Read Phom Naga JEREMIAH 33 Bible Online

JEREMIAH 33 - Phom Naga bible

JEREMIAH 33

¹Mechem Jeremiah veshanthülei shemei nyupa, SHEMBÜPAlei shah nyipabü büpa touei pei.

²Kahdoknyü lingpü SHEMBÜPA, hapa shükei shingnüngei tuhpü SHEMBÜPA, büpalei menü, SHEMBÜPA, büpai hapakei enyüke:

³Ngei kü nyüktuh hatü ngei nüng kü janghen hatü nüngi nenyingpü longpü hatü douja nüng kü ephahen.

⁴SHEMBÜPA, Israel Kahvangi hapa chingnyü kübü shemthü hatü Judah am ongthülei shemthü, mepa vepathüi ching hahhen tempü khüei hatü yan khüei vepa hunghen shingvaishi bentükpa, hapa nangkü hapakei enyüke:

⁵Hanei am Babylon am khüei hokhen peikahen, hatü ngei mongshihpai jüpü shennyakthülei mahmahngi hathü mahühen, mehenangkü jomi dükpü mang nangkü ngelei dhe hapa chingnyü leipü jodaipeih.

⁶Shejoongpa, ngei hapa chingnyü kü meihüpü hatü yangnyu meipü shuohhen; ngei ngelei nanglakthü meihühen, hatü chingmeivangmei nyiushemmei changshi shuohhen.

⁷Ngei Judah hatü Israel am wüpküp leipü müei leihen, hatü shelei nyupükei lingei leihen.

⁸Ngei khüei pungpü jomei mang peü ngei daütükhen, hatü ngei khüei thahpü mang hatü khüei yaongpü mang peü ngei tükhen.

⁹Kahdoknyü jatthü peü touei hapa chingnyü homei ngei kü mongongpü men, vihpülüpü hatü müknyinshekhang koei peihen hatü ngei jom kü dükshuohpü doumei jomi danhen; hatü ngei hapa kü dapüshepü chingmeivangmei shuohpü nangkü jom nyemei kheühen.

¹⁰SHEMBÜPAi hapakei enyüke: Ammi hapa shingkü, “Shennyak hatü yemhimak nenyuphei keyü angsha hih” shei eteihamteke. Shejao Judah hatü Jerusalem chingyangshong yemhimakao neshiüi nyupü shingkü,

¹¹mongongmonglepü ngeü, yiükjing mo kü mongongteipü ngeü hatü SHEMBÜPAlei shem kü menvih shuohpü, moila koei peipüthülei ngeü hapakei eyei danhen, “Jeiyong SHEMBÜPA kü menvih shuohtuh, mehenangkü büpayü meiangpeih; büpa bampü hüdenhalenshi nyunyeih.” Mehenangkü ngei hapa kahdok kü sheleipü keiha dapüshepü koei peihen shei SHEMBÜPAi enyüke.

¹²Jeiyong SHEMBÜPAi hapa enyüke: “Shennyak nevaijü yemhimak neshiüi lavüngtoiyei nyupü hapa shing kü jilathü peü kü mi yombüthü jomei mithü deiyei het ühhen thüngkon danghen.

¹³Phaüshang kahmük jilathü, Negeb kahshangla heshüphi, Benjamin kahmük kü, Jerusalem shinpü chingthü, Judah jilathü kü mi yombü hükei laki mithü iehen” shei SHEMBÜPAi enyüke.

¹⁴Ngei Israel am phang hatü Judah am shem kü lahtükpü jiühühen hepak ngoikünyüke shei SHEMBÜPAi enyüke.

¹⁵Hathü nyih kü hatü hapa hepak kü ngei Davidei hühiha kübü daülangpü Pükao hük vamhühen hatü büpai kahmük kü shahhing hatü daülangshemshepü dükhen.

¹⁶Hathü nyih kü Judah hatü Jerusalem am yangei nyuhen. Hapa chingnyü kü, “SHEMBÜPAyü jenei Yemleipüba” shei nyükhen.

¹⁷Mehenangkü SHEMBÜPAi hapakei enyüke: Israel amei ong uoshing kü uotü ong vaihen shennyak taoei mechemao David nenyuhen,

¹⁸hatü ngei kü jakpü moila, hahying moila hatü düngei ngei kü moila shuohhen Levi am taoei nenyuhen.

¹⁹SHEMBÜPAlei shah Jeremiah touei peiteke:

²⁰SHEMBÜPAi hapakei enyüke: Temtükpü hepak kü jiüshi nyak hatü vangngai nevamhen ngei vangnyak hatü vangngai mü vangteipü mangtükaokjema,

²¹ngelei chongphobü David mü vangpüshuwpü, hatü ngei chongphopü Levi am ngongpathü mü vangpüshuwpü mangtükaokhen, hatü Davidi laophülei ong uoshing kü vanglem lemhen hühiha neshiüi nyuhen.

²²Ngei ngelei chongphobü David hatü ngei chongphopü Levi am vangsho lithathü kei hatü yungching bhihhiphang kei ne-ieaoki leihühen.

²³SHEMBÜPAlei shah Jeremiah touei peiteke:

²⁴“Hathü nanglaki, ‘SHEMBÜPAi jehahpü ongching nyi büpai yaktükteke’ shei epü nüngi nedanangpü je?” Hanangkü jomi ngelei nanglak kü ne-ienelem hatü jat hük kei nedeihnyu.

²⁵SHEMBÜPAi hapakei enyüke: Ngei paoh vangnyak hatü vangngai mü vangpüshuwpü neling hatü kahdok vangsho shahkung chanei netuhlangmeyü,

²⁶ngei Jakob hatü ngelei chongphobü Davidei hühihathü yaktükhen, hatü ngei Abraham, Isak hatü Jakobei hühihathü shak kü vanglem lemhen büpalei hathü khong kübü hükao nejehen. Mehenangkü ngei jom dahüshehühen hatü jom kü phahjihen.