Read Phom Naga JEREMIAH 13 Bible Online

JEREMIAH 13 - Phom Naga bible

JEREMIAH 13

¹SHEMBÜPAi ngei kü, “Daituh hatü nyemin shüng ashak hük shakei ngeihtuh, shejao hapa yung kü tehing” shei e.

²Hanangkü SHEMBÜPAi epükei shüng ashak hük shakei ngeihteke.

³Hapheikü SHEMBÜPAlei shah nyipabü ngei touei peiyei e:

⁴“Nüngi shakei ngeihshi nyupü shüng ashak yah-ei daiyei Euphrates yungyen yaongdung hükei ha jophongtuh.”

⁵Hanangkü SHEMBÜPAi epükei ngei daiyei Euphrates yungyenei ha jophong.

⁶Nyih kanja angpheikü SHEMBÜPAi ngei kü, “Euphrates yungyenei daituh, hatü ngei nüng kü jotuh shei epü shing leipü shüng ashak yahlangtuh” shei e.

⁷Hahepak kü ngei Euphrates yungyenei daiyei ngei jophongpü shüng ashak phükei ngaiteke. Shejao hapa shüng ashakü mangdaitü yahlak neshiüi nyuküteke.

⁸Hapheikü SHEMBÜPAlei shah ngei touei pei:

⁹SHEMBÜPAi hapakei enyüke: Hapa shüng ashak mangdaipü keiha ngei Judah hatü Jerusalem am changmeipü mangtükhen.

¹⁰Ngelei shah nebanghüpü, mong vaanei laophüi mongpü lem kü daipü hatü lebü kahvangthü chongphoei khümpü mang shennyakthüyü hapa yahlak neshiüi mangdaipü shüng ashak kei nyuhen.

¹¹Shüng ashak hük düngei ngeihshi nyupü keiha ngei Israel hatü Judah am shemthü peü ngelei men kü dupü-oupü, vihpülüpü ngelei nanglak leihühen ngei mü khashi angpeih, shejao jomi ngei epü nebang.

¹²SHEMBÜPA, Israel Kahvangi hapakei enyüke shei nüngi hapa shah hathü kü etuh: Yiüdük peü kü yiüi mahütuh, hatü jomi nüng kü, “Hami yiüdük peü kü yiüi maei tuhhen nenyingnyih shei nüngi deihnyu je?” shei ephahen.

¹³Hahepak kü nüngi hathü kü SHEMBÜPAi hapakei enyüke shei etuh: Ngei hapa kahdok kü nyupüthü peü Davidei ong uoshing kü uopü ongthü, ngongpathü, thibüthü, hatü Jerusalem kü nyupüthü peü yiüi chokhühen.

¹⁴Hapheikü ngei behe hashih peü aihük mü dük keiha hüki hük mü kaongteihühen. Ngei hathü mahtükshingkü nephahjihen, neyanghen nevaijü neshinshanghen shei SHEMBÜPAi enyüke.

¹⁵Bangtuh hatü mong shuohtuh, am techangmei; mehenangkü SHEMBÜPAi eteke.

¹⁶Büpai vangnyak koei peikü shekü, hatü vangngai pibom kü nüngei la-i kahshangthü kü huluh shuohhü shekü, SHEMBÜPA, ammei Kahvang kü müknyinshekhang shuohtuh. Mechem nüngi vangngai kü veihen, büpai shangmang hatü vangnyak leitüknyeih.

¹⁷Shejao nüngi ven nebangjema, nüng changmeipü nangkü ngelei laanghai joshi thephen. Ngei shahyaki thephen, hatü ngelei mük kü mükphi yenhen; mehenangkü SHEMBÜPAlei mithü wüpküpei deilangteke.

¹⁸Ongpa hatü chenyü nyi kü, “Ong uoshing kübü shühdaituh; mehenangkü nethe meipü ong athen shangjing leipü vüdaiteke.

¹⁹Negeb leipü chingnyüthü üpaiyao aphen neshiüi küptükhen. Judah am peü dhaomü wüpküpei deilangteke.

²⁰Ngangei veituh, hatü apshaphi leipü peiküpüthü kü veituh. Nüng kü shuohpü nethe meipü mithü melei daipa?

²¹Nüngei küphü vaihen shingvaishi nyuhshuohpüthüi nüng neütüktü nüng shak kü vanglem lemküjü nüngiyao mehe deihhen? Nyüha hük hapeü angshingkü tüngpü keiha nüng kü netünghen je?

²²‘Henüng dou ngei kü mehekei vamnya?’ shei nüngi nüngei mongei ejema, nüngei mang ahshi longpü nangkü nüngei ashakao shaakshi nüng kü douten dükpeih.

²³Ethiopia amei hangbong jeiaokhen je? nevaijü shahnyülei ow jeiaokhen je? Hapakei vailangmeyü ten dükei dhüdaipüthüi meiyao dükaokhen vaipeih.

²⁴Bhih kahdok leipü vanglüki hahbhang pilangpükei ngei am haitükhen.

²⁵Hapayü ammei lashüh shangba, am kü dokei tuhpü phaihan shei SHEMBÜPAi enyüke. Mehenangkü ammi ngei betük, hatü shahshem kü hinglem.

²⁶Ngei ammei shüng ashak phukei anei ammei dhe kü jümhühen, hatü ammei veüdou hutükhen.

²⁷Shangchingthülei ammei jiühitnalai, mükbongjuyung, vaüpü eepü, neveüi büm yupü ngei eetepih. Onyükei, Oh Jerusalem! Nedaünelangi meshük lushi nyuhenang?”