Read Phom Naga JEREMIAH 26 Bible Online

JEREMIAH 26 - Phom Naga bible

JEREMIAH 26

¹Josiahlei cheha Jehoiakimi Judah kü vanglem lemhen chongpang hepak kü hapa shah SHEMBÜPAleipü peiteke:

²SHEMBÜPAi hapakei enyüke: SHEMBÜPAlei shahphen shingei yaongtuh, hatü SHEMBÜPAlei shemei khümnüng peipü Judah jilathü kübü nanglakthü kü ha etuh. Ngei nüng kü epü lemphü eyeishuoh; shah phahükao te-am.

³Üpai nyingpa, jomi ha bangei jom peü laophülei mang lem kübü mong lephen aokpeih. Shejema jomi dükpü mang nangkü ngei jom shangkü koei peihen shei tempü shanghah kübü ngei mong yeiyahen.

⁴SHEMBÜPAi hapakei enyüke shei jom kü etuh: Ammi ngelei shah nebangjema hatü ngei am kü shuohpü shahkung kü nemüjema,

⁵hatü ammi nebangjao ngei am touei leiyei leiyei shompü ngei chongphopü thibüthülei shah nebangjema,

⁶ngei hapa shemü Shiloh kei leitükhen, hatü hapa chingnyü-ü kahdok shak kübü jatthü khongkü thaüvaütükpü dou hük leitükhen.

⁷SHEMBÜPAlei shemei Jeremiah-i hathü shah epü ngongpathü, thibüthü hatü nanglak peüi dan.

⁸Shejao SHEMBÜPAi büpa kü etuh shei epü lemphü nanglakthü kü Jeremiah-i ekümhinüng, ngongpathü, thibüthü hatü nanglakthü peü thaiyei büpa yep, hatü, “Nüng jühen!

⁹Mehekei nüngi SHEMBÜPAlei men kü hapa phopshem Shiloh kei leidaihen, hatü hapa chingnyü shennyak nenyui lavüngtoiyei leitükhen shei epa?” shei e, hatü SHEMBÜPAlei shemei Jeremiah shonei nanglakthü thai.

¹⁰Mechem Judah am lakchongbüthüi ha jung danpa, jomi ongshem kübü SHEMBÜPAlei shemei aong, hatü phopshem kü Shaden Ja shadenei uo.

¹¹Hapheikü ngongpathü hatü thibüthüi lakchongbüthü hatü nanglak peü kü, “Hapa shennyakü dihen shangteke; mehenangkü büpai hapa chingnyü khüei eteke. Ammei dhaongi ha danteke” shei e.

¹²Hahepak kü Jeremiah-i lakchongbüthü hatü nanglakthü peü kü eteke: “Hapa phopshem hatü hapa chingnyü khüei ngei eyei ammi danpü shahthü peü teteivanei ehen shingvaishi SHEMBÜPAi ngei shompeih.

¹³Hanangkü shaang ammei lemthü hatü dükhiling yeiyatuh, hatü SHEMBÜPA, ammei Kahvangei shah bangtuh. Shejüang am khüei SHEMBÜPAi shuohhen epü shanghah vongshüh neshuoh-i mong yeiyadaihen.

¹⁴Ngei payü, ammei lakmongei nyüpeih; am kü mehe mei hatü jiüpeih shei deih, ha dükshih.

¹⁵Shejao ammi ha nyingtuh, ammi ngei jütükjema, ammi laophü nying kü mang neshiüpü iy ammei chingnyü, hatü halei nyupüthü kü yenhüpü vaikahen; hingmei ammi danshi hathü shah ehen shingvaishi am touei SHEMBÜPAi ngei shompeih.”

¹⁶Hahepak kü lakchongbüthü hatü nanglakthü peüi ngongpathü hatü thibüthü kü, “Hapa shennyak tejü; büpai SHEMBÜPA, jenei Kahvangei men kü jen kü epü khih” shei e.

¹⁷Hapheikü kahmük kü behethü hanei shephilei aongei nanglak khong thaipü kü eteke.

¹⁸Judah am Hezekiah ongpalei nyih kü Moresheth am Mikah-i teteivanei epeih. Büpai, Jeiyong SHEMBÜPAi hapakei enyüke” shei nanglakthü kü epeih; Zionü kah kü han hokpükei hoktükhen, Jerusalemü nyüp yakshing leitükhen, hatü phopshem shangü phaüying leidaihen.

¹⁹Judah am Hezekiah ongpa nevaijü Judah ami ha tata kü Mikah jüla? Hezekiah-i SHEMBÜPA kü nenyem hatü büpa bampü neyemangpü je? Büpai koei peihen shei jom khüei epü shanghah vongshüh neshuohhen SHEMBÜPAlei mong neyeiyaangpü je? Shejao jeni jen nyingkü shanghah vongshüh koei peihahnyu khih!

²⁰Shao lebü shennyak hük SHEMBÜPAlei men kü teteivanei nyu. Büpayü Kiriath-Jearim leipü Shemaiahlei cheha Uriah nyu. Büpai hapa chingnyü hatü kahdok khüei Jeremiah-i epü shah meimei teteivanei nyu.

²¹Mechem Jehoiakim hatü büpalei lakchongbüthü hatü veshanthüi Uriah-i epü shahthü danpa, ongpai büpa jühen yem, shejao mechem Uriah-i hapa danpa, büpa nyemei Ijiplei laongei yiüdai.

²²Shejao Jehoiakim ongpai Akhborlei cheha Elnathan Ijiplei lebü shennyakthü mü shom.

²³Jomi Ijip leipü Uriah müei anei Jehoiakim ongpa touei müei dei, hatü büpai büpa yani bapei jütü büpalei mahng banghnyüha vüteipü mahngchongei yakphong.

²⁴Shejao Shaphanei cheha Ahikami Jeremiah khüambakpü nangkü büpai nanglakthü kü jühen neshuoh.