Read Phom Naga LEVI 3 Bible Online

LEVI 3 - Phom Naga bible

LEVI 3

¹Shennyak hanei-i laophülei haümyem yah-ei mongjempü moila shuohjema, hapayü mohoh chebaong nevaijü chenyü meheyao kawhikang neshiüpü shuohhen vongbong.

²Moila shuohbüi hapa moilapü yemhalei shangjing kü büpalei laki düktü ashakshem shadenei jütuh, hatü Aaronei hapeü ngongpathüi hapalei iy yah-ei moidü shinei haihütuh.

³Hapa mongjempü moila kübü büpai SHEMBÜPA kü aw kü jakpü moila kohen: thenleimongphang kü jümpü cheü kemei, hatü ha kü shenpü kemei,

⁴she nyi mü haleipü cheü, hatü dhen kübü cheü she mü omei vetei shuohtuh.

⁵Hapayü Aaronei chehathüi jakpü moila mü moidü shangei aw bahpü pü shangkü jakhütuh. Hapayü SHEMBÜPA kü vong meipü aw kü jakpü moila nyüke.

⁶Shennyak hanei-i laophülei mi khong kübü SHEMBÜPA kü mongjempü moila shuohjema, hapayü mi chenyü nevaijü chebaong meheyao kawhikang neshiüpü shuohhen vongbong.

⁷Büpai mi cheha moilajema, büpai hapa SHEMBÜPA kü shuohhen vongbong.

⁸Büpai hapa moilapü milei shangjing kü laki düktü ashakshemei jütuh, hatü Aaronei chehathüi hapalei iy yah-ei moidü shinei haihütuh.

⁹Hapa mongjempü moila kübü büpai SHEMBÜPA kü aw kü jakpü moila kohen: hapalei cheü, dokvang kü jümpü cheü kemei nyiukei, thenleimongphang kü jümpü cheü, hatü hathü kü shenpü kemei,

¹⁰she nyi mü haleipü cheü hatü dhen kübü cheü she mü omei vetei shuohtuh,

¹¹hatü ngongpai hapa hahying moilayü moidü shangei SHEMBÜPA kü aw kü jakei moilatuh.

¹²Shennyak hanei-i yum moila shuohjema, büpai hapa SHEMBÜPA tou kü koei peituh,

¹³hatü büpai hapa moilapü yum shangjing kü laki düktü ashakshem shemshelei jütuh, hatü Aaronei chehathüi hapalei iy yah-ei moidü shinei haihütuh,

¹⁴hatü büpai moilapü kübü büpai SHEMBÜPA kü aw kü jakpü hathü moila shuohtuh: thenleimongphang kübü cheü kemei,

¹⁵she nyi mü haleipü cheü, hatü dhen kübü cheü she mü omei vetei shuohtuh.

¹⁶Ngongpai hathü moidü shangei hahying moila SHEMBÜPA kü aw kü jakei vong meipü moila shuohhen. Cheü kemei SHEMBÜPAlei nyüke.

¹⁷Am nyushing peülei hapayü hüdenhalenshi nedohneteni nohen shahkungnyü nyüke. Ammi cheü nevaijü iy meheyao nehahhen.