Read Phom Naga LEVI 26 Bible Online

LEVI 26 - Phom Naga bible

LEVI 26

¹SHEMBÜPAi eteke, “Ammi am shingvaishi yaongnaüya nevaijü lajei, nevaijü daülangpü yaongthü nevaijü ammei kahdokei shangpü yaongthü khümhen teling. Ngeiyü SHEMBÜPA, ammei Kahvang.”

²Sabbath themtuh, hatü ngei khümshing kü dhüm shuohtuh. Ngeiyü SHEMBÜPA.

³Ammi ngelei shahkungnyü aimü nyujema, hatü ngei epü ven bangjema,

⁴ngei hepak vangpan jiüshi vang shomhen, hatü kahdoki sheili vamhühen, hatü kah kübü betjük püthüi betjük jükkahen.

⁵Nyalingngupai vaümhen hepak thahshi am hah vetpü nedoh-i nyuhen, hatü hah sheipü hepak thahshi nyalingngupai vaümpü nedoh-i nyuhen, hatü ammi hahhüpü hahying lemphüli hahhen; ammei kahdok chingmei nyiushemmei kü nyuhen.

⁶Ngei ammei kahdok kü chingmeivangmei shuohhen hatü am lakbowlayangei nyuhen; üpaiyao am nenyemhühen: Ngei kahdok kübü meishih nyahmang nüngtükhen hatü ammei kahdok kü vehok nevamhühen.

⁷Ammei vepathü kü changhen hatü ammei yannah-i jom mahhühen.

⁸Am shennyak pa nga-i kho hük kü changhen; hatü am shennyak kho hüki haja an kü changhen; ammei vepathü ammei yannah kü mahhühen.

⁹Ngei am kü shinshangei veihen hatü am betjük jükhühen hatü am nanglak dahühen, hatü ngei am mü vangpüshuwpü dükhen.

¹⁰Ammi shongpü hahchang nedoh-i hahhen, hatü ja tuhhen shingvaishi chang nüngtükhen.

¹¹Ngei am mü nyushing lingei nyuhen, hatü ngei am netuhphonghen.

¹²Ngei am mü kamteihen, hatü ammei Kahvang vaihen hatü amphongü ngelei nanglak vaihen.

¹³Am hajük kü Ijip amei aa nevaihen shingvaishi am Ijip leipü müei leipü ngei SHEMBÜPA, ammei Kahvang; ngei am kü chetpü pang mangtüktü am she ngangshi kamhüpeih.

¹⁴Shejao ammi ngei epü nebang, hatü kangpü nedükjema,

¹⁵hatü ngelei shahkungnyüthü hatü ngei kangpüthü nedükjema, hatü ngei am mü lingpü vangpüshuwpü mangtükjema,

¹⁶ngei am kü hapakei dükhen: Ngei am kü nyempühanpü, nemeiaokbenüng dinten, pheühileü homei mükhina tenei yangnyu lomohhen koei peikahen; ammi sheipü sheili angsha vaitükhen; mehenangkü ammei vepathüi hapa hahtükhen.

¹⁷Ngelei dhe am khüei yaakshingkü ammei vepathüi am neütükhen; ammi jiühitpüthüi am shak kü vanglem lemhen, hatü am kü üpaiyao nechangpü kü am nyemei nyaihen.

¹⁸Hathü peü dükphei küong, ammi ngei epü nebangjema, ngei ammei mang shingvaishi shao shing nyet nyeinya hanghihühen.

¹⁹Ngei am changmeipü mangtükhen, vang nekeihühen hatü ammei kahdok vantükhen, hatü nyiam kei vaanshi leitükhen.

²⁰Nanglei neshiüpü kü ammei wong tükhen; ammei kahdoki sheili nekohhühen, nevaijü kahdok kübü püthüi betjük nejükhühen.

²¹Ammi ngei mü ve sheüsheü shei nyujema, hatü ngei epü nebangjema, ngei am kü hanghi shao shing nyet nyeihühen.

²²Ngei am touei meishih nyahmang shuohhen, hatü ammei hapeüthü hatü yemhimakthü hahtükhen, hatü am nanglak ajüki mon leihühen,

²³Hathü peü dükphei küong, ammi ngei touei nyokei neleijema, hatü nedoh-i ngei mü ve sheüsheü shei nyujema,

²⁴ngei am khüei yaonghen hatü ammei mang shingvaishi shao shing nyet nyeishi hanghihühen.

²⁵Vangpüshuwpü mangtükpü shingvaishi bhüh hahhen ngei vehok koei peikahen, hatü ammei chingnyüthü mongei yanglem yemei thaiyei küpshi nyulangmao ngei am touei nemeiaokbenüng dinten shuohhen, hatü ammei vepathülei lak kü lanei shuohtükhen.

²⁶Mechem ngei ammei mophimo lem dohtükhen, nyüha ani jomei lakei nyupü hahying dük hük kü cheühen, hatü jomi hapa demei hanei shuohhen, hatü ammi hapa hahjao, shao-üng am aeipü nemeihen.

²⁷Shejao hathü peü dükphei küong ammi ngei epü nebangjema, hatü ngei mü ve sheüsheü shei nyujema,

²⁸ngei mongshih anei am khüei yaonghen, hatü ammei mang shingvaishi shao shing nyet nyeinya hanghi shuohhen.

²⁹Ammi laophülei yeshang hatü yiükhathü jüei jomei phai hahhen.

³⁰Ngei ammei khümshingthü mangtükhen, ammi ayingshü jakteipü moidüthü bentükhen, hatü ammei mahng doei nyupü lajeithü shangkü shükphonghen. Ngei am yakphonghen.

³¹Ngei ammei chingnyü mangtükhen; ammei khümshing lavüngtoiyei tuhphonghen, hatü ammei vong meipü moila ngei neyahhen.

³²Ngei ammei kahdok chemjalak kü mangtükpü eeyei ammei kahdokei nyunüng peipü vepathüi hapa kü yashanhen.

³³Ngei mih jatthü touei am haitükhen, hatü am khüei yan nohen, hatü am kü changhen; ammei kahdok hatü chingnyüthü lavüngtoiyei leitükhen.

³⁴Shejüang, am vepathülei kahdokei yandaipü mong aa kü kahdokü Sabbath vangbong kei nyuhen, hatü Sabbath vangbongthü kei nyiumeihen; am nyupü hepak kü nyupü Sabbath kü nenyupü nyiumei danghen.

³⁵Hapa kahdok lavüngtoiyei nyupü thahshi am nyuyang kü chemao nyiunemeipü nyiushemmei hapa kahdoki danghen.

³⁶Üam wüpküpei nyu, hathülei mongdang phenhavunglak kü vanglük lükpü ngeü kü nyemei jomei mong nyemhühen, hatü jom nyaihühen. Jom kü üpaiyao nechangpü kü vepa toueipü nyaipükei nyaihen, hatü jom dohen.

³⁷Üpaiyao jom kü nechangchangi vepa toueipü nyaipükei hüki hük kü huluh shuohyaki nyaihen; hatü vepathü khüei yaongaokhen mü wong neshiüi leidaihen.

³⁸Am wüpküpei nyuei dikümhen; ammei vepathülei kahdoki am lühtükhen.

³⁹Ammei vepa kahdokei am hanei yangei nyupüthüao ammei mang hatü ambü ampai thahpü mang nang kü lomohhühen.

⁴⁰Shejao jomi jomei mang, chebü chepathülei mang; ngei khüei hatü ngei mü ve sheüsheü shei nyupü mang;

⁴¹mepai ngei jomei vepathülei kahdokei deishihhen mü ngei khüei thahpü mang lahjema, hatü mechem jomei nejaptükpü thentoimongdang ineinyaiyei leihenshang, hatü jomei mang kübü yeiyahenshang,

⁴²shejüang ngei Jakob mü vangeishuwpü deih-ei danghen, hatü Isak mü hatü Abraham mü ngei vangteishuwteipü deih-ei danghen, hatü ngei jom kü shuohhen lahpü kahdok deih-ei danghen.

⁴³Mehenangkü shongei jomi hapa kahdok tuhphonghen hatü jom neshiüi hapa kahdok lavüngtoiyei nyupü thahshi nyiumeihen. Ngelei shahkungnyüthü hatü ngei epü yakphongpü nangkü jomi hapa hang shemhen vongbong.

⁴⁴Shejao jom vepa kahdokei nyujoong ngei jom mü vangteipü mangei chemjalak kü netuhphonghen, hatü nemahtükhen; mehenangkü ngeiyü SHEMBÜPA, jomei Kahvang.

⁴⁵Ngei jomei Kahvang vaihen shingvaishi ngei jatthüi eeshi Ijip kahdok leipü jomei chebü chepa mü vangteipü ngei jom kü phahjiei deih-ei danghen. Ngeiyü SHEMBÜPA.

⁴⁶Hathüyü SHEMBÜPAi büpa hatü nanglakthü aa kü Mosa homei Sinai Kahshangei shuohpü shahkungnyüthü hatü kangpü nyüke.