Read Phom Naga JEREMIAH 52 Bible Online

JEREMIAH 52 - Phom Naga bible

JEREMIAH 52

¹Mechem Zedekiah ong vaipa, büpa bong hapühük behe nyu, hatü büpai Jerusalemei bong anpühük ong vai. Büpalei chenyü-ü Jeremiahlei yiükha Hamutal nyu; pinnyü-ü Libnah leipü nyuteke.

²Jehoiakimi dükpü keiha büpai SHEMBÜPA touei mang dou dük.

³Hapayü SHEMBÜPAi mongshihpü nangkü hathü peü Jerusalem hatü Judah kü vampeih, hatü dohpülei büpai hathü büpa toueipü changtükpeih. Shaang Zedekiah ongpai Babylon ongpa khüei yaong.

⁴Hanangkü Zedekiah ong vaipü bong shü mü lenyang an mü nyih anpabü kü Babylon ongpa Nebukadnezzar Jerusalem khüei büpalei veshanthü peü mütü pei. Jomi chingnyü haolei baümtap ve, hatü hapa kü shinei ching shümhen douthü dükteke,

⁵hatü hapa chingnyüyü Zedekiah ongpa ong vaipü bong anpühükpabü thahshi shümei tuhteke.

⁶Lenyang ali mü nyih shüpabü kü chingnyü mongei aeipülepü longi mangshi vampü nangkü nanglakthüi hahhen hahying neshiüi lei.

⁷Hahepak kü hapa chingnyü bham mangtüktü veshanthü peü nyaidaikem. Chingnyü kü Babylon am shinei nyujao ongpalei pe yopailei bham nyi aa kübü shaden homei yanüng nyak kü jomi chingnyü tuhtü lüdaikem. Jom Arabah lemei nyaidai,

⁸shejao Babylon am veshanthüi Zedekiah ongpa kü changei daiyei Jeriko kahjilei büpa she yei. Büpalei veshanthüi büpa tuhtü nyaidaikem,

⁹hatü büpa yep. Büpayü Hamath kahdok Riblahlei Babylon ongpa touei müei lei; halei büpa nyonghütü hanghi shuoh.

¹⁰Riblahlei Babylon ongpai Zedekiahlei hapeüthü büpalei müki eeshi jü; büpai Judah am lakchongbüthüao jütük.

¹¹Hapheikü büpai Zedekiahlei mük luktük, hatü nyiamvüi shatü Babylonei leiyei büpa dipü nyih thahshi khoklatei tuh.

¹²Babylon ongpa Nebukadnezzar vanglem lempü bong anpüshü mü lenyang nga mü nyih anpabü kü Babylon ongpa chongphopü ongpalei veshan mübü Nebuzaradan Jerusalemei peiteke.

¹³Büpai SHEMBÜPAlei shem, ongshem hatü Jerusalem leipü shemthü peü kü awi hap. Shongnyü shemthü peü büpai shamtük.

¹⁴Ongpalei veshan mübüi mütü Babylon veshanthüi Jerusalem shinpü bhamthü kemei bentük.

¹⁵Ongpalei veshan mübüi longi taopathü hatü chingnyülei tuhphongpü shennyakthü mü lahhinei dou dükpüthü, hatü Babylon am mü shepdaipüthü hanei wüpküpei müei dai.

¹⁶Shejao Nebuzaradani aopü taopathü nyalingngupai kah hatü lebü kahthü linghen tuhphong.

¹⁷Babylon ami SHEMBÜPAlei shemei nyupü melangnyiam shemnyüthü, koei daiaokbenüng la, lakhühteipü melangnyiam chilimji mangtük hatü melangnyiam kemei Babylonei koei leidai.

¹⁸Jomphongi dük, haolak, moidü leipü awnih hokteipü shung, iy shangteipü dük, hatü phopshemei noteipü dük hatü melangnyiamthü peü koei leidai.

¹⁹Ongpalei veshan mübüi chilimji, awtao shihteipü shung, iy shangteipü shung, dük, awdükshong, dük hatü chilimjithü peü daülangpü hon hatü ngini lingpü koei leidai.

²⁰Shemnyü nyi kübü melangnyiam, lakhühteipü melangnyiam shung, ha phangkü nyupü melangnyiami lingpü mohohbaong anpünyi, koei daiaokbenüng la, dokhen neaoki Solomon ongpai phopshemei noteihen lingteke.

²¹Shemnyü ieyei kü meter 8 shaoshi, hatü büm kü meter 5.3 nyuteke. Hapa kü sha kohshi hatü chetpü kü millimeter 75 nyuteke.

²²Melangnyiam yah-ei shemnyü ju lingpü ieyei kü meter 2.2 shaoshi, hatü hapa kü shinei pomegranat betjük bakei ow lingtü nyu. Hükpa shemnyü kao pomegranat betjük baktü aihük mü nyu.

²³Hapa pomegranat betjük hapa ow shangkü shihpeyü peüshep kho hük nyu; ha khongkü büalipüanpüvokü kahdok leipü veijü eeshi nyuteke.

²⁴Ongpalei veshan mübüi ngongchong Seraiah, nyipabü ngongpa Zephaniah hatü shaden yombüthü jom jemi yepei khoklatei yah-ei dai.

²⁵Chingnyülei nyupüthü khong kübü büpai veshan kü lakchongbü vaishi mübü hatü ongpa kü shahnying eteipü shennyak nyet yah-ei dai. Büpai shao chingnyülei nyushuohpü shennyakthü nyükei thaiteipü veshan mübülei lakchongbü hatü lebü shongnyü shennyak pejem thahshi müei dai.

²⁶Nebuzaradan veshan mübüi hathü peü yah-ei daiyei Riblahlei Babylon ongpa touei müei dei.

²⁷Hamath kahdok Riblahlei ongpai hathü jütük. Hanangkü Judah am laophülei kahdok kübü yanei wüpküpei daiteke.

²⁸Hapayü Nebukadnezzari wüpküpei müei daipü nanglak bhei-ie: büpa ong vaipü bong nyetpabü kü Judah am 3, 023;

²⁹Nebukadnezzar ong vaipü bong anpüshetpabü kü Jerusalem leipü nanglak 832;

³⁰büpa vanglem lempü bong hapüjempabü kü Judah am 745 thahshi ongpalei veshan mübü Nebuzaradani wüpküpei müei dai. Nanglak peüshep 4, 600 nyuteke.

³¹Judah am Jehoiakin ongpa wüpküpei nyupü bong hapüanpünyetpabü kü Babylon kü Evil-Merodakh ong vaiteke. Büpai Judah ong Jehoiakin kü bamei deih hatü len anpünyi mü nyih hapüngapabü kü khoklat leipü veshuohteke.

³²Evil-Merodakh-i büpa kü bampü kohshi shah etei, hatü büpa mü Babylonei nyupü lebü ongthü mü shaopüba dhüm kohpü uoshing kü uohü.

³³Hanangkü Jehoiakini büpalei khoklat leipü ow bhühtüktü düngei ongpalei nükdülei hahyingei nyu.

³⁴Nyihjeih, Babylon ongpai Jehoiakin yemmü nyupü thahshi, dipü nyih ngoishi düngei hahying changshi shuohteke.