Read Phom Naga LEVI 22 Bible Online

LEVI 22 - Phom Naga bible

LEVI 22

¹SHEMBÜPAi Mosa kü eteke,

²“Ngelei daülangpü men nenyethen shingvaishi Israel ami ngei kü daühüpü lanei shuohpü moilathü kü kenhingei dhüm kohshi notuh shei Aaron hatü chehathü kü eyeishuoh. Ngeiyü SHEMBÜPA.

³Hüdenhalenshi nüngei hühihathü khongkü hanei-i büpa nedaünelangpü hepak kü Israel ami SHEMBÜPA kü daühüpü lanei shuohpü moila koei peipü yopailei büpa peijema, hapa shennyakü ngei toueipü katitükhen. Ngeiyü SHEMBÜPA.”

⁴Aaronei hühiha hanei kü ngomdin nyujema, nevaijü hangyung vamjema, büpa mangdaütük thahshi daülangpü moila kübü hahying nehahhen. Üpa ngongpai mahng nevaijü hangyung vampü shennyaki hongtü nyettükpü dou kü honghenshang,

⁵nevaijü üpai nedaüpü yem nevaijü shennyak mepai büpa nedaü-i leihünya, ha kü honghenshang, büpa nedaüpü leihen.

⁶Üpai henüng homei nedaüpü leinya, büpa om dhüshi nedaüpü leihen, hatü büpa hangha manglak thahshi daülangpü moila kübü nehahhen.

⁷Vanghe shüpheikü büpa daühühen, hatü hapheikü büpai daülangpü moila kübü hahying hahhen aok; mehenangkü hapayü büpalei hahying nyüke.

⁸Meishi dipü nevaijü shahhishuwi hahpü yemhalei phai nehahhen; hapai büpa nedaüpü leihen. Ngeiyü SHEMBÜPA.

⁹Jomi ngelei shahkungnyü mangpü nangkü mang thah-ei nedihen shingvaishi ngongpathü peüi ngelei shahkung noteihen. Ngeiyü hapa daühüpü SHEMBÜPA.

¹⁰Ngongpalei shem am nevaipheikü yenpa vaijao nevaijü nang shanpü shennyak vaijao hapa daülangpü moila nehahhen.

¹¹Shejao ngongpai lop shuohtü shakpü aa nevaijü jomei shemei bühpü aathüi hapa hahying hahhen aok.

¹²Ngongpalei yiükha hüki ngongpa nevaipü shennyak mü shem yemjema, pinnyüi hapa daülangpü moila kübü hahying nehahhen,

¹³shejao ngongpalei yiükha vaümnyü vaijema, nevaijü baha mü yandaijema, hatü pinnyü nela hepak kü kei chepalei shemei nyuhen nyokei leidaijema, pinnyüi chepalei hahying hahhen aok.

¹⁴Ngongpalei shem am nevaijü shennyak hüki pungei daülangpü hahying hahjema, büpai hahtükpü hahying phaihan nga kü hük ütü ngongpa kü shemhen vongbong.

¹⁵Israel nanglakthüi SHEMBÜPA kü shuohpü daülangpü moila,

¹⁶hahhen nejiüpü shennyak kü üh-ei üpa ngongpaiyao jom mang thahhüei jom hang shemhen mü nedaünelangi leihühen neaok. Ngeiyü hapa daühüpü SHEMBÜPA.

¹⁷SHEMBÜPAi Mosa kü,

¹⁸“Aaron, chehathü hatü Israel am peü kü hapakei eyeishuoh” shei eteke. Mechem Israel am nevaijü Israel kahdokei nyupü benha hanei jakpü moila büpai vangpü jiühüei nevaijü mongongpü moila shuohhenshang,

¹⁹nüngei men kü yah-aoksham mohoh, mi nevaijü yum chebaong kawhikang neshiüpü shuohhen vongbong.

²⁰Ammi kawhikang kohpü yem shuohjema, hapayü neyahhen.

²¹Mechem shennyak hanei-i vangpü kü jiühüei mongongpü moila mohoh nevaijü mi SHEMBÜPA kü mongjempü moila shuohhenshang, hapayü yah-aokhen mü kawhikang nevaijü eela neshiüpü shuohhen vongbong.

²²SHEMBÜPA kü mükphüngdaipü, kaw kohdaipü, lakhodaipü, ma kohpü, shuw phaüdaipü nevaijü jüklük kohpü yemhimak teshuoh. Henüng keipü mepa yemhayao SHEMBÜPA kü moidü shangei aw kü jakei teshuoh.

²³Nüngi mongjempü moila shingvaishi mohoh nevaijü mi dhaoklu vaunglongjao shuohhen aok, shejao vangpüshuwpü nangkü henüng keipü neyahhen.

²⁴Ammi SHEMBÜPA kü ban tüktükpü, dhüngtükpü, shaaktükpü nevaijü vettükpü yem yah-ei moila neshuohhen. Ammei kahdokei ammi hapa nedükhen,

²⁵hatü ammi hapa keipü yemha kungpalei lak leipü yah-ei Kahvang kü hahying moila neshuohhen. Dhaok-ai vaung-ai nejiüpü nangkü hapayü neyahhen.

²⁶SHEMBÜPAi Mosa kü eteke,

²⁷“Mechem mohoh, mi nevaijü yum cheha shaanhenshang, hapa nyih nyet thahshi chenyü mü anghen. Nyih shetpabü kü pangei SHEMBÜPA kü aw kü jakpü moila vaishi yah-aokhen.

²⁸Mohoh vaijao mi vaijao nevaijü yum vaijao chenyü hi cheha chemi nyihcha hük kü jakpü moila teshuoh.

²⁹Mechem ammi SHEMBÜPA kü menvih moila shuohhenshang, hapayü yah-aokhen mü vanglem kü jiüshi moilatuh.

³⁰Hapayü ha nyih-üng hahkemhen vongbong; nepphei thahshi meheyao aoei tetuh. Ngeiyü SHEMBÜPA.”

³¹Ngelei shahkungnyüthü düktuh, hatü ha kü mütuh. Ngeiyü SHEMBÜPA.

³²Ngelei daülangpü men tetenhü. Israel am peüi ngeiyü daülangpü shei nyingtuh. Ngeiyü am daühüpü SHEMBÜPA,

³³hatü ammei Kahvang vaihen shingvaishi ngei am Ijip leipü müei leipeih. Ngeiyü SHEMBÜPA.