Read Phom Naga JEREMIAH 2 Bible Online

JEREMIAH 2 - Phom Naga bible

JEREMIAH 2

¹SHEMBÜPAlei shah ngei touei hapakei eyei pei:

²Daituh, hatü SHEMBÜPAi hapakei enyüke shei Jerusalem am danshi etuh: Am thehila hepak kü meshük ngei kü bamshi nyupa! Doidaila keiha am meshük ngei kü kenpa, chemao kah nelingpü phaü kü mekei ngei müpa!

³Israel amü SHEMBÜPA kü daülangpü, shongpü betjük nyuhampeih. Üami hapa hah, mang thahteke, hatü jom kü shanghah peihampeih shei SHEMBÜPAi enyüke.

⁴SHEMBÜPAlei shah bangtuh, Oh Jakob am shem, hatü Israel am phangthü kemei.

⁵SHEMBÜPAi hapakei enyüke: Ambü ampai ngei toueipü yandaihen mü jomi ngei kü pungpü mehe yeppa? hatü jom yahlak neshiüpü douthü pheikü daiyei jomao yahlak neshiüi leidaiteke.

⁶Jomphongi, “Ham Ijip leipü müei leipü, bhih hatü kahsha mon nyupü jahpan homei, ühivan hatü vangnyak nyupü kahdok, üamiyao nekamteipü hatü üamao nenyupü kahdokei ham müei leipü SHEMBÜPA melei nyüpa?” shei jomi ne-e.

⁷Ngei am changeishaei nyupü kahdokei, haleipü betjük hatü meipü kemei hahhen shingvaishi müei leipeih. Shejao mechem am halei shüpa, ammi ngelei kahdok sheihtük, hatü ngelei mükjüp jiühitnalai leitükpeih.

⁸Ngongpathüi, “SHEMBÜPA melei nyüpa?” shei nephe; shahkungnyü noteipüthüi ngei nenying; vanglem lempüthüi ngei khüei mang thah; thibüthüi Baal kahvang jung tetei e, hatü nanglei neshiüpü douthü pheikü lüdai.

⁹Hanangkü shao chem ngei am kü eelanyeih shei SHEMBÜPAi enyüke, hatü ngei ammei hüpeüthü kao eelanyeih.

¹⁰Cyprus shübaong homei heih-ei veihümao, hatü hanei am Kedarlei shomei dokhümao, hatü henüng keipü dou vamlashang veituh.

¹¹Kahvang nevaijao üam jatiyao laophülei kahvang jeipü eela? Shejao ngelei nanglakthüi yahlak neshiüpü lajei kü ngelei müknyinshekhang jeiteitükteke.

¹²Hapa kü nyemtuh, Oh vangshothü, hatü hantuh, chemjalak kü lavüngtoiyei leidaituh shei SHEMBÜPAi enyüke.

¹³Mehenangkü ngelei nanglakthüi mang nyi thahteke; jomi vanyangyem yunglok, ngei yakphongteke, hatü yung ne-iihen yungkuk kukteke.

¹⁴Israel amü aa je? Shemei bühpü aa je? Shejema mehekei vepathüi büpa kü aeteishehahnya?

¹⁵Mailangthüi jom kü ngüngnyüke, jomi wongmü ngüngteke. Jomi büpalei kahdok hatü chingnyüthü shennyak neshiüi lavüngtoiyei leitükteke.

¹⁶Nyeinya vaishi Memphis hatü Tahpanhes ami nüngei shangjing leipü hon athen mangtükteke.

¹⁷Büpai nüng müyaki nüngi SHEMBÜPA, nüngei Kahvang yakphongpü nangkü laophü nyingi koei leihahpü nevaipü je?

¹⁸Nile leipü yung yingnüng nüng Ijiplei yiüpai nüngi mehe dangnya? Nevaijü Euphrates yung yinghen Assyrialei heihpai nüngi mehe dangnya?

¹⁹Ammei mangi am kü hanghi shuohhen, hatü am ngaümpheilei shinei leidaipai am nyonghühen. SHEMBÜPA, ammei Kahvang yakphongpeyü mang, hatü shahyaki nyukahen shei nyingtuh; Ngei kü nyempü ammei mongkü neshiü shei Jeiyong SHEMBÜPA Kahvangi enyüke.

