Read Phom Naga JEREMIAH 5 Bible Online

JEREMIAH 5 - Phom Naga bible

JEREMIAH 5

¹Jerusalem nanglakthü, ammei chingyangshong kü longteihümao; Shinei veituh, hatü deihhümao, shoukhinuk peü kü yemhümao. Hingshangi nyupü hatü shahhing yempü shennyak hük dangkao dangjema, ngei hapa chingnyü kü mang tükhen.

²Jomi, “Vanyangyem SHEMBÜPA nyüpeih” shei ejao shahshemi lahnyüke.

³Oh SHEMBÜPA, nüngei müki shahhing kü neveinyu je? Nüngi jom kü bheiteke, shejao jom kü tüngei nepeinyu; nüngi jom kü ngümshuohjao, jomi yeanpü neyahnyu. Jomei mong yaong mao vaanpüba leinyüke, hatü jom mong lepei neleinyu.

⁴Hahepak kü ngei, “Hathüyü taopathü, jomphong kü sholi neshiü; mehenangkü jomi SHEMBÜPAlei lem, hatü Kahvangei shahkung nenying.

⁵Ngei shemmeithü touei heihshah, hatü jom mü eteishah. Shejao jom peü aihük mü SHEMBÜPAlei shahkung mangtük, hatü jom kü shapü laitükteke.

⁶Hanangkü phaü leipü mailangi jom jütükhen; bhih kahdok leipü shuwi jom hahtükhen. Shahnyü hük jomei chingnyü khüei danei nyüke; üam haleipü laoei daijahen khih mü shaaktükhen; mehenangkü jomei mang longi, hatü ven nedanpü ahshi longshi nyüke.

⁷Mekei etü ngei am kü mang tükaokhen? Ammei hapeüthüi ngei yakphongteke, hatü Kahvang nevaipü kü khümnyüke. Mechem ngei jom kü moh-ei ühshuohhen, jomi mükbungjuyung düknyüke, hatü büm yupü amei shemei küpshi nyunyüke.

⁸Jomphongü het-i ngangei angpü koyei chebaong iyjeiphaileipükei, chingyowpalei nyüha lümnyüke.

⁹Henüng keipü douthü kü ngei jom kü hanghi neshuohhen je? shei SHEMBÜPAi enyüke. Henüng jatli kü ngei bhüh neyemhen je?

¹⁰Pinnyülei nyalingngupai kahlei aongei hathü mangtüktuh, shejao peü payü temangtük; kaothü kemei louhtüktuh; mehenangkü hathüyü SHEMBÜPAlei nevai.

¹¹Mehenangkü Israel hatü Judah am phangü ngei kü lanshei hingnelem shei SHEMBÜPAi enyüke.

¹²Jomi SHEMBÜPA nang shahshem eteke, hatü, ‘Büpai meheyao nedükphapih. Jen kü mehe tenao nepeiküpih; münghishaü, hokpüheipü meheyao ne-eepih’ ” shei eteke.

¹³Thibüthüyü vanglük kei mon; mehenangkü epü shah jomei mongei neshiü. Hanangkü ha jom kü dükshuohhen.

¹⁴Hanangkü Jeiyong SHEMBÜPAi hapakei enyüke: Jomi ha shah epü nangkü, ngei shaang ngelei shah nüngei ju kü aw kei leihünyeih, hatü hathü nanglakü pü keiha hapa awi hathü hahtükhen.

¹⁵Ngei am touei tailu leipü jat hük müei leikahen, Oh Israel am phang shei SHEMBÜPAi enyüke. Hapayü aivang mebü nyupü jat hük; ammi jomei shah nedan nevaijü jomi mehe enya ha ami nedanaokhen.

¹⁶Jomei lahhanü apshi nyupü mahngchong kei nyüke; jom peü wong kohpü hampathü nyüke.

¹⁷Jomi ammei hah hatü hahying hahtükhen, jomi ammei hahimoithü jütükhen; jomi ammei yemhimakthü hahtükhen; jomi ammei nyalingngupai, hatü adhajük hahtükhen. Ammi mongnyangpü penyü showtükpü chingnyü jomei yani mangtükhen.

¹⁸Shejao hathü nyih kü dangkao ngei chemjalak kü payü nedohtükhen shei SHEMBÜPAi enyüke.

¹⁹Mechem ammei nanglakthüi, “Mehekei SHEMBÜPA, jenei Kahvangi jen kü hathü dou dükphünya?” shei ehen; ha kü ammi, “Ammi ngei yakphongtü ammei kahdokei kung amei kahvang chongphopü nangkü hapa kahdokei ammi nenyingpü kung am chongphohen” shei etuh.

²⁰Hapayü Israel am phang kü eyeishuoh, hapa Judah am kü baongeishuoh.

²¹Oh ngapa hatü sholi neshiüpü nanglakthü; am kü mük nyüke, shejao ne-eenyu; am kü dhaong nyüke, shejao nedannyu.

²²Ngei kü nenyemnyu je? shei SHEMBÜPAi enyüke. Nüngi ngei touei nekheünyu je? Ngei yungching kü viongü bhih moni kungtü tuhpeih; lenei neheihhen mü denshing viong lingpeih; yungmoki yung lemei heihjao hapai neaoknyu; jom ngüngjao jomi ha peih-ei neheih-aoknyu.

²³Shejao hapa nanglakthü kü vaanpü, hatü khüpü mongdang nyüke; jom yaakei lüdaiteke.

²⁴Jomi jomei mongkü, “Jeni SHEMBÜPA, jenei Kahvang kü nyemshah, büpai jen kü dühü ieyei kü vang shomnyeih; Ünyü hatü lem hepak kü vang shuohnyeih; hatü hah vethen hepak itei shuohnyeih.

²⁵Ammei mangi hathü keütükpeih, hatü ammei mangi meipü nedangi leitükpeih.

²⁶Ngelei nanglak khongkü shennyak tenthü nyüke; mih lomohhütü jom vangmeinyüke. Jomi hangku manhen nangkü tai haennyüke.

²⁷Ou maei hüpü outuw keiha, jomei shemü gühdoui maei nyüke; hanangkü jomü longpü hatü shemmei leinyüke;

²⁸jom nitei hatü nyülüki leinyüke. Jom mang dou dükhen kü hajük shei neshiü; jomi shahhingi shahphen neshuohnyu; Jomi hashihhathü kü jomei jiüpü hean neshuohnyu, hatü ponghahpüthü kü shahhing nedükshuohnyu.

²⁹Henüng keipü douthü kü ngei jom kü hanghi neshuohhen je? hatü hapa keipü jat kü ngei bhüh neyemhen je? shei SHEMBÜPAi enyüke.

³⁰Nyembenüng hatü yashanbenüng dou hapa kahdok kü vamteke;

³¹thibüthüi shahshem teteivannyüke, hatü ngongpathüi thibüthüi epükei vanglem lemnyüke; ngelei ngongpathüi hapa lümnyüke. Shejao hathü kemei dohjü jomi mehe dükhen?”