Read Phom Naga JEREMIAH 15 Bible Online

JEREMIAH 15 - Phom Naga bible

JEREMIAH 15

¹Hahepak kü SHEMBÜPAi ngei kü eteke: “Hatoumü Mosa hi Samuel nyi ngei kü phopei yaongküpü paoh vailangmao, ngei henüng shennyakthü kü nephahjipih. Hathü ngei toueipü deitükkemtuh! Hathü deitüktuh!”

²Hatü jomi, “Ham melei daihen?” shei phephüjü nüngi hathü kü, “SHEMBÜPAi hapakei enyüke” shei etuh: “Dihen demtüktü nyupüthü dikemtuh; Yani mahhen demtükpüthü yani mahtuh; Münghishaü-i dihen demtükpüthü münghishaü-i dikemtuh; Wüpküpei daihen demtükpüthü wüpküpei daituh.”

³Ngei jom mahhühen doulem ali temhen shei SHEMBÜPAi enyüke, “Jom jühen yan, jom shüei daihen shithü, hatü jom hahtükhen shangou hatü yemhimakthü,

⁴Hezekiahlei cheha Manasseh, Judah ongpai Jerusalemei dükpü dou tata kü lebü jatthü touei ngei hathüyü jiühitbenüng kei leihühen.”

⁵“Üpai am kü shinshanghen? Oh Jerusalem, nevaijü üpai mahng thepphahen? Am mekei nyüke shei üpai yaongei pheyuhen?

⁶Ami ngei yaktükpeih” shei SHEMBÜPAi enyüke. Ammi mang thah-ei mon nyunyüke. Hanangkü ngei am kü lak shihhen hatü mahtükhen; Ngei hajük kü neshinshangpih.

⁷Ngei hapa kahdok chingnyü penyüshalei om noshi jom shaaptükhen. Jomei lemthü neyeiyapü nangkü dipü, hatü mahpüchahpü koei peihen.

⁸Yungching bhihhiphang mao nyeishi ngei vaümnyü longi vamhühen. Heshotapa kü ngei thehilathülei nyüthü khüei jühen am müei peihen. Ngangahük kü ngei jom kü shanghah hatü nyemhihan koei peihen.

⁹Naü nyetei nyü shomeiyingei shahen, hatü ngüshom heetü dihen. Nyihnüng vaishi tuhtü pinnyülei vanghenyü shüdaihen; Pinnyü veühen hatü hai danghen. Yangei aoei nyupüthü vepalei yani mahhühen shei SHEMBÜPAi enyüke.

¹⁰Onyükei! Mehekei onyüi ngei hapa kahdoknyü kü büh-ei tuhphongpa? Kahdok kü nyupüthü peü mü dehen, shah dakteihen mü vamteke. Ngei mih kü lop nelushuoh, nevaijü ngei luhahpüyao neshiüpih, shejao peüi ngei kü thaüvaünyüke.

¹¹SHEMBÜPAi eteke: Hingmei ngei nüngü mükhong meipü shingvaishi yanghen; hingmei ngei nüngei vepathü vongshüh pongpü hatü shanghahpü hepak kü nüngi phopshuohhen.

¹²Apshaphi kahmük kübü leipü nyiam shennyak hanei-i bhagaokhen je?

¹³Ammei mop hatü dounyünangba peü ammi kahdok kü mang thahpü nangkü vepathü kü angkü shetei deitükkemhen.

¹⁴Ammi nenyingpü kahmük kü amphongü vepathü chongphohen; mehenangkü ngelei mongshih den kü aw keiha bahhen.

¹⁵Nüngi nyingei nyüpeih, Oh SHEMBÜPA, ngei deih-ei dangtuh hatü ngei kü thümshih; hatü ngei kü shüveipüthü kü bhüh yemtuh. Nüng nenteiaokpai ngei yah-ei tedeitük; Nüng nangkü ngei meshük ne-ienelem ponghahpa deihtuh.

¹⁶Ngei nüngei shah dangei ngei ha hahpeih, hatü nüngei shahthü ngelei mongkü mongongbenüng leiteke; Mehenangkü ngei kü nüngei men menteke, Oh SHEMBÜPA, Jeiyong Kahvang.

¹⁷Ngei nyipüwapü khong mü ne-om, nevaijü jom mü mongne-ongtei; Nüngei lak vihpü phangkü ngei mon uoteke, mehenangkü nüngei mongshih-i ngei mahüteke.

¹⁸Mehekei ngei kü tüngpü nedohdainya, hatü ngelei ma nemeidainya? Nüngi ngei keyü yung jepdaipü shoha kei lueilemhen je?

¹⁹Hanangkü SHEMBÜPAi hapakei enyüke: “Nüng mong lepjema, ngei chongphohen shingvaishi nüng meitükhen; Nüngi jiüpü shah eyei yahlak neshiüpü shah ne-ejema, nüngü ngei nangjei shah ebü vaihühen. Hathü shennyakthüi nüng touei lepei nyemleikei, shejao nüng jom lemei lepei tedai.

²⁰Ngei nüngü hathü nanglak shingvaishi bham hük, melangnyiami showtükpü bham leihühen. Jomi nüng khüei hokhen, shejao nüng kü neneüpih, mehenangkü ngei nüng mü nyüpeih, hatü nüng yanghen shei SHEMBÜPAi enyüke.

²¹Ngei nüng nemeipüthülei lak kübü yanghen, hatü shihmangpü ami shümlangpü kübü angei leihen.”