Read Phom Naga JEREMIAH 19 Bible Online

JEREMIAH 19 - Phom Naga bible

JEREMIAH 19

¹SHEMBÜPAi ngei kü hapa eteke: “Daituh, hatü dük shükbü leipü haümdük hük shaktuh. Nüng mü nanglak khong kübü behethü hanei hatü ngongpathü behethü hanei mühahtuh,

²hatü Ben-Hinnom Kahjilei Dük Shükpü Shadenei heih-ei halei ngei nüng kü epü hapa shahthü baongeishuoh.

³Nüngi hathü kü, ‘SHEMBÜPAlei shah bangtuh, Oh Judah ongthü hatü Jerusalemei nyupüthü. Jeiyong SHEMBÜPA, Israel Kahvangi hapakei enyüke’ shei etuh: Hapa jung danpü peüi dhaongvang kü nyahhen mü ngei hapa shing kü shanghah koei peihen.

⁴Mehenangkü jomi ngei yakphong hatü hapa shingü lebü kahvangthülei shing leitük; jomi halei jom nevaijü jomei bühipathü nevaijü Judah ongthüi mechemao nenyingpü kahvangthü kü moila shuohteke, hatü jomi hapa shingü mang neshiüpü iy yenhüpai matükteke.

⁵Jomi Baal kahvang kü laophülei hapeü aw kü jakei moila shuohhen shingvaishi Baal kahvangei vaümchongthü lingteke; ngei mechemao jom kü eyei nenyu, nevaijü ngelei mong kü deihshi nenyuangpih.

⁶Hanangkü lituh, nanglakthüi hapa shingkü Topheth nevaijü Hinnom Kahji shei nenyükhen, shejao hapayü Jüpü Kahji shei nyükhen nyihthü ngoikünyüke” shei SHEMBÜPAi enyüke.

⁷Hapa shingei ngei Judah hatü Jerusalem amei küpjanthü mangtükhen. Ngei jomei vepathülei yani mahhühen; jom jühen yempüthülei lak kü shuohhen, hatü ngei jomei mahmahng asha alang hatü yemhimakthülei phai leitükhen.

⁸Ngei hapa chingnyü mangtükhen, hatü mihnyi yangnyai dou leitükhen; hapa shing peih-ei daipüthü peüi ha lomohpü eeyei nyemei deihhen.

⁹Ngei jomi laophülei hapeüthülei phai hahhühen, hatü jom jühen yempü vepathüi ching shümlangpü hepak kü jom hüki hükei phai hahhen.

¹⁰Nüng mü daipüthü veishi nyushi hapa dük bhaotüktuh,

¹¹hatü jom kü, “Jeiyong SHEMBÜPAi hapakei enyüke shei etuh: Dük shükbülei dük ngei shaang bhaotükpü keiha ngei hapa jatli bhaotükhen hatü ha lingei neleiaokhen. Mahng vüshing shing neshiüi manglei thahshi jomei mahmahng Tophethlei vühen.

¹²Hapa shing hatü halei nyupüthü kü ngei hapa dükhen shei SHEMBÜPAi enyüke. Ngei hapa chingnyü-ü Topheth kei leitükhen.

¹³Jerusalem leipü shemthü hatü Judah ongthüyü hapa Topheth shing kü, hatü shem adokei vangsho lithilen kü ayingshü jakei hatü lebü kahvangthü kü yiü moila shuoh-ei nyupü shemthü peü sheihdaihen.”

¹⁴Hapheikü Jeremiah-i teteivanei ehen shingvaishi SHEMBÜPAi Tophethlei shompü kübü nyokei lei, hatü SHEMBÜPAlei phopshem chingshelei yaongtü büpai nanglakthü kü,

¹⁵“Jeiyong SHEMBÜPA, Israel Kahvangi hapakei enyüke: Bangtuh! Ngei jom khüei epü shanghah vongshüh peü hapa chingnyü hatü ha kü shonpü chingthü touei koei peihen, mehenangkü jom ngaümvang haüei ngei epü ngelei shahthü nebang” shei eteke.