Read Phom Naga JEREMIAH 38 Bible Online

JEREMIAH 38 - Phom Naga bible

JEREMIAH 38

¹Shaang Mattanei cheha Shephatiah, Pashhurlei cheha Gedaliah, Shelemiahlei cheha Jukal, hatü Malkiahlei cheha Pashhur hathüi nanglak peü kü Jeremiah-i eshuohpü ha shah danteke;

²SHEMBÜPAi hapakei enyüke: “Üam hapa chingnyülei nyunya, yan, münghishaü nevaijü chami dikemhen, shejao üami Babylonei heihhenshang yangnyu payü yemmü nyuhen.”

³SHEMBÜPAi shao hapakei enyüke: “Hingmei hapa chingnyüyü Babylon ongpalei veshanthü kü shuohtükhen hatü jomi ha hahtükhen.”

⁴Hahepak kü lakchongbüthüi ongpa kü, “Hapa shennyakü jütükhen vaipü khih. Mehenangkü büpai epü shah homei hapa chingnyülei nyupü veshanthü hatü nanglakthü mong maanhütüknyüke. Hapa shennyakiyü nanglak meihen nevai, jom lomohhühen mon yemnyüke” shei e.

⁵“Büpayü ammei lakmongei nyüke. Ammi dükpü khüei ongpai meheyao nedükaokpih” shei Zedekiah-i e.

⁶Hanangkü jomphongi Jeremiah yah-ei ongshem yompüthülei shem yopailei nyupü ongpalei cheha Malkiahlei yungkuk mongei vü-i shentü shüshih; halei yung neshiü; nyaühut mon nyupü kü Jeremiah hingei shanshihteke.

⁷Shejao ongshemei nyupü Kush am lakchongbü, Ebed-Melekh-i Jeremiah yungkukei hütükteke shei danei ongpa Benjamin Peshadenei uoshi nyushingkü,

⁸Ebed-Melekh ongshem leipü vamei heih-ei ongpa kü,

⁹“Ngelei shembü, ongpa, hathü shennyaki Jeremiah thibü kü dükpeyü longi nejiüpü dou khih. Chingnyülei dangkao hahhen meheyao neshiüjü jomi büpa yungkukei hütükpeyü büpa halei aeipai dihen khih” shei e.

¹⁰Hahepak kü ongpai Kush am Ebed-Melekh kü, “Nüng mü hatoueipü shennyak hapüan mütuh, hatü Jeremiah thibü mangdidai-i shüei ngailangkei” shei e.

¹¹Hanangkü Ebed-Melekh-i büpa mü shennyakthü müei ongshemei heih-ei dou jaoshing leipü ashakviha changthü vü kü shentü yungkuk mongei Jeremiah kü vüshihteke,

¹²hatü Kush am Ebed-Melekh-i Jeremiah kü, “Vüi büm kü nevethen shingvaishi hapa ashakten bhagsha kü japtuh” shei e. Jeremiah-i hapakei dük,

¹³hatü jomphongi büpa vü kü düktü shüei anei yungkuksha leipü ngaiteke, hatü Jeremiah ongshem yompü veshanthülei shemei nyu.

¹⁴Hapheikü Zedekiah ongpai Jeremiah thibü nyüknüng deishih-ei phopshem kü jempabü shaden touei müei leitü ongpai Jeremiah kü, “Ngei nüng kü lemhük phehen hih; nüngi ngei kü meheyao tejolang” shei e.

¹⁵Jeremiah-i Zedekiah kü, “Ngei nüng kü hapa ephüjü nüngi ngei nejütükhen je? Ngei nüng kü shahnying ephüjao nüngi ha nebangshasha hih” shei e.

¹⁶Shejao Zedekiah ongpai Jeremiah kü joei lah-ei, “Jen kü ngei shuohpü vanyangyem Kahvang men kü ngei nüng nejütükpih, nevaijü nüng jühen yempüthü kü neshuohpih” shei e.

¹⁷Hahepak kü Jeremiah-i Zedekiah kü, “Jeiyong SHEMBÜPA Kahvang, Israel Kahvangi hapakei enyüke: ‘Nüngi Babylon ongpalei lakchongbüthü touei shakei vamdaijema nüngei yangnyu yanghen, hatü hapa chingnyü awi neshamtükhen; nüng hatü am shem nyuhen.

¹⁸Shejao Babylon ongpalei lakchongbüthü touei shakei nevamjema, hapa chingnyü Babylon am kü shuohtükhen, hatü hapa chingnyü awi shamtükhen; jomei lak leipü nüng dangkao neyangpih’ ” shei e.

¹⁹Zedekiah ongpai Jeremiah kü, “Shelei Babylonei heihdaipü Hebrew am kü ngei nyem-angke; mehenangkü Babylon ami ngei hathülei lak kü shuohtükhen khih, hatü jomi ngei kü nemei-i dükphahen khih” shei e.

²⁰“Jomi nüng hapakei neshuohtükpih” shei Jeremiah-i e. Ngei mehe enya ha dükei SHEMBÜPAlei shah bangtuh. Shejüang nüng meishi nyuhen hatü nüng yanghen.

²¹Shejao nüngi shakei nevamjema SHEMBÜPAi ngei kü ha shakei vamei ephopeih:

²²Judah ongpalei ongshemei tuhpü nyühathü peü Babylon ongpalei lakchongbüthü touei müei deihen. Ha nyühathüi nüng kü hapakei ehen: “Nüngei mongjempai nüng lemnyong kü müpeih, hatü mongkhen küphüi nüng shak kü vanglem lempü khih. Shaang nüng nyaühut chongkü taangdaipü eeyei jomi nüng yakphongpü khih.”

²³“Ammei nyühihathü peü Babylon am touei müei daihen. Nüngao jomei lak kübü neyangaokhen, shejao Babylon ongpai shümei yahlanghen, hatü hapa chingnyü awi shamtükhen.”

²⁴Hahepak kü Zedekiah-i Jeremiah kü, “Ji jaüteipü nüngi üpa kao tenyinghü, hei nevaijema nüng dihen.

²⁵Lakchongbüthüi ngei nüng mü jaüteipü khih shei danei jomi nüng touei peiyei, ‘Nüngi ongpa kü mehe eshuohpa hatü büpai mehe ephopa ha nejo-i ham kü eshih, hei nevaijema nüng jühen’ shei ephüjema,

²⁶‘Ngei Jonathanei shemei dihen mü halei nyokei teleishih shei khümei eshuohpeih’ shei etuh” shei e.

²⁷Lakchongbüthü peü Jeremiah touei peiyei büpa kü phe, hatü ongpai büpa kü etuh shei epü peü eshuohteke. Hanangkü jomphongi büpa kü shao meheyao nephetei; mehenangkü üpaiyao büpa ongpa mü eteipü shah nedan.

²⁸Jerusalem shümei mangyahpü nyih thahshi Jeremiah ongshem yompü veshanthülei shemei küpshi nyu.