Read Phom Naga JEREMIAH 16 Bible Online

JEREMIAH 16 - Phom Naga bible

JEREMIAH 16

¹SHEMBÜPAlei shah ngei touei peiteke:

²Nüngi nyüha teyah, hatü hapa shingei hapeüthü angei tenyu.

³Hapa shing kü büh-ei paümpü hahimoithü hatü jom bühpü nyühipathü kü mehe vamhen SHEMBÜPAi hapakei enyüke:

⁴Jom dinten vamei dihen. Jom kü üpaiyao mahng nethephen, nevaijü jomei mahng nevühen; jomü kahdok shak kü mohoh het kei yaüshi nyuhen. Jomü yan hatü münghishaü-i dihen, hatü jomei mahng asha alang, hatü phaüyemthülei phai vaihen.

⁵SHEMBÜPAi hapakei enyüke: Nüngi mahng theppü shemei teshü, nevaijü mahng thephen, youngeinanghen tedai; mehenangkü ngei hapa nanglakthü leipü ngelei chingmei, bampü hatü phahji yahlangtepih.

⁶Hapa kahdok kü longpü maanpü peü dihen; jomei mahng nevühen, üpaiyao jom nangkü büm kü nevethahhen hatü sho nekuphen.

⁷Mahng theppüthü nyiushem meihühen nangkü üpaiyao hahying demei neshuohhen. Üpaiyao nyü vaijao pa vaijao mongmeihen nangkü yinghen meheyao neshuohhen.

⁸Nüngi jom mopütappü shemei hahhen yinghen nangkü neshühen.

⁹Mehenangkü Jeiyong SHEMBÜPA, Israel Kahvangi hapakei enyüke: Nüngei nyihthü kü nüngi eeshi ngei hapa shing leipü jom changtükhen, opühupü ngeü, mongongmongle ngeü, shemyemlathü hatü, shemyempathülei ngeü ngei dohtükhen.

¹⁰Mechem nüngi hathü shah hapa nanglakthü kü eshuohhen, jomi nüng kü, “Mehekei SHEMBÜPAi ham khüei hajük longpü shanghah shuohpa? Hami mehe mang dükpa? SHEMBÜPA, hamei Kahvang khüei mehe mang hami thahpa?” shei ephüjema,

¹¹nüngi jomphong kü hapa etuh: Mehenangkü shejema ambü ampai ngei yakphongtü lebü kahvangthü phei müei, chongphoei hatü khümpü nangkü ha vampeih shei SHEMBÜPAi enyüke. Jomi ngei yakphong hatü ngelei shahkung nebang.

¹²Shejao ambü ampa mao nemeipüba am nyuteke. Ngelei shah banghen nangjei am peüi laophülei mongdang vaanei mang mongdang pheikü müpü kü veihümao.

¹³Hanangkü ngei hapa kahdok kübü am nevaijü ambü ampai nenyingpü kahdokei noei shüktükhen, hatü halei ammi lebü kahvangthü vangnyak vangngai chongphoei nyuhen; mehenangkü ngei am kü phahji nehupih.

¹⁴Shejoongpa nyihthü ngoikünyüke shei SHEMBÜPAi enyüke. Nanglakthüi hajük kü, “Israel am Ijip leipü müei leipü vanyangyem SHEMBÜPA nyüpeih” shei ne-ehen,

¹⁵shejao jomi, “Apshaphi kahmük kübü hatü büpai changtükpü kahmükthü peü kübü ham Israel am müei leipü vanyangyem SHEMBÜPA nyüpeih” shei ehen. Mehenangkü ngei jomei chebü chepa kü shuohpü kahdokei jom müei leihen.

¹⁶Shaang ngei nyah yepbüthü longi nyükhen shomnyüpeih, hatü jomü ha nanglakthü nyah kei yephen. Hapheikü ngei sikari shennyakthü nyükhen, hatü jomi hapa nanglakthü kahshang, shangching hatü yaongvak peü leipü jüei leihen.

¹⁷Ngelei mük jomei lemthü kü veishi nyüpeih; jom ngei touei joshing neshiü; nevaijü jomei mang ngei touei joshi neshiü.

¹⁸Jom nemeipü hatü jomei mang nangkü ngei shingnyi shemhen; mehenangkü jomi ngelei kahdok yangnyu neshiüpü lajei mahngi, hatü ngelei mükjüp jiühitnalai-i matükteke.

¹⁹Oh SHEMBÜPA, ngelei wong, hatü ngelei penyüsha, shanghah hepak kü ngei loishing. Nüng kü kahdok dohpü junghijang peü kübü peiyei, “Hamei bühipathüi meheyao ne-ang, shahshem kahvangthü, yahlak neshiüpü, jom kü meheyao mei nedükpü lajeithü angpü khih” shei ehen.

²⁰Shennyaki laophülei kahvang lingnyu je? Hih, shejao hathüyü kahvang nevai!

²¹Hanangkü hingmei ngei jom kü nyuhhen, hapa hepak kü ngei jom kü ngelei nganhiwong nyuhhen; shejüang jomi ngelei menü SHEMBÜPA shei nyinghen.