Read Phom Naga JEREMIAH 42 Bible Online

JEREMIAH 42 - Phom Naga bible

JEREMIAH 42

¹Hapheikü veshan lakchongbüthü mü Kareahlei cheha Johanan, Hoshaiahlei cheha Azariah hatü nanglak maanpü kübü longpü peü heih-ei,

²Jeremiah thibü kü, “Chingmeilemlingei hami phepü kü nüngi banglangshih hatü SHEMBÜPA, nüngei Kahvang kü aoei nyupü nanglakthü shing phopshih. Nüngiyao shaang eenyüke, chemü ham longi nyupeih, shejao shaang maani mon aoei nyüke.

³SHEMBÜPA, nüngei Kahvangi ham melei daihen, mehe dükhen nyemhupha” shei e.

⁴Jeremiah thibüi jomphong kü, “Meiteke, amphongi epükei ngei SHEMBÜPA, ammei Kahvang kü phophen, hatü SHEMBÜPAi mehe jangei ephahen, ha ngei am kü ephahen; ngei meheyao am kü ne-epha-i netuhlangpih” shei e.

⁵Hahepak kü jomphongi Jeremiah kü, “SHEMBÜPA, nüngei Kahvangi nüng homei ham kü shompü shah aimü hami nedükjema, ham khüei SHEMBÜPAyü shahhing hatü hingshangpü denbü vaikahen.

⁶Ham meishi nyuhen shingvaishi hami nüng shompü SHEMBÜPA, nüngei Kahvangi epü nemeijao meijao banghen; mehenangkü hami SHEMBÜPA, jenei Kahvangei ven banghen hih” shei e.

⁷Nyih an dohpü lemei SHEMBÜPAlei shah Jeremiah touei pei.

⁸Hahepak kü büpai Kareahlei cheha Johanan hatü büpa mü nyupü veshan mübüthü peü hatü longpü kübü maanpü thahshi nanglakthü peü nyükei,

⁹jomphong kü, “SHEMBÜPA, Israel Kahvang, üpa touei ammi phepü koei ngei deishihpa, büpai hapakei enyüke:

¹⁰Ammi hapa kahdokei nyujema, ngei am linghen hatü nevütükhen; ngei am sheiphonghen shejao nebhitükhen; mehenangkü ngei am kü shuohpü shanghah eeyei ngei mongshangnyeih.

¹¹Amphongi shaang nyempü Babylon ongpa kü tenyem. Ammi büpa kü tenyem; mehenangkü ngei am mü nyüpeih hatü büpalei lak kübü ngei am yanghen.

¹²Büpai am kü phahjiei ammei kahdokei leishihhen mü ngei am kü phahji huhen.

¹³Shejao ammi, ‘Ham hapa kahdokei nenyupih’ shei eyei SHEMBÜPA, ammei Kahvangei shah nebangjema,

¹⁴hatü ‘Anyoh, ham Ijip kahdokei leiyei vehok hatü vehok amit ngeü nedanpü, nevaijü aeipülepü neshiüpü shingei leidaihen’ shei ejema,

¹⁵SHEMBÜPAlei shah bangtuh, Oh Judah, am yangei nyupüthü, Jeiyong SHEMBÜPA, Israel Kahvangi hapakei enyüke: Amphongi Ijip kahdokei leiyei halei chingchingei nyuhen shei deihjema,

¹⁶ammi nyemei nyupü yani hapa Ijip kahdokei am mahhen, hatü ammi nyemei nyupü münghishaü am pheikü Ijiplei müei peikahen hatü halei am dihen.

¹⁷Ijiplei yiüei halei chingchingei nyuhen shei deihpüthü peü yan, münghishaü, hatü chami dikemhen; ngei koei peipü shanghah kübü aohen nevaijü yanghen hükao nechongkahen.”

¹⁸Jeiyong SHEMBÜPA, Israel Kahvangi hapakei enyüke: Ngelei mongshih Jerusalemei nyupüthü kü khüpshuohpü keiha, mechem am Ijiplei yiüei nyuhen ngelei mongshih khüpphahen. Amphongü thaüvaütükpü dou, nyembenüng, eela hatü yaüeilungtükpü dou leihen. Ammi hapa shing sheyü ne-eehen.

¹⁹SHEMBÜPAi am kü, “Oh Judah am aopüthü, am Ijiplei teyiü. Ngei shinnyih am kü shuohpü shahvüng homei,

²⁰am longi pungteke shei nyingtuh. Mehenangkü ammi ngei SHEMBÜPA, ammei Kahvang touei, ‘Ham shingvaishi SHEMBÜPA, hamei Kahvang kü phopshih, hatü SHEMBÜPA, hamei Kahvangi mehe ehen, ha hami dükhen’ shei eshi shomteke.

²¹Hanangkü ngei shinnyih am kü eteke, shejao büpai ngei shomei am kü epü SHEMBÜPA, ammei Kahvangei shah meheyao nebangang.

²²Hanangkü shaang ha nyingtuh: Am daiyei chingchingei nyupüthü shingei yan, münghishaü hatü chami dikemhen.”