notuh. Ammi laophü kü kei jom kü bamtuh; mehenangkü amphongü Ijip kahdokei benha vaihampeih. Ngeiyü SHEMBÜPA, ammei Kahvang.

³⁵Ammi bahiyang shetshingkü, dok dokshingkü, longpü maanpü jeshingkü shahshemi güh-ei tenotei.

³⁶Jiüshangpü lüngi shettuh, jiüshangpü dok noteituh. Ngeiyü SHEMBÜPA, ammei Kahvang, hatü ngei Ijip kahdok leipü am müei leipeih.

³⁷Ngei epü hatü ngelei shahkungnyüthü peü düktuh, hatü ha kü mütuh. Ngeiyü SHEMBÜPA.