Read Phom Naga JEREMIAH 27 Bible Online

JEREMIAH 27 - Phom Naga bible

JEREMIAH 27

¹Judah kü Josiahlei cheha Zedekiah-i ong vaiyei chongpangpülei SHEMBÜPAlei shah Jeremiah touei peiteke.

²SHEMBÜPAi ngei kü hapakei eteke: Nüng nyingi vü bhawtuh, hatü ha nüngei üng kü ngeihtuh.

³Hapheikü Edom, Moab, Ammon, Tyre hatü Sidon ongthü kü Jerusalemei Judah ongpa Zedekiah touei peipü phongmokbüthü homei hapa shahjang shomtuh.

⁴Jeiyong SHEMBÜPA, Israel Kahvangi hapakei enyüke shei jomei ongthü kü nyem-ejanüng eyeishuoh: Ammei ongthü kü hapa etuh:

⁵Ngelei ngan longpai hatü ngelei laklu wong longpai ngei kahdoknyü hatü halei nyupü hangku hatü yemhimakthü lingpeih, hatü ngei monghahpü shennyakthü kü shuohpeih.

⁶Shaang ngei hapa kahmükthü peü ngei chongphopü Babylon ongpa Nebukadnezzar kü shuohtüktih, hatü phaüyemthüi dangkao büpa chongphohen shuohtüktih.

⁷Büpalei kahdok dohen hepak mangngoi thahshi jatthü peüi büpa, hatü büpalei cheha hatü chehü chongphohühen; hapheikü mon jom jati wong kohpü jatthü hatü longpü ongthü chongphohühen.

⁸Shejao mepa jat nevaijü ongchingi Babylon ongpa Nebukadnezzar ongpa chongnephohen, hatü Babylon ongpalei pang nepaihenshang, Nebukadnezzar homei ngei chemjalak kü mangmahtük thahshi ngei hapa jat yan, münghishaü, hatü chamhilemi hanghihühen.

⁹Hanangkü am kü, “Amphong mechemao Babylon ongpa chongnephopih” shei epü thibüthü, tetpüvanpüthü, mangh manghteipüthü, lashüh dokpüthü hatü phongyompüthülei shah tebang.

¹⁰Jomi am kü shahshem teteivanei enyüke hatü hapai am ammei kahdok leipü tailuei daihen hean benhen; ngei am changtükhen hatü am mahhen.

¹¹Shejao mepa jati Babylon ongpalei pang paihen hatü chongphohen, ngei jomü laophülei kahdokei kahling yungpüei chingchingei nyuhühen shei SHEMBÜPAi enyüke.

¹²Aihük shahjang ngei Judah ongpa Zedekiah kao shuohtepih: Babylon ongpalei pang kü shütuh; büpa hatü büpalei nanglakthü chongphoei meishi nyutuh shei etepih.

¹³Babylon ongpa chongnephopü jatli kü yan, münghishaü hatü chamhilemi dihühen shei SHEMBÜPAi epü kei mehekei nüng hatü nüngei nanglakthü dihenang?

¹⁴Babylon ongpa chongtepho shei epü thibüthülei shah tebang; mehenangkü jomi am kü shahshem teteivanei enyüke.

¹⁵Ngei jomphong neshomshomi ngelei men kü shahshem teteivanei enyüke shei SHEMBÜPAi enyüke. Hanangkü ngei am hatü am kü shahshem epü thibüthü changtükhen hatü mahtükhen.

¹⁶Hahepak kü SHEMBÜPAi hapakei enyüke shei ngei ngongpathü hatü nanglakthü peü kü eteke: “SHEMBÜPAlei shemei nyupü yungshongthü lomi Babylon leipü leikahen” shei am kü shahshemi teteivanei epü thibüthülei shah tebang; mehenangkü jomi am kü shahshem enyüke.

¹⁷Ammi hathülei shah tebang; Babylon ongpa chongphotuh hatü meishi nyutuh. Mehekei hapa chingnyü lavüngtoiyei tuhhenang?

¹⁸Jom hingmeipü thibüthü vaijema, hatü SHEMBÜPAlei shah jom mü nyujema, SHEMBÜPAlei shem, Judah ongpalei shem hatü Jerusalemei aoei nyupü yungshongthü Babylonei yah-ei nedaihen mü jomi Jeiyong SHEMBÜPA kü nyemphop.

¹⁹Mehenangkü Jeiyong SHEMBÜPAi shennyakthü, melangnyiam yungkuk, yaongshung hatü chingnyülei tuhphongpü lebü yungshongthü,

²⁰Babylon ongpa Nebukadnezzari Jerusalem leipü Babylonei Jehoiakimei cheha Judah ongpa Jehoiakin mü lebü Judah hatü Jerusalem kü mübüthü wüpküpei deishingkü büpai hathü koei nedai.

²¹Jeiyong SHEMBÜPA, Israel Kahvangi SHEMBÜPAlei shem, Judah hatü Jerusalem leipü ongshemei tuhpü yungshongthü nangkü hapakei enyüke:

²²Hathü kemei Babylonei deilanghen, hatü ngei hathü baong mangyem thahshi halei nyuhen. Hapheikü ngei hathü koei leihen hatü hatou shingei tuhhen shei SHEMBÜPAi enyüke.