Read Phom Naga YOUNG LAI 3 Bible Online

YOUNG LAI 3 - Phom Naga bible

YOUNG LAI 3

¹Kahvang mongshihpü nyiamlüngi bheipü eetükpeyü ngei hih