Read Phom Naga YOUNG LAI 1 Bible Online

YOUNG LAI 1 - Phom Naga bible

YOUNG LAI 1

¹Chemü shennyak maei nyupü chingnyü, shaang mekei lavüngtoidaipa! Pinnyü chemü jatthü peü mü longpü vaihampü, shaang mekei vaümnyü kei leidaipa! Pinnyü chemü ongchingthü shak kü onglanyü vaihampü shaangü aa leidaiteke.

²Vangnyak kü pinnyüi shahyaki thepnyüke, pinnyülei omdhaong kü mükphi yennyüke. Pinnyülei nyanaü anüng üpaiyao pinnyü nyiushem meihühen neshiü. Pinnyülei mongkhen küphüthüi pinnyü yutük, peü pinnyülei ve leidaiteke.

³Shangpong yakyingi maei, aa keiha shem kübü yanei Judah am wüpküpei daiteke; Pinnyü shaangü mihjat mihli mü nyiumeishing nedangi nyüke; Pinnyü shangpong yakyingpü chi kü pinnyü kü changpüthüi pinnyü she yeiteke.

⁴Zionlei aongpü lemnyüao youngteke; Mehenangkü üpaiyao hapa lemnyü kü mohitap kao nelingleinyu. Pinnyülei penyüsha vüngmaki küpdai, haleipü ngongpathüao youngnyüke; haleipü nelathüao mongshangnyüke, hatü pinnyü-ü shahyakpü mongshang kü nyüke.

⁵Pinnyülei vepathüang shembü leidai, pinnyü kü khüpüthüang daeishenyüke; Mehenangkü pinnyülei mang ahshi longpü nangkü, SHEMBÜPAi pinnyü shangponghü, pinnyülei moihiyangthü sheteishangei wüpküpei deilangteke.

⁶Hapa Zion kübü dhemeilaüma dawdaiteke. Pinnyülei longhiongthüyü het hahshing nedangpü shaok kei nyüke; Aeiyei wong kemdaitü changpüthü tou kübü nyaidainyüke.

⁷Pinnyü shangpong yakyingpü nyih Jerusalemi pinnyülei aivang mebü mophimo deih-ei dangnyüke. Mechem pinnyü vepalei lak kü aongpa, pinnyü khüambakhen, young cheihen üpayao neshiü. Pinnyü lomohpü eeyei vepathüi “Hüha” shei nyinyüke.

⁸Jerusalemi ahshi nemei-i mang thahteke, hanangkü pinnyü-ü nedaüpü eelanyongnya leidaiteke. Üami pinnyü kü dhüm shuoh, hathüiyao pinnyü yakphongteke; Mehenangkü jomi pinnyü bümkong, hatü mahng theppü, hatü veüpong kü eeteke.

⁹Pinnyü nedaünelangpeyü pinnyülei büm-ow kü khashi nyüke; Ngoikahen nang pinnyüi deih-ei nelenyu; Pinnyü dopü nyemshi hanshi; üpaiyao pinnyü nyiushem meihühen neshiü. Pinnyülei vepathüi neüshuohpü nangkü, “Oh SHEMBÜPA, sheühshih” shei enyüke.

¹⁰Vepathüi pinnyülei mophimo kemei gühlang; phopshem mongei shühen nejiüpü kung amiyao halei shüpü jomi eeteke.

¹¹Pinnyülei nanglakthüi hahying yemei thepnyüke; Shümoh meihen nangkü jomei dounyünangba yutükkemnyüke. Veituh, Oh SHEMBÜPA, hatü ngei ponghahpü eelangshih shei enyüke.

¹²Ngei kü veihümao, amphong peihpü leipüthü; SHEMBÜPA, büpai mongshih anei ngei kü shuohpü hanghi kei üpaiyao nepongangpih.

¹³Büpai shanglemeipü aw shom, hatü hapai ngelei vang mongei bah; Büpai ngelei lem kü tai haen, hatü kahdokei shüei vü; Büpai ngei yakphong, hatü helu tüngei tuhphong.

¹⁴Büpai ngelei mangthü nyingei pang hük kü shaphong; büpalei laki hathü kü ngei nyenphong. Büpai hathü ngelei üng kü yükphong; hapa vihpai ngei wong kemdai. SHEMBÜPAi ngei vepathü kü shuohtük; ngei jom khüei neyaongaok.

¹⁵SHEMBÜPAi ngelei veshanthü kemei yahlak neshiüi leitük; Büpai ngelei nethethü, hatü ngelei Judah nelathü nyalingngupai kü kei ngümtükhen veshanthü shom.

¹⁶Hanangkü ngei youngnyüpeih; ngelei mük kü mükphi yennyüpeih. Ngei nyiushem meihühen, ngei mongyanghühen üpayao neshiü; Ngelei hapeüthü lakkong nyüke; Mehenangkü vepathüi aoklangteke.

¹⁷Zioni lak yüpnyüke, shejao pinnyü kü sheühhen üpayao neshiü; Jakobei chingyowthü büpalei vepa leihen SHEMBÜPAi hanteke; Jerusalemü jom touei jiühitbenüng leidaiteke.

¹⁸SHEMBÜPAyü shahhing, shejao ngei büpai epü khüei yaong; Banghümao, am nanglakthü, ngei ponghahpü kü veihümao; Ngelei thehilathü kemei wüpküpei deilangteke.

¹⁹Ngei ngelei mongkhenthü kü nyük, shejao jomi ngei kü nesheüh. Ngelei ngongpathü hatü pahijeithüi hahying yemei longteipai chingshongei diyei nyüke.

²⁰Oh SHEMBÜPA, ngei meshük ponghahnya, veituh; Ngelei mongkü tüngnyüke, Ngei nüng khüpü nangkü, chingyangshongei jüteishangtei, shemongei dipü mahpü mon nyüke.

²¹Nyiushemmei neshiüi ngei theppü jomi danteke. Ngelei vepathüi ngei shanghahpü danteke; Nüngi ngei kü ha dükpü nangkü jom mongongnyüke. Ngei ponghahpükei ngelei vepathüi ponghahhen, nüngi lahpü nyih koei peikei.

²²Jomei mang dou kemei nüng touei peihütuh; Ngelei mang nangkü nüngi ngei kü dükpü keiha, jom kao hapakei dükeishuoh. Ponghahpai ngei thepnyüpeih, hatü ngei mongkü tüngnyüpeih.