Read Phom Naga LEVI 9 Bible Online

LEVI 9 - Phom Naga bible

LEVI 9

¹Nyih shetpabü kü Mosai Aaron, chehathü hatü Israel kü behethü peü nyük.

²Büpai Aaron kü, “Nüngei mang moila shuohhen mohoh chebaongha hük hatü jakpü moila shuohhen mi chebaongha hük kawhikang neshiüpü yahtuh, hatü SHEMBÜPA kü hathü shuohtuh.

³Hatü Israel am kü, ‘Mang moila shuohhen yumbaong hük; jakpü moila shuohhen kawhikang neshiüpü bong hük lompü mohoh baongha hük, hatü mi chebaongha hük;

⁴hatü mongjempü moila shuohhen mohohbaong hük, hatü mi chebaongha hük, hatü mainga mü nyetpü hahying moila SHEMBÜPA kü shuohhen yahtuh’ shei eyeishuoh. Mehenangkü shinnyih am touei SHEMBÜPA shakei vamkahen” shei eteke.

⁵Jomi Mosai epü douthü kemei ashakshem shemshelei yah-ei pei, hatü khong kemei yopailei peiyei SHEMBÜPA tou kü yaong.

⁶Hahepak kü Mosai, “Amphong touei SHEMBÜPAlei müknyinshekhang vamkahen shingvaishi SHEMBÜPAi am kü hapa düktuh shei epeih” shei e.

⁷Hatü Mosai Aaron kü, “Moidü yopailei heihkei, hatü nüngei mang moila hatü jakpü moila, nüng hatü nanglakthülei mang tükhen shingvaishi hapa moilatuh; SHEMBÜPAi epükei nanglakthü kü mang tükhen shingvaishi jakpü moila shuohtuh” shei e.

⁸Hanangkü Aaron moidü yopailei heih-ei büpa shingvaishi mang moila shuohhen mohoh chebaongha jü.

⁹Büpalei chehathüi büpa touei iy yah-ei heih, hatü büpai ha kü büpalei lakjaang hüngtü moidü leipü vaung kü nyioteke, hatü aopü iy kemei büpai moidü chongei haiteke.

¹⁰Hatü büpai mang moila kübü cheü, she hatü dhen kü jümpü cheü kemei SHEMBÜPAi Mosa kü epükei moidü shangei jakteke.

¹¹Shejao büpai phai hatü shuw baümtap haolei deiyei jaktük.

¹²Hapheikü büpai büpa shing jakpü moila shuohhen yem jü. Büpalei chehathüi iy yah-ei heih, hatü büpai moidü shinei ha hai.

¹³Jomi büpa kü shangjing omei heanlem laolao nyingei shuoh, hatü büpai hathü moidülei jak.

¹⁴Büpai thenleimongphang hatü lakhila paütüktü moidülei jakpü moila shangkü haütü jakteke.

¹⁵Hapheikü Aaroni nanglakthülei moila yah-ei deiteke. Büpai nanglakthü shing mang moila shuohhen yum yah-ei jü, hatü büpai shongei dükpükei mang moila shuoh.

¹⁶Büpai jakpü moila koei pei, hatü shahkungi epükei moilateke.

¹⁷Büpai hahying moila deiyei haleipü lakbaoh hük yah-ei nepnüng jakpü moila shuohpü kü ü-ei moidülei jakteke.

¹⁸Büpai nanglakthü shingvaishi mongjempü moila shuohhen mohohbaong hatü mi baongha jü. Büpalei chehathüi büpa kü iy shuoh, hatü büpai moidü shinei hai.

¹⁹Shejao mohoh hi mi cheü, büm kübü cheü, she hatü dhen kü jümpü cheü kemei,

²⁰jomi amma shangkü haü, hatü Aaroni moidü shangei cheü jakteke.

²¹Mosai epükei Aaroni amma hatü shüngdahphi yah-ei ngongpathü shing SHEMBÜPA kü hayaoha thintho shuoh.

²²Mechem Aaroni moila shuohei tempa, büpai nanglakthü philei lak haongtü jom kü moihiman, hatü haleipü shühdai.

²³Mosa hatü Aaron nyi ashakshem mongei shüteke. Mechem jiji haleipü vampa, jijinyi-i nanglakthü kü moihiman, hatü SHEMBÜPAlei müknyinshekhang shennyak tou mü vam.

²⁴SHEMBÜPA nyushing leipü aw vamei jakpü moila hatü moidü leipü cheü hahtük. Mechem nanglakthüi hapa eepa, jom peü mongongpai len, hatü dhe dhaongei shateke.