Read Phom Naga JEREMIAH 14 Bible Online

JEREMIAH 14 - Phom Naga bible

JEREMIAH 14

¹Hapayü ühivan peihen nangkü Jeremiah touei peipü SHEMBÜPAlei shah:

²“Judah-i mahng thepnyüke, hatü jomei chingnyüthü wong kemdaiteke. Jomphongü dhe magdaitü kahdokei lemshi nyüke, hatü Jerusalem am theppü shangei aongnyüke.

³Hamhimanthüi jomei chongphobüthü yung shohen shomnyüke; jom yungkukei heihjü yung shohen nedangnyu; jomi yungdük kong notü nyokei leidainyüke. Jom veüei mongshangpai shokuh kuhlangteke.

⁴Vang nekeipü nangkü kahdok vanei bhaodai; kahling am mongshangpai shokuh kuhlangteke.

⁵Phenha neshiüpü nangkü shaoki dangkao cheha yakphongnyüke.

⁶Phaü gaduthüi shangchingthü koshoyalei aongei mahuthü kei vanglük yemei mokteinyüke; Phenlak neshiüpü nangkü jomi mükiyao ne-ee-i leidaiteke.

⁷Hamei mangi ham kü denpü shuohlangmao, Oh SHEMBÜPA, nüngei men kü lemhük dükshih. Mehenangkü hamei mang ahshi longshi, hami nüng khüei mang thahteke.

⁸Oh Israel amei Monglem, shanghah hepak kü Yangbü, Mehekei nüngü hapa kahdokei yenthüng kei, ya hük mon paümpü yenpa kei nyudainya?

⁹Mehekei nüngü ü-athamapü shennyak kei, veshan hük yanghen neaoki wong kemdaipükei nyunya? Nüngü ham mü nyüpeih, Oh SHEMBÜPA, hamü nüngei nanglakthü, nüngi ham tetuhphong.

¹⁰Hathü nanglakthü nangkü SHEMBÜPAi hapakei enyüke: Jomi paüeiyonei longteihen kü longi bamnyüke, jomi jomei la shongei netuhnyu. Hanangkü SHEMBÜPAi jom neyahnyu; Shaang büpai jomei mang deih-ei danghen, hatü jomei mang nangkü hanghi shuohhen.”

¹¹SHEMBÜPAi ngei kü hathü nanglakthü meihen nangkü tephop shei eteke.

¹²Jomi shüaeiyunglejao jomi lenpü ngei nedannyih, hatü jomi jakpü moila hatü hahying moila shuohjao ngei hathü neyahhen, shejao yani, münghishaü homei, hatü chami ngei jom mahtükhen.

¹³Hahepak kü ngei eteke, “Oh SHEMBÜPA Kahvang! Halei thibüthüi nanglakthü kü, ‘Ammi yan ne-eepih, nevaijü münghishaü nenyuküpih, shejao ngei hapa kahdok kü chingmeivangmei mon shuohhen’ shei enyüke.”

¹⁴Hahepak kü SHEMBÜPAi ngei kü, “Hathü thibüthüi ngelei men noshi shahshemi teteivannyüke; ngei jomphong neshom, nevaijü nanglakthü kü etuh shei ngei jom kü ne-eangpih. Jomi am kü shahshem manghkhang, yahlak neshiüpü tetshahvanshah, hatü jomei sholi kü peipü lushahlemshah enyüke.

¹⁵Hanangkü ngelei men kü teteivanpü thibüthü kü SHEMBÜPAi hapakei enyüke: Ngei jom neshomshomi jomi, ‘Hapa kahdok kü yan nevaijü münghishaü nepeiküpih’ shei enyüke. Yan hatü münghishaü-i ha thibüthü mahkemhen,

¹⁶hatü jomi teteivanei eshuohpü shennyakthüao yan hatü münghishaü homei mahhen hatü Jerusalem chingyangshongei yakeichingei nyuhen; jom, jomei shembünyüthü, hatü hapeüthülei mahng vühen üpayao nenyuhen. Jomei mangi shangpükei ngei jom kü shemhen.”

¹⁷Nüngi hathü kü ha shah etuh: Nyakhingai thüngei nedoh-i ngelei mük kübü mükphi yenhütuh; Mehenangkü ngelei pai mü ngühpü nela ngelei nanglak nemei-i ma yahteke, hatü khih mü ngümtükteke.

¹⁸Ngei kahlei shajajao yani mahpüthü mon eenyüke. Ngei chingnyülei shüjajao münghishaü homei dipüthü mon eenyüke. Thibü hatü ngongpathü peü jomi nenyingpü kahdokei shüei lüdainyüke.

¹⁹Nüngi chemjalak kü Judah yaktükpü je? Nüngei mongei Zion nelümpü je? Ham nemeiaokhen mü mehekei nüngi ham ma yahhüpa? Hami chingmei yempeih, shejao meheyao mei nedang; Meitükpü hepak yempeih, shejao ha nangjei nyemhihan heüpeih.

²⁰Hami hamei mang hatü hamei bühipalei mang nyingei peiteke, Oh SHEMBÜPA; mehenangkü nüng khüei hami mang thahteke.

²¹Nüngei men kü ham tengümtük; Nüngei müknyinshekhang ong uoshing dhüm neshiüi teleitük; Ham mü nüngi vangteipü deih-ei dangtuh, hatü ha temangtük.

²²Nüng nevaipheikü Oh SHEMBÜPA, hamei Kahvang, lebü jatthülei lajeithüi vang keihüaokhen je? Nevaijü vangshothüi vanglah haihüaokhen je? Hami nüng kü monglemnyeih, mehenangkü ha dükpeyü nüng mon.