Read Phom Naga LEVI 24 Bible Online

LEVI 24 - Phom Naga bible

LEVI 24

¹SHEMBÜPAi Mosa kü,

²“Israel nanglakthü kü awdük nemeti düngei bah-ei nyuhen shingvaishi olive kübü ngümpü daülangpü mainga nüng touei yah-ei peihen ngeükhüam shuohtuh” shei e.

³Longi Daülangpü Shing leipü Vangpüshuwpü Pela touei haenpü ashak haophilei Aaroni yajeih om kübü nepnüng dhom ngoishi bah-ei nyuhen shingvaishi awdük jakhen. Hapa shahkungnyü hüdenhalenshi noteihen.

⁴SHEMBÜPA tou kü düngei büpai awdük honi lingpü awshong shangkü haühen.

⁵Meipü atta yah-ei aan anpünyi lingtuh.

⁶Honi lingpü haüdü shangkü hapa aan vok baong lüng nyi lingei haütuh.

⁷SHEMBÜPA kü jakpü moila aan nyangeihepü vaihen shingvaishi lüng ieyei kü ayingshü shihtuh.

⁸Israel am men kü denden vangpüshuwpü tuhhen shingvaishi Sabbath ieyei kü SHEMBÜPA tou kü hapa aan tuhtuh.

⁹Hapayü Aaron hatü chehathü shing nyüke; jomi hapayü Longi Daülangpü Shingei hahhen; mehenangkü hapayü longi daülangpü SHEMBÜPA kü jakpü moila kübü jomei düngeipü phaihan nyüke.

¹⁰Shaang shennyak hük chepayü Ijip am, hatü chenyü-ü Israel am Dan phang kübü Dibrilei yiükha Shelomith nyuteke. Hapa shennyaki baümtap mongei Israel am hük mü deteke.

¹¹Depü hepak kü hapa shennyaki Kahvangei men thaüvaüteke. Hanangkü jomi hapa shennyak Mosa touei müei dei,

¹²hatü büpa khoklatei tuh, hatü büpa kü mehe dükhen SHEMBÜPAi mongpü danei nyuteke.

¹³SHEMBÜPAi Mosa kü,

¹⁴“Hapa shennyak baümtap haolei yah-ei deituh. Üami büpa thaüvaüpü danpa, hathüi büpalei shangjing kü laki düktuh, hatü Israel am khongi yaongi shükei jütuh” shei eteke.

¹⁵Israel am üpai Kahvang kü thaüvaühenshang, büpai ha mang kohen,

¹⁶hatü üpai SHEMBÜPAlei men thaüvaühenshang jütükhen; khong kemei-i büpa kü yaongi shükhen. Bühü vaijao benha vaijao Israel kü nyupü üpai SHEMBÜPA kü thaüvaühen, khongi yaongi shükei jütükhen.

¹⁷Shennyak hanei-i hangku sho mahtükjema, büpa-ao jütükhen.

¹⁸Shennyak hanei-i mih-ei yemhimak jütükjema yem kü yem jeiyei shuohhen vongbong.

¹⁹Shennyak hanei-i mih kü iy-aongmashajema, büpai mehe mih kü dük, ha aihük büpa kao khanghen;

²⁰bhagpü kü bhagei, mük kü mük jei, bha kü bha jeiyei dükhen. Büpai mih kü ma shapükei büpakao ma shahühen.

²¹Üpai yemhimak jütükhenshang, ha kü shemhen, shejao üpai shennyak jühenshang, büpayao jütükhen.

²²Hapa shahkungü Israel am vaijao, benha shennyak vaijao aihük mü shashi nyüke.

²³Mechem Mosai Israel am kü ha epa, jomi thaüvaüpü shennyak baümtap haolei müei deiyei yaongi shükei jü. SHEMBÜPAi Mosa kü epükei Israel ami dükteke.