Read Phom Naga JEREMIAH 28 Bible Online

JEREMIAH 28 - Phom Naga bible

JEREMIAH 28

¹Zedekiah-i Judah kü ong vaipü bong ali mü lenyang ngapabü pangpü hapa bong-üng Gibeon leipü Azzurlei cheha Hananiah thibüi ngongpathü hatü nanglakthü peü nyushi SHEMBÜPAlei shemei ngei kü eteke:

²“Jeiyong SHEMBÜPA, Israel Kahvangi enyüke: ‘Ngei Babylon ongpalei pang mangtüktih.

³Bong nyi mong kü Babylon ongpa Nebukadnezzarlei shem leipü yungshongthü ngei hapa shingei yah-ei leihen.

⁴Shao ngei Babylon wüpküpei daipü Jehoiakimei cheha, Judah ongpa Jehoiakin hatü nanglakthü peü hapa shingei müei leihen; mehenangkü ngei Babylon ongpalei pang mangtükhen’ shei SHEMBÜPAi enyüke.”

⁵Hahepak kü SHEMBÜPAlei shemei yaongpü ngongpathü hatü nanglakthü nyushi Jeremiah thibüi Hananiah thibü kü jangei eteke.

⁶Jeremiah thibüi, “Amen! SHEMBÜPAi hapakei nyemdükma! Nüngi teteivanei epü shahthü kei SHEMBÜPAlei shem leipü deilangpü yungshongthü hatü Babylon wüpküpei nyupüthü müei nyemleiküma!

⁷Shejao ngei mehe am hatü nanglakthüi danshi ekahen, ha kü bangtuh:

⁸Ji shekü nyupü thibüthüi ongchingthü, kahmük longi khüei vehok vamhen, shanghah hatü chamhilem peihen teteivanei nyuhampeih.

⁹Shejao thibü üpai chingmeivangmei jung tetei enya, büpa kü hingshangpü thibü sheiyü büpai tetpü peü jiüküjü mon ehen” shei eteke.

¹⁰Hahepak kü Hananiah thibüi Jeremiahlei bhagchong leipü pang bhüh-ei yah-ei mangtük,

¹¹hatü büpai, “SHEMBÜPAi hapakei enyüke” shei nanglakthü peü kü eteke: “Ngei shaang dükpü keiha bong nyi mongkü Babylon ongpa Nebukadnezzarlei pang jatthü peüei bhagchong leipü bhühtükhen” shei e. Ha kü Jeremiah hatoueipü dailem yemei lüdai.

¹²Hananiah thibüi Jeremiah thibülei bhagchong leipü pang bhühlangtü kanja angphei kü SHEMBÜPAlei shah Jeremiah touei pei:

¹³Daituh, hatü SHEMBÜPAi Hananiah kü hapakei enyüke shei etuh: Nüngi pü yah-ei lingpü pang mangtükteke shejao hapa nangjei nyiami lingpü pang danghen hih.

¹⁴Jeiyong SHEMBÜPA, Israel Kahvangi hapakei enyüke: Babylon ongpa Nebukadnezzar chongphohen shingvaishi ngei jatthülei bhagchong kü nyiami lingpü pang paihühen, hatü jomi büpa chongphohühen. Phaüyemthüi dangkao büpa chongphohühen.

¹⁵Hapheikü Jeremiah thibüi Hananiah thibü kü, “Bangtuh, Hananiah! SHEMBÜPAi nüng neshomshomi shahshem kü hinglemhen mü nüngi hapa jat yawhlangteke.”

¹⁶Hanangkü SHEMBÜPAi hapakei enyüke: “Ngei hapa kahdok kübü nüng nüngtükhen. Shenüng-üng nüng dihen; mehenangkü nüngi SHEMBÜPA khüei chongventeke.”

¹⁷Hapa bong len nyetpabü kü Hananiah thibü di.