²⁰Hepak luangi daiteke, ammi ammei pang mangtük, am kü shapü phentüktü, “Ngei nüng chongnephopih” shei eteke. Shangching peülei hatü püdhüm peülei am büm yuei nyuteke.

²¹Shejao peü mü meipü li shei yah-ei ngei amü peü mü meipü nyalingngupai kei sheiphongpeih. Shejema mekei etü am tenei phaü nyalingngupai leidaipa?

²²Ammi sapon longi yah-ei paülangmao, ammei mang ngei touei khashi nyüke shei SHEMBÜPA Kahvangi enyüke.

²³“Ngei nesheih-angpih hatü Baal kahvang kü nekhümangpih” shei eaokhen je? Kahjilei nüng mekei nyupa veihümao, nüngi mehe dükpa deihhümao. Nüngü shülangi mokpü ut chenyü khih,

²⁴phaü gadu jahpanei nyuei dhüdaipükei, pinnyüi cheha yahhahhüpü hepak kü üpai yepei aokhen? Cheha yahhen hepak kü chebaongi tok vaiyei neyemteijao pinnyü hei-üng dangnyeih.

²⁵Nüngei la kü tüngshi, hatü üng üshi temoktei. Shejao nüngi, “Ngei kung amei kahvang bamnyeih, ngei hathü pheikü daihen hih” shei nüngi eteke.

²⁶Gühpai güh yephahjü veüpü keiha, Israel amao jomei ongthü, lakchongbüthü, jomei ngongpa hatü thibüthü peü veühen.

²⁷Ammi pü kü, “Nüngü ngelei pa”, hatü yaong hük kü, “Nüngi ngei bühpeih” shei enyüke. Mehenangkü ngei kü jomei dhe nevai, jomei ngaümphei lepei hunyüke. Shejao shanghahpü hepak kü, “Peiyei ham yangshih” shei enyüke.

²⁸Shejao ammi linghahpü kahvang melei nyüpa? Am shanghahpü hepak kü jomi aokjema peiyei am nyemyangpha; ammei jilathü meshük nyu, hajük ammei kahvangthü nyüke, Oh Judah.

²⁹Mehekei ammi ngei khüei eelanya? Ammi ngei khüei yaongteke, shei SHEMBÜPAi enyüke.

³⁰Angsha kü ngei ammei nanglakthü kü shüveipü khih, shejao jomi yeanpü neyahnyu. Aeipü mailangi keiha ammi ammei thibüthü ammei yani jütükpeih.

³¹Oh ha denhivan kübü nanglakthü, SHEMBÜPAlei shah deih-ei dangtuh! Ngei am kü phaüshihhaomang kei, nevaijü shangmang kahdok kei chongküpü je? Shejema mehekei ngelei nanglakthüi, “Ham mongpükei longteihen hih; ham nüng touei nepeiküpih” shei epa?

³²Nela hüki laophülei chühiyük, hatü doidaila hüki laophülei owhiai be-aokhen je? Shejao ngelei nanglakthüi nyih longi ieyei neaoki ngei betükteke.

³³Chühimai yawhhen nüng meshük manpüang! Nemeipü nyühathü kü dangkao nüngi nüngei lemnyuh-aokteke.

³⁴Yemhimak jüpülei iy nevai, shejao nüngei ashakviha kü mang neshiüpü shennyakthülei iy lüpshi dangteke; Henüng douthü kemei vamei tuhtü,

³⁵“Ngei mang neshiüpih; büpai ngei kü mongneshihnyih” shei nüngi enyüke. “Ngei mang neshiüpih” shei epü nangkü shaang ngei nüng shahphenshingei deihen.

³⁶Hajük yoshi nüngei Kahvangei lem kübü yeiyaei mehekei dainya? Assyria ami nüng veühüpükei, Ijip ami am veühühen.

³⁷Hapa shing leipü nüngi nüngei shangjing kü laki düktü daihen; mehenangkü nüngi monglempüthü SHEMBÜPAi yaktükteke, hatü jom homei nüngi meheyao nanglei nedangpih.