Read Phom Naga JEREMIAH 44 Bible Online

JEREMIAH 44 - Phom Naga bible

JEREMIAH 44

¹Ijip kahdok Migdol, Tahpanhes, Memphis hatü Pathroslei nyupü Israel am nangkü Jeremiah touei peipü shah.

²Jeiyong SHEMBÜPA, Israel Kahvangi hapakei enyüke: “Ngei Jerusalem hatü Judah jilathü kü koei peipü shanghahthü ami ammei müki lekei eeteke. Shinnyih hathü kemei lavüngtoiyei, shennyak neshiüi nyüke;

³mehenangkü jomi mang dükpü, hatü ngei mongshihhüpü nangkü ha vampeih. Halei jom nevaijü nüng nevaijü ambü ampa-i nenyingpü kahvang kü ayingshü jakei khümpeih.

⁴Nedoh-i ngei ngelei chongphobü thibüthü shomei, ‘Ngei nelümbenüng jiühitnalai dou tedük!’ shei etepih.

⁵Shejao jomphongi ha nebang nevaijü ha kü mong neshuohpeih; jomi jomei mang kübü mong nelep nevaijü lebü kahvangthü kü ayingshü jakei khümpü nedoh.

⁶Hanangkü ngelei mangpü mongshih bhuei vampeih hatü hapai Judah jilathü hatü Jerusalem chingyangshong kü bahhüpeih, hatü shinnyih nyupü keiha lavüngtoiyei leitükpeih.”

⁷Shaang SHEMBÜPA, Jeiyong Kahvang, Israel Kahvangi hapakei enyüke: Judah leipü baha, nyüha hashih naüha jütüktü lihila netuhhen mü mehekei am nyingi henüng keipü shanghah vongshüh koei peihahnya?

⁸Ammei lakdoui hatü am nyupü Ijip kahdokei lebü kahvangthü kü moila shuoh-ei mehekei ngei mongshihhünya? Am laophü nying mahhen, hatü kahdoknyü jatthü peü touei thaüvaü hatü eelatükpü dou hük leihen.

⁹Ammei bühipa, Judah ong hatü onglathü, am hatü ammei nyühathüi Judah kahdok hatü Jerusalem chingyangshongei thahpü mang betükpü je?

¹⁰Shinnyih thahshi jom nyingi maanpü nelei nevaijü dhüm nehunyu, nevaijü ngei am hatü ambü ampa mü tuhpü ngelei shahkung hatü vanglem kü nemünyu.

¹¹Hanangkü Jeiyong SHEMBÜPA, Israel Kahvangi hapakei enyüke: Ngei am kü shanghah koei peihen, hatü Judah am peü kü dohpü koei peihen temtüktih.

¹²Ijiplei yiüei nyuhen shei tempü Judah am aopü nanglakthü peü ngei yah-ei daihen; jom peü Ijiplei mahhen; jom peü yani nevaijü chami dihen. Jomphongü thaüvaü, nyembenüng, eelanyongnya ne-ienelem dou kei leidaihen.

¹³Ngei Jerusalemei nyupüthü yan, münghishaü, hatü chamhilemi hanghihüpü keiha ngei Ijip kahdokei nyupüthü hanghihühen.

¹⁴Shejüang Ijiplei nyunüng yiüpü Judah am aopü nanglakthü üpayao neyanghen nevaijü jom leiyei nyuhen ongyangpü Judah kahdokei leiyei nyuhen mü yangei nenyuhen; benhayaha hanei mü lenei üpaiyao nyokei neleihen.

¹⁵Hahepak kü laophülei shembünyüi lebü kahvang kü ayingshü jakei khümtepih shei nyingpü bahathü hatü halei ompü nyühathü, thaipü khong, Ijip kahdok Pathroslei nyupü nanglak peüi Jeremiah kü jangei e,

¹⁶“SHEMBÜPAlei men kü nüngi ham kü epü shah nebangpih!

¹⁷Hami dükhen shei epü lemphü dükhen. Hami Vangsho Onglanyü kü ham hatü lakchongbüthüi Judah jila hatü Jerusalem chingyangshong kü ayingshü jakei, yiü moila langei khümpükei khümhen hih. Hahepak keyü hamü hahying changshi, angeideiyei hatü neshanghah-i nyupeih.

¹⁸Shejao hamei Vangsho Onglanyü kü ayingshü jakpü hatü yiü moila shuohpü dohhinüng ham meheyao neshiü, yan hatü münghishaü homei mahkemnyüke.”

¹⁹Hahepak kü nyühathüi üei e, “Mechem hami Vangsho Onglanyü kü ayingshü jakei pinnyü kü yiü moila shuohpa, hatü pinnyülei lajei bakei aan lingpa, hamei shembüpathüi monghahpeih.”

²⁰Hahepak kü Jeremiah-i büpa kü eshuohpü nanglakthü nyüha baha peü kü,

²¹“Am hatü ammei bühipa, ammei ong hatü lakchongbüthü hatü hapa kahdok leipü nanglakthüi Judah jilathü hatü Jerusalem chingyangshong kü ayingshü jakei khümpü SHEMBÜPAi ha betüktü nedeihnyih shei deihnyu je?

²²SHEMBÜPAi ammi dükpü mang dou hatü jiühitbenüng douthü nenenaokpü nangkü ammei kahdokü lavüngtoiyei shennyak nenyu-i thaüvaü dou hük shinnyih thahshi leitükpeih.

²³Ammi ayingshü jakei SHEMBÜPA khüei mang thah hatü büpalei shah nebang nevaijü büpalei shahkung hatü vanglem kü nemüpü nangkü ammi shaang ponghahpü shanghah am kü peipeih” shei e.

²⁴Hapheikü Jeremiah-i nyühathüao omshi nanglakthü peü kü e, “Ijip kahdokei nyupü Judah nanglakthü peü, SHEMBÜPAlei shah bangtuh.

²⁵Jeiyong SHEMBÜPA, Israel Kahvangi hapakei enyüke: ‘Hami Vangsho Onglanyü kü yiü moila shuohhen’ shei lahpeyü am hatü ammei nyühathülei doui huteke. Hanangkü ammi mehe lah, ha düktuh! Ammi vangtükpü düktuh!

²⁶Shejao Ijiplei nyupü Jehoda am, SHEMBÜPAlei shah bangtuh: Ijiplei nyupü Israel nanglakthüi hajük kü jomei ju kübü vamei, ‘Vanyangyem SHEMBÜPA ‘shei ne-epih shei ngei, ngelei longpü men kü vangei enyeih shei SHEMBÜPAi enyüke.

²⁷Mehenangkü ngei jom kü mei shing nevai, shanghah shuohhen nangkü veishi nyuhen; Ijiplei nyupü Jehoda am peü mangmahkem thahshi yan hatü münghishaü homei dihükemhen.

²⁸Yani nemah-i Ijip leipü yangei Judah kahdokei leipeyü maani mon nyuhen. Hahepak kü Ijiplei nyuhen yiüpü Judah ami ngelei shah hi jomei shah jiüpüshang nyinghen.”

²⁹Ngei hapa shingei am kü shüveihen, hayü am shing nyangeihepü hük nyukahen; shejüang ngei am kü hanghi shuohhen shei epeyü hingmei khih shei nyinghen.

³⁰SHEMBÜPAi hapakei enyüke: Ngei Judah am Zedekiah ongpa büpa jühen yempü vepa Nebukadnezzarlei lak kü shuohtükpü keiha ngei büpa jühen yempü vepa Ijip ongpa Pharaoh Hophra kü shuohtükhen.