Read Phom Naga JEREMIAH 29 Bible Online

JEREMIAH 29 - Phom Naga bible

JEREMIAH 29

¹Hapayü Jeremiah-i wüpküp leipü yangei nyupü behethü, ngongpathü, thibüthü hatü Nebukadnezzari Jerusalem leipü Babylon wüpküpei deilangpü nanglakthü touei shompü lai kü nyangpü shahthü:

²Hapayü Jehoiakin ongpa, hatü chenyü, ongshem leipü lakchongbüthü, Judah hatü Jerusalem kübü mübüthü, mistrithü hatü lahhinei dou dükpüthü Jerusalem leipü lüdaiphei kü nyuhampeih.

³Hapa laiyü Judah am Zedekiah ongpai Babylon ongpa Nebukadnezzar touei Shaphanei cheha Elasah hatü Hilkiahlei cheha Gemariah nyilei lak homei shomteke: Hapakei eteke:

⁴Jeiyong SHEMBÜPA, Israel Kahvangi Jerusalem leipü Babylon wüpküpei Nebukadnezzari müei deilangpü nanglakthü peü kü hapakei enyüke:

⁵Shem veyei chingchingei nyutuh; kahling yungpüei halei vampü hahshi nyutuh.

⁶Shem yemei hahimoi büh-ei paümei nyutuh; jomiyao hühiha nyuhen shingvaishi yeshangthü kü nyüha yahhütuh, yiükhathü doi deishihtuh. Hangku nanglak nekomi dahütuh.

⁷Ngei am wüpküpei deiyei tuhpü chingnyü chingmeivangmei hatü dapüshepü kü anghen kentuh, hatü hapa shing SHEMBÜPA kü phoptuh; mehenangkü hapa daeisheyei nyujema amao daeishehen.

⁸Mehenangkü Jeiyong SHEMBÜPA, Israel Kahvangi hapakei enyüke: “Am mü chemi nyupü thibüthü hatü phongyompüthüi am kü lueilemhen mü tenyu, hatü jomi manghpü manghthü kü tebangtei;

⁹mehenangkü ngelei men kü jomi teteivanei epeyü shahshem; ngei jomphong neshom shei SHEMBÜPAi enyüke.”

¹⁰SHEMBÜPAi hapakei enyüke: Mechem bong pejempüan lomhenshang, ngei am touei peihen, hatü am hapa shingei müei leihen shei ngei lahpü jiühühen.

¹¹Am shingvaishi ngei tempü küpjan ngei nyingei nyüpeih shei SHEMBÜPAi enyüke; hayü am daeishehen küpjan, shejao am lomohhen nevai, am kü ngoikahen monglem shuohhen küpjan.

¹²Hahepak kü am peiyei ngei kü phophen, hatü ngei am kü janghen.

¹³Ammi ngei yemhen hatü mechem ammei mongdang kempai ngei yemhenshang ammi ngei danghen.

¹⁴Ammi ngei danghen shei SHEMBÜPAi enyüke, hatü ngei mepa shing leipü am wüpküpei müei daipa, hapa shingei-üng müei leilanghen.

¹⁵“Babylon leiyao SHEMBÜPAi ham shing thibüthü vamhüpeih” shei ammi eteke,

¹⁶Shejao Davidei ong uoshing kü uopü ongpa, hatü chingnyülei nyupü nanglakthü, hatü am mü wüpküpei nedaipü ammei kahmük nanglakthü kü SHEMBÜPAi hapakei enyüke:

¹⁷Hih, Jeiyong SHEMBÜPAi hapakei enyüke: “Ngei jom khüei yan, münghishaü hatü cham shomhen, hatü ngei jomü hahhen nemeipü adhajük kei leitükhen.

¹⁸Ngei jom kü yan, münghishaü, hatü chamhilemi changhen, hatü melei ngei jom shomhen hatouei jomü kahdoknyü ongchingthü peü touei jiühitbenüng, thaüvaütükpü dou, nyembenüng, eelanyongnya leihühen;

¹⁹mehenangkü jomi ngelei shah nebang, shei SHEMBÜPAi enyüke; ngei chongphopü thibüthü homei jom kü nedoh-i epü ngelei shah nebang” shei SHEMBÜPAi enyüke.

²⁰Hanangkü shaang SHEMBÜPAlei shah bangtuh, ngei Jerusalem kübü Babylon wüpküpei shomtükpü amphong peü.

²¹Ngelei men kü amphong kü shahshem teteivanei epü Kolaiahlei cheha Ahab hatü Maaseiahlei cheha Zedekiah nyi nang Jeiyong SHEMBÜPA, Israel Kahvangi hapakei enyüke: “Ngei jomphong Babylon ongpa Nebukadnezzarlei lak kü shuohhen, hatü nüngi eeshi büpai jom jühen.

²²Jom nangkü Judah am Babylon wüpküpei nyupüthü peüi hapa thaüvaü shah noteihen, ‘Babylon ongpai Zedekiah hatü Ahab nyi aw kü jaktükpükei SHEMBÜPAi am kao dükphahen.’

²³Mehenangkü jomi Israel kü nyembenüng mang dükteke; chingyowpalei nyüha mü mükbongjuyung dükteke, hatü ngei neshomshomi ngelei men kü shahshem eteke. Ngei ha nyingnyeih hatü ngei ha kü denpü shuohnyeih shei SHEMBÜPAi enyüke.”

²⁴Nehelam am Shemaiah kü ha etuh:

²⁵Jeiyong SHEMBÜPA, Israel Kahvangi hapakei enyüke: Nüngi nüngei men kü Jerusalemei nyupü nanglakthü peü kü, Maaseiahlei cheha Zephaniah ngongpa touei, hatü lebü ngongpathü touei shomteke. Nüngi Zephaniah kü,

²⁶SHEMBÜPAi Jehoiada ngongpa nangjei ngongpa vaihen nüng jeteke, hatü thibü nevaipü kü thibü keiha dou dükpü ngapathü yepei üng kü nyiamvü shentü tuhhen shingvaishi nüngü SHEMBÜPAlei shemei lakchongbü khih.

²⁷Hanangkü am touei thibü hih shei dou dükei nyuhampü Anathoth am Jeremiah kü hapakei mehekei nedükshuohnya?

²⁸Mehenangkü büpai jen Babylonei nyushi hapakei eyei shompeih, “Halei hepak luangi nyuhen; bükhishem veyei halei nyutuh, hatü sheili sheiyei hapa kü vampü hah-ei nyutuh” shei epeih.

²⁹Zephaniah ngongpai hapa lai Jeremiah thibüi danshi ieteke.

³⁰Hahepak kü SHEMBÜPAlei shah Jeremiah touei peiyei e:

³¹Nehelam am Shemaiah nangkü SHEMBÜPAi hapakei enyüke shei wüpküpei nyupü peü touei shomtuh: Ngei neshomshomi Shemaiah-i am kü teteivanei epai am shahshem kü hinglemhüei mülangpü nangkü,

³²SHEMBÜPAi hapakei enyüke: Ngei Nehelam am Shemaiah hatü büpalei hühihathü hanghihühen; ngei ngelei nanglakthü kü mei dükpü eehen mü nanglakthü khongkü büpalei hühiha hükao yemmü netuhhen; mehenangkü büpai SHEMBÜPA khüei yaongteke shei SHEMBÜPAi enyüke.