Read Phom Naga LEVI 5 Bible Online

LEVI 5 - Phom Naga bible

LEVI 5

¹Shennyak hanei-i büpai epü hatü danpü jung lemhük nangkü nanglak touei denpü shuohhen nyükshingkü büpalei ju kübü shah nevampü nangkü mang thahjema, hapa hanggovih büpa shak kü nyuhen.

²Shennyak hanei nenyingi nedaüpü doulem hanei kü, nedaüpü phaüyem mahng vaituh nevaijü nedaüpü kahdokei kamteipü yemhamakha vaituh büpai hongjema, büpa nedaüpü, hatü pungpü nyüke.

³Nevaijü shennyak hanei-i hangkulei büm kübü vampü nedaübenüng mepai shennyak nedaüi leihünya, ha kü nenyingi hongjema, mechem ha nyingei peihen, büpa pungpü nyüke.

⁴Nevaijü shennyak hanei-i deih-ei nedangi nemeituh meituh vangjema mehe shingvaishi vaituh vaijao baongnedangi vangjema, büpai ha deih-eileyei nepeijao mechem büpai ha nyinghenshang, büpa pungpü nyüke.

⁵Mechem shennyak hanei-i hathü khongkü hük kü dangkao shaihenshang, büpai mepa lem kü pungpa, ha mang lahhen vongbong,

⁶hatü büpalei mang nangkü manglat mi nevaijü yum chebi yah-ei SHEMBÜPA kü mang moila shuohhen vongbong. Büpalei mang shingvaishi ngongpai jakpü moila shuohhen.

⁷Büpai mi nevaijü yum neshuoh-aokjema, büpai thahpü mang shingvaishi SHEMBÜPA touei athuba nyi nevaijü khakhi ou nyi koei peihen, hatü mang moila shuohhen, hatü hükpayü jakpü moila shuohhen.

⁸Büpai hathü kemei ngongpa touei yah-ei peihen; büpai shongei hük yah-ei mang moila shuohhen. Büpai hapalei üng kü vethen shejao chemjalak kü nephentükhen,

⁹hatü mang moila kübü iy hanei moidü touei haihen; aopü iy kemei moidü chongei yenhühen vongbong. Hapayü mang moila nyüke.

¹⁰Ngongpai hükpa yah-ei shuohteipü vanglem aimü jakpü moila shuohhen. Hapa keiha ngongpai büpai thahpü mang shingvaishi jakpü moila shuohhen, hatü büpalei mang tükhen.

¹¹Büpai athuba nyi nevaijü khakhi ou nyi neshuoh-aokjema, büpai atta dok hük laophülei mang shingvaishi mang moila koei peihen. Büpai hapa kü olive mainga nevaijü ayingshü neshihhen; mehenangkü hapayü mang moila nyüke.

¹²Büpai hapayü ngongpa touei koei peihen, hatü ngongpai haleipü kean vaishi maoh-ei yahhen hatü moidü shangei SHEMBÜPA kü aw kü jakei shuohpü moila shangei haütü jakhen. Hapayü mang moila nyüke.

¹³Hapa keiha büpai thahpü mang lemphü shingvaishi ngongpai jakpü moila shuohhen, hatü büpalei mang tükhen. Hahying moila kü keiha aopü moila kemei ngongpa shing vaihen.

¹⁴SHEMBÜPAi Mosa kü eteke:

¹⁵“Mechem shennyak hanei-i punghen, hatü SHEMBÜPAlei daülangpü dou kü lemhük kü dangkao nenyingi mang thahhenshang, büpai SHEMBÜPA kü manglat mi chebaongha hük mi khong kübü kawhikang neshiüpü koei peihen, hatü phopshemei dokteipü dok aimü ngin koei peihen. Hapayü pungpü moila nyüke.

¹⁶Büpai daülangpü douthü nedükaoki shaitükpü shingvaishi manglat phaihan kukha ütü hathü kemei ngongpa kü shuohhen, hatü ngongpai hapa shennyakei mang shingvaishi mi chebaongha hük jakpü moila shuohhen, hatü büpalei mang tükhen.”

¹⁷Shennyak hanei-i nenyingi SHEMBÜPAlei shahkungnyü kü nemongpü lemhük dangkao dükei mang thahjema, büpa pungteke, hatü hanghihühen shangteke.

¹⁸Büpai mi khong kübü mi chebaongha hük kawhikang neshiüpü nevaijü hapalei aihük bhei ngongpa touei pungpü moila koei peihen. Hapa keiha büpai nenyingi pungtükpü mang shingvaishi ngongpai büpa shing jakpü moila shuohhen, hatü büpalei mang tükhen.

¹⁹Büpai SHEMBÜPA khüei nejiüi pungei dükpü nangkü hapayü pungpü moila nyüke.