Read Phom Naga JEREMIAH 3 Bible Online

JEREMIAH 3 - Phom Naga bible

JEREMIAH 3

¹Baha hüki laophülei nyüha mü yanjü, pinnyüi büpa toueipü yanei daiyei lebü baha mü doi lüdaipheikü shao büpai pinnyü touei nyokei leihen je? Hapa keipü kahdok sheih-ei neshiüpü je? Ammi chühimai longi mü mükbungjuyungteke, hatü am ngei touei leiaokhen je? shei SHEMBÜPAi enyüke.

²Shaopü shangtaothü kü veihümao, ammi halei büm neyupü shing nyüla? Yingnyülei phaüi nganei longteipükei, lemhao peülei ammi chühimai danei uonyüke. Ammei mang hatü büm yupü homei ammi hapa kahdok sheihtükteke.

³Hanangkü vang nekei-i shümlang, hatü ünyü vang nekeinyu; shejao am veüao neveüi büm yuei longteihen dhehilaü kohtü nyüke.

⁴Ammi ngei kü shaang, “Ngelei opa, hamei nethe hepak kübü küphü;

⁵nüng düngei mongshihhen je? Nüngei mongshih den kü nyuhen je? shei nenyükangpü je? Ammi hapakei eteke, shejao ammi aokpü thahshi mang lemphü dükteke.”

⁶Josiah ongpalei nyih kü SHEMBÜPAi ngei kü eteke: Hingnelempü Israel, pinnyüi mehe dük, mekei pinnyü shangtao shaopü peülei aongei, hatü püdhüm peülei büm yuei kamteipü nüngi eela?

⁷Pinnyüi hathü peü dükpheikü ngei touei leikahen je shei deihpeih, shejao pinnyü ngei touei mong lepei nelei, hatü shahshem epü chenaü Judah-i ha eeteke.

⁸Ngei hingnelempü Israel kü yanhen lai shuohpeih, hatü pinnyüi mükbungjuyung dükpü nangkü yanei leishihpeih. Shejao ha eetü hingnelempü chenaü Judah-i nyemei nedeih; pinnyüao daiyei mükbungjuyung dükteke.

⁹Pinnyüi mükbungjuyung dükpü longi maanteke shei kahdok kemei sheihtük, hatü pü hi yaong peü mü mükbungjuyung dükteke.

¹⁰Shejao hathü peü dükphei kao shahshem epü Judah-i pinnyülei mong kempai ngei touei mong lepei nelei, shejao meni mon ngei touei mong leppükei hupeih shei SHEMBÜPAi enyüke.

¹¹Hahepak kü SHEMBÜPAi ngei kü eteke: Shahshem epü Judah leimeyü hingnelempü Israel-üng komshi mang thahpükei hupeih.

¹²Daituh, hatü hapa shah apshaphi kahmük kü baongtuh hatü etuh: Mong leptuh, Oh hingnelempü Israel, shei SHEMBÜPAi enyüke. Ngei nüng kü mongshih-ei neveipih; mehenangkü ngeiyü phahjinyeih, shei SHEMBÜPAi enyüke; ngei den kü mongshih-ei nenyupih.

¹³SHEMBÜPA, ammei Kahvang khüei mang thahteke, püdhüm meipü peü phangei kung amei kahvang lajeithü kü bampü khih, hatü ngei epü kü nebang shei deih-ei dangtuh shei SHEMBÜPAi enyüke.

¹⁴Ngei touei leikei, Oh hingnelempü hapeüthü; mehenangkü ngeiyü nüngei shembü; Ngei nüng yahhen, hük chingnyü leipü, hatü nyi shemong leipü, hatü ngei nüng Zionlei müei leihen, shei SHEMBÜPAi enyüke.

¹⁵Amphong kü nyingpühingpü hatü danaokpü kon üh-ei haümhen ngei monghahpü mi yombü hük am kü shuohhen.

¹⁶Hathü nyih kü mechem am daeisheyei, angeideiyei leihen, nanglakthüi “Vangpüshuwpü Shahkungnyü Pela” shei ne-ehen; jomi ha deih-ao nedeih-i bedaihen, hatü shao lebü ja nelinghen.

¹⁷Hahepak kü Jerusalem keyü SHEMBÜPAlei ong uoshing shei nyükhen, hatü jatthü peü halei SHEMBÜPA nyushing Jerusalemei thaihen hatü jomi hajük kü mong vaanei jomei mangi mongpü lem kü nedaihen.

¹⁸Hathü nyih kü Judah am phang Israel am phang mü dhaohen, hatü jom chemi ngei chebü chepa am kü mükjüp shuohpü kahdokei apshaphi kahdok leipü leikahen.

¹⁹Ngei nüngü ngelei hapeü vaishi yahhen, hatü kahdoknyü kü peü mü meipü hapa mongongpü kahdok nüng kü shuohhen shei deihpeih. Nüngi ngei kü “Opa” shei nyükphahen; hatü ngei toueipü yanei nedaikahen shei deihpeih.

²⁰Shejao laophülei baha touei shahhing ne-epü nyüha keiha, nüngi ngei touei hingshangi nenyupeih, Oh Israel am phang shei SHEMBÜPAi enyüke.

²¹Kahshang shaopü leipü vaüpü eepü, hatü Israel hapeüthü theppü dannyüke, mehenangkü jomi lemnyong kü kamei, SHEMBÜPA, jomei Kahvang betükteke.

²²Mong leptuh, Oh hingnelempü Israel, ngei am hingnelempü meitükphahen. “Ham nüng touei peikünyeih; mehenangkü nüngü SHEMBÜPA, hamei Kahvang.

²³Hingmei, shangtaolei aongei lebü kahvang khümpeyao sheühpü nedang; kahshangthülei aongpaiyao lueilempü mon. Hingmei, SHEMBÜPA, hamei Kahvang monha Israel amyemleipüba khih.”

²⁴Shejao ham hashih mebü hapa veübenüng douthüi hamei bühipa ami nyiuei dükpü, jomei yemhimakthü, jomei yiükha yeshangthü peü lühtükpeih.

²⁵Jen veüpai lemshi nyudaishah, hatü haipülempai jen kü nyemjümpha. Hashih mebü shinnyih thahshi ham hatü hamei bühipa kemei SHEMBÜPA, hamei Kahvang khüei mang thahteke; hami SHEMBÜPA, hamei Kahvangei shah nebang.