Read Phom Naga LEVI 23 Bible Online

LEVI 23 - Phom Naga bible

LEVI 23

¹SHEMBÜPAi Mosa kü eteke,

²“Israel am kü hapakei eyeishuoh: Hathüyü ngei jepü mohitap nyüke; hapayü SHEMBÜPAi jepü mohitap ammi daülangpüthü thaipüyupü shei baonghen nyüke.”

³Ammi nyih vok dou dükhen, shejao nyih nyetpabüyü nyiumeipü Sabbath nyih nyüke. Ha nyih dou nedükhen shejao khümnüng thaihen. Am melei nyuhenshang nyujao dou nedükhen; Sabbath nyih-ü SHEMBÜPAlei nyüke.

⁴Hathüyü SHEMBÜPAi jepü mohitap, hathü mohen itpü hepak kü thaiyei mohen nyüke.

⁵Shongpü len nyih anpüalipabü vanghe shüpü mü jemi SHEMBÜPAlei Hompü Mo chongpanghen.

⁶Hapa len nyih anpüngapabü kü SHEMBÜPAlei daw neshihpü aan hahhen.

⁷Shongpü nyih kü am peü khümnüng thaihen, hatü nyingnyoi dou nedükhen.

⁸Nyih nyet thahshi SHEMBÜPA kü aw kü jakpü moila shuohtuh, hatü nyih nyetpabü kü am khümnüng thaituh, hatü nyingnyoi dou nedükhen.

⁹SHEMBÜPAi Mosa kü,

¹⁰“Israel am kü hapakei eyeishuoh” shei eteke. Mechem ngei am kü shuohhen shei epü kahdokei am shühenshang, hatü ammi betjükvungjük thaihenshang, ammi thaipü shongpü betjük kübü ngongpa kü choung hük shuohtuh.

¹¹Ngongpai SHEMBÜPA kü hayaoha moila shuohhen, hatü ha ammei men kü yahhen; ngongpai hapa Sabbath nyihphei shuohhen.

¹²Ammi hapa sheili moila shuohpü nyih, kawhikang neshiüpü bong hük lompü mi cheha yah-ei SHEMBÜPA kü jakpü moila shuohtuh.

¹³Hamü chemi ammi atta dok nyi olive mainga mü nyettü hahying moila SHEMBÜPA kü aw kü jakpü vong meipü moila shuohtuh; hatü hamü chemi ammi yiü moila liter hük shuohtuh.

¹⁴Ammei Kahvang kü ha nyih moila koei mangpei thahshi ammi hapa hahying thüngmü nevaijü aan ngouei nehahhen.

¹⁵Ammi SHEMBÜPA kü moila hahchoung koei peipü Sabbath nyihphei kübü pangei hatyang nyet ittuh.

¹⁶Sabbath nyetpa thempheikü nyih pinyipüanpabü kü SHEMBÜPA kü sheilivungla ja moilatuh.

¹⁷Shemong peüi aan pha nyi yah-ei peiyei SHEMBÜPA kü hayaoha moila shuohtuh. Aan nyiphen atta dok nyi baong yah-ei daw shihtü lingei SHEMBÜPA kü shongpü sheilivungla moila shuohtuh.

¹⁸Hapa aan mü mi cheha nyet, mohoh chebaongha hük hatü mi chebaongha nyi, hathü kemei bong hük lompü, hatü kawhikang neshiüpü yah-ei peiyei moilatuh. Hathüyü SHEMBÜPA kü jakpü moila shuohhen, ha mü chemi hahying moila hatü yiü moila shuohhen. Hayü SHEMBÜPA kü vong meipü aw kü jakpü moila nyüke.

¹⁹Shao ammi yum chebaong hük yah-ei mang moila, hatü bong hükbaong lompü mi chebaongha yah-ei mongjempü moila shuohtuh.

²⁰Ngongpai hapa aan mü mi cheha nyi yah-ei SHEMBÜPA kü hayaoha thintho moila shuohhen. Hapayü ngongpathü shingvaishi SHEMBÜPA kü daülangpü moila nyüke.

²¹Hapa nyi-üng ammi khümhen thaituh shejao nyingnyoi kü kei dou tedük. Am melei nyuhenshang, hapayü ami hüdenhalenshi noteihen shahkungnyü nyüke.

²²Mechem ammi hah vethenshang dujung thahshi tevet, nevaijü hahdhei teyem. Hathüyü taopathü hatü benhathü shingvaishi tuhphongtuh. Ngeiyü SHEMBÜPA, ammei Kahvang.

²³SHEMBÜPAi Mosa kü,

²⁴“Israel am kü, lenyang nyetpabü shongpü nyih kü, ammi nyiumeipü nyih hük themhen, hatü mechem amit vüngkahen, khümnüng thaihen.

²⁵SHEMBÜPA kü hahying moila jakei shuohhen, hatü hah nyih nyingnyoi kü kei dou nedükhen etuh” shei e.

²⁶SHEMBÜPAi Mosa kü eteke,

²⁷Lenyang nyetpabü nyih anpabüyü mang tükpü moila shuohpü nyih nyüke. Hapa nyih shüaeiyungleyei khümnüng thaituh, hatü SHEMBÜPA kü aw kü jakei moila shuohtuh.

²⁸Hapa nyih ammi dou tedük; mehenangkü hapa nyih-ü SHEMBÜPA, ammei Kahvang touei ammei mang daütükhen shingvaishi mang daütükpü moila shuohpü nyih nyüke.

²⁹Üpai hapa nyih shüaeiyungleyei nethemhen, büpayü laophülei nanglak khong kübü katitükhen.

³⁰Hapa nyih üpai dou dükhenshang, SHEMBÜPAi hapa shennyak laophülei nanglak khong kübü jütükhen.

³¹Ammi ha nyih dou nedükhen. Am melei melei nyuhenshang, hapayü hüdenhalenshi noteihen shahkungnyü nyüke.

³²Hapayü am shing nyiumeihen Sabbath nyih, hatü ha nyih nehahneyingi themhen. Hapa len nyih shüpabü om kübü nyihphei om dhüshi ammi Sabbath themhen.

³³SHEMBÜPAi Mosa kü,

³⁴“Israel am kü etuh” shei eteke: Lenyang nyetpabü nyih anpüngapabü kü SHEMBÜPAlei Ashakshem Mo chongpanghen, hatü hapa nyih nyet thahshi mohen.

³⁵Shongpü nyih-ü khümpü nyih vaihen, hatü nyingnyoi kü kei dou nedükhen.

³⁶Nyih nyet mong aa kü SHEMBÜPA kü aw kü jakei moila shuohhen; nyih shetpabü kü am peü khümnüng thaihen hatü SHEMBÜPA kü jakei moila shuohhen. Hapayü khümpü nyih hatü ammi dou nedükhen.

³⁷Hathüyü SHEMBÜPAi am kü shuohpü mohitap nyüke, hatü ha hepak kü ammi chemi thaiyei khümhen, hatü nyih itpü aimü jakpü moila, hahying moila, sheili moila hatü yiü moila shuohhen.

³⁸Hathü moilayü SHEMBÜPAlei Sabbath nyih kü, ammei thinthothü kü, ammi vangpü moilathü kü, hatü SHEMBÜPA kü ammi mongongpü moila shuohpü kü ü-ei shuohpü nyüke.

³⁹Mechem ammi ammei hah vetei temhenshang, lenyang nyetpabü nyih anpüngapabü kü pangei hapa mo mohen. Shongpü hatü shetpabü nyih-ü hayaoha nyiumeipü nyih vaihen.

⁴⁰Hapa shongpü nyih kü ammi betjük pü kübü meipü betjük vaümhen, melah hatü log phenlak dakei, phenlak ngetpü pükao dakei, hatü yaongnyim pünyim bhiyei ow lingtü nyih nyet SHEMBÜPA, ammei Kahvang tou kü ammi mongongmonglehen.

⁴¹SHEMBÜPA kü hapa mo bong ieyei nyih nyet lenyang nyetpabü kü motuh. Hapa shahkung hüdenhalenshi ammi noteihen.

⁴²Israel am kemei ashakshemei nyih nyet themhen,

⁴³shejüang ammei hühihathü mechem ngei Ijip kahdok leipü Israel hapeüthü müei leipa, jomphongü ashakshemei nyuhampü khih shei nyinghen. Ngeiyü SHEMBÜPA, ammei Kahvang.

⁴⁴Hapakei Mosai Israel am kü SHEMBÜPAi shuohpü mohitapthü nang kü shahkung shuohteke.