Read Phom Naga JEREMIAH 39 Bible Online

JEREMIAH 39 - Phom Naga bible

JEREMIAH 39

¹Zedekiah ongpai Judah kü ong vaipü bong shü mü lenyang anpabü kü Babylon am Nebukadnezzar ongpa hatü büpalei veshanthü Jerusalem khüei peiyei shümteke.

²Zedekiah ong vaipü bong anpühük mü len ali mü nyih shüpabü kü hapa chingnyü benei shü.

³Mechem Jerusalem hahpa, Babylon ongpalei lakchongbüthü peü peiyei Jiam Peshaden touei uo: Nergal-Sharezer, Samgar-Nebo, Sarsekem lakchongbü shopü, shao lebü Nergal-Sharezer lakchongbü longpü hatü Babylon ongpalei lebü lakchongbüthü omshi pei.

⁴Mechem Judah ongpa Zedekiah hatü veshanthüi hathü eepa, jomphongi vangnyak kü ongpalei pe lemei peshaden homei bham hi bham nyi aa kü chingnyü tuhtü Arabah lemei nyaiyei dai.

⁵Shejao Babylon am veshanthü changei daiyei Jeriko Kahjilei Zedekiah yei, hatü jomi büpa yepei Hamath kahdok Riblahlei Babylon am Nebukadnezzar ongpa touei müei dei, hatü ongpai büpa kü hanghi shuoh.

⁶Babylon ongpai Riblahlei Zedekiahlei chehathü büpalei müki veishi jü; shao Babylon ongpai Judah am hamhiman kemei jütük.

⁷Büpai Zedekiahlei mük luktük hatü Babylonei yah-ei deihen nyiamvüi shatü tuh.

⁸Babylon ami ongshem hatü nanglakthülei shem awi haptük hatü Jerusalem bham bentük.

⁹Veshan mübü Nebuzaradani chingnyülei tuhpü nanglakthü büpa tuhphongpü shennyakthü hatü halei aoei nyupüthü Babylon wüpküpei müei dai.

¹⁰Nebuzaradani meheyao neshiüpü taopathü hanei Judah kahdokei tuhphong, hatü hahepak kü jomphong kü nyalingngupai kah hatü lebü kahthü shuoh.

¹¹Shaang Babylon ongpa Nebukadnezzari veshan mübü Nebuzaradan kü Jeremiah nang hapakei ngeükhüam shuoh:

¹²“Jeremiah ngaituh, hatü büpa kü jungtuh; büpa kü teshüvei shejao büpai mehe yühen ha shuohtuh” shei e.

¹³Hanangkü veshan mübü Nebuzaradan, Nebushazban lakchongbü shopü, Nergal-Sharezer lakchongbü longpü hatü Babylon ongpalei lebü lakchongbüthü,

¹⁴shomei Jeremiah veshanthülei shem leipü ngaiteke. Jomi büpa shemei müei leihen shingvaishi Shaphanei cheha Ahikam, Ahikamei cheha Gedaliahlei lak kü shuoh.

¹⁵Mechem Jeremiah veshanthülei shemei küpshi nyupa, SHEMBÜPAlei shah büpa touei pei:

¹⁶“Daituh, hatü Ethiopia am Ebed-Melekh kü, ‘Jeiyong SHEMBÜPA, Israel Kahvangi hapakei enyüke’ shei etuh: Ngei epü shah keiha hapa chingnyü kü moihimani nevai, shanghah dhaümkahen. Hapa vampü hepak kü nüngao ha eehen mü halei nyuhen.

¹⁷Shejao ngei nüng yanghen shei SHEMBÜPAi enyüke; nüngi nyempüthü kü nüng neshuohtükhen.

¹⁸Ngei nüng yanghen; nüng yani nemahpih, shejao nüngei yangnyu yanghen; mehenangkü nüngi ngei kü hinglem shei SHEMBÜPAi enyüke” shei eteke.