Read Phom Naga JEREMIAH 48 Bible Online

JEREMIAH 48 - Phom Naga bible

JEREMIAH 48

¹Jeiyong SHEMBÜPA, Israel Kahvangi hapakei enyüke: “Nebo am onyükei! Mehenangkü hayü lavüngtoiyei tuhphonghen. Kiriathaim am veü ponghühen, hatü neüei yahlanghen; jomei penyüsha veühühen hatü bentükhen.”

²Moab am kü üamiyao nevihnelühen; Heshbonei büpa vüshihhen phaüshah showhen: “Kei, jeni hapa jat dohtükshah! Oh Madmen, amao nendaihen; Yanlui am kü changhen.

³Horonaimlei vaüpü eepü bangtuh, depülaopü, benpülangpü ngeü longpü bangtuh.

⁴Moab am mahtükhen; hashih naüha thepnyüke.

⁵Jomphongi Luhith lemei shahyaki thepyaki aongnyüke; Horonaim lemei yiüjajü mahpüchahpü ngeü danei mongshangei thepnyüke.

⁶Nyaidaituh! laophü nying yangdaituh; Bhih kahdok kübü phaü gadu kei moktuh.

⁷Ammi ammei wong kü hatü mop kü monglempü nangkü am wüpküpei daihen, hatü Kemosh amao jomei ngongpathü, hatü lakchongbüthü omshi wüpküpei daihen.

⁸Jila ieyei kü mangtükhen am peikahen, hatü jila hükao aoei neyanghen. Kahji mahdaihen, shingmei kemei mangdaihen, shei SHEMBÜPAi eteke.

⁹Moab am shing mahngsha temei tuhtuh; ha lomi mahdaihen hatü halei shennyak nenyuhen.”

¹⁰Üpai SHEMBÜPAlei dou nedüknya, ha shennyak kü thaüvaü hettuh. Üpai iy neyenhüi laophülei yanlu shümlangnya, büpa thaüvaühütuh.

¹¹Moab amü panghinüng nyiushemmei kü nyuhampeih; Dük hük kübü hük shei necheitei-i dükshongei nyupü yiü keiha, chemao wüpküpei mangdai. Hanangkü büpa kü ngü meipü nemangdai, nevaijü hapalei vong büpü neyeiya-i nyüke.

¹²Shejao ngei büpa dük leipü büpa cheiyei ngaitükhen; hathüi dük kongtükhen, hatü büpalei yungshong bhaotükhen, ngei shennyakthü shomhen nyihthü ngoikünyüke shei SHEMBÜPAi enyüke.

¹³Israel ami Bethel kü hinglempü homei veü pongpü keiha Moab amao Kemosh kü hinglempü nangkü veü ponghen.

¹⁴“Hamü hampathü, vehok kü monglongpü veshanthü” shei mekei ami eaoknya?

¹⁵Moab am jütükhen, hatü jomei jilathü hahtükhen; jomei peü mü meipü nethethü jüshingei müei daihen shei ongpa, üpalei men Jeiyong SHEMBÜPA nyu, büpai ha enyüke.

¹⁶Moab am dohen yopailei nyüke; büpa kü vongshüh lomi peikahen.

¹⁷Büpa kü shonei nyupü peüi, büpalei menmei jung nyingpüthü peüi büpa kü mahng thepeishuoh; Hapalei wong kohpü shahkungnyü mangdaiteke; Hapalei müknyinshekhang, hatü wong neshiüi leidaiteke.

¹⁸Nüngei müknyinshekhang kübü chongei shühkei, hatü kübhih kü kahdokei uotuh, Oh nela Dibon kü nyupüthü; Mehenangkü üpai Moab am mahtükpa, hapa am khüei peikahen, hatü ammei chingnyüthü bentükhen.

¹⁹Lemnyülei yaongtü veituh, am Aroerlei nyupüthü. Nyaiyei daiküpü bahathü, yangei daiküpü nyühathü kü, “Mehe vamküpa?” shei phetuh.

²⁰Moab am veü dangteke, mehenangkü ha mangtükteke; Thepeiyoungtuh! Moab am mahtükteke shei Arnon yungyen phungei baongtuh.

²¹Kahji kü nyupü hathü chingnyüthü kü shahphenpü peiteke: Holon, Jahzah hatü Mephaath,

²²Dibon, Nebo, hatü Beth-Diblathaim,

²³Kiriathaim, Beth-Gamul hatü Beth-Meon,

²⁴Kerioth, Bozrah hatü taishi yoshi nyupü Moab kahdok kübü jilathü peü.

²⁵Moab amei vaung bhagtük, hatü lak mangtükteke shei SHEMBÜPAi enyüke.

²⁶Moab am yiüi chokhütuh; mehenangkü büpai ngei khüei yaongteke; Moab am laophüi bhaipü kü lepeilükei lemhütuh hatü mihnyiyangnyai am leihen.

²⁷Güh-ei, bhahlah-ei neyepjao Israel amü am shingvaishi mihnyiyangnyai kei nyupeih; shejao mechem ami jom nang ehenshang yaüeilungei ngaüm dhihampeih.

²⁸Oh Moablei nyupüthü, ammei jilathü tuhphongtü yaongvakei aongei nyutuh! Yaongvaksho kü athubai jep linghahpükei nyutuh.

²⁹Moab am changmeipü jung ngei dantepih; jom longi changmeinyüke. Jom longi nebahnevai, mongdangei mih kü naamei deihnyüke.

³⁰Jomi mih kü naamei deihpü ngei nyingnyüpeih shei SHEMBÜPAi enyüke; jom changmeipü angsha, jomei dou angsha leidaihen.

³¹Hanangkü ngei Moab am nangkü thepnyeih, Ngei Moab am peü shingvaishi lennyüpeih; mehenangkü Kir-Heres nanglakthü nangkü ngei mahng thepnyeih.

³²Jazer am nang mao nyeipüba ngei am shing thepnyüpeih. Oh Sibmah nyalingngupai! Nüngei kaothü phaakei daipü yungching thahteke, hatü Jazer yungching ngoiteke. Shejao nüngei betjükshüm, hatü nyalingngupai kah kü ha mangtükhen am peiteke.

³³Kahcheü kohpü Moab kahdok leipü mongongmongle yahlangteke; Yiü bhitshing leipü yiü yenpü ngei dohtükpeih; Üpaiyao mongongpai yiü nebhitnyu; Lenpü wongpü nyujao hapayü mongong mongle ngeü nevai.

³⁴“Jomi vaüpü eepü ngeü Heshbon kübü Elealeh hatü Jahaz thahshi, Zoar kübü Horonaim hatü Eglath-Shelishiyah thahshi dainyüke; mehenangkü Nimrim yungao jepdaiteke.

³⁵Moablei vaümchongthü kü moila shuohpüthü hatü jomei kahvangthü kü ayingshü jakpüthü ngei dohtükkemhen” shei SHEMBÜPAi enyüke.

³⁶Hanangkü liping ngeü keiha Moab nangkü hatü Kir-Heres nanglakthü shingvaishi thepnyüpeih; mehenangkü jomi dangpü mophimothü mahdaiteke.

³⁷Mehenangkü peüi sho hatü jumum chaei kuptükteke; peüei lakei makaw nyüke, hatü peüei shüng kü dhoila ashaki ngeihshi nyüke.

³⁸Moab amei shem adok kemeilei hatü chingyangshong peüei meheyao nevai, mahng theppü mon maei nyüke; mehenangkü ngei Moab amü üpaiyao nenapü haümdük keiha bhaotükpeih shei SHEMBÜPAi enyüke.

³⁹Ha mekei bhaodaipa! Jom mekei mahng thepnya! Mekei Moab ami veüpai dok lepdainya! Moab amü mihnyiyangnyai hatü pinnyü shonei nyupü nanglakthü shingvaishi eelanyongnya leidaiteke.

⁴⁰SHEMBÜPAi hapakei enyüke: Veituh, ngei alang kei laongei shahen, hatü Moab am khüei ngelei yang paanhen.

⁴¹Kerioth am hahtükhen, penyüsha shümlanghen. Hapa nyih Moab am hampathülei mongü nyüha hük hapeü bühshingkü maanpükei maandaihen.

⁴²Moab am mahtükhen hatü jat hük shei netuhhen; mehenangkü pinnyüi SHEMBÜPA khüei yaongteke.

⁴³Nyempühanpü, kahsha hatü tai nüng touei nyüke, Oh Moab nanglakthü shei SHEMBÜPAi enyüke.

⁴⁴Üami nyemei nyainya, kahsha kü vühen, Üami kahsha leipü bakei vamnya, tai kü manhen; Mehenangkü ngei Moab am kü hanghihühen vangbong kü ha koei peihen shei SHEMBÜPAi enyüke.

⁴⁵Heshbon amei vangdhüm phangkü benhathü mekei neyah-i yaongshi nyüke, Sihon ongpai vanglem lempü chingnyü aw vameihahtükteke. Hapai Moab amei shangba, hatü changmeipüthülei shangjing vang hahtükteke.

⁴⁶Oh Moab am onyükei! Kemosh nanglakthü mahdaiteke; Ammei hapeüthü wüpküpei yah-ei lüdaiteke.

⁴⁷Shejao shomshi ngei Moab am kü moihimanhen shei SHEMBÜPAi enyüke. Moab am kü shahphenpü hajük thahshi mon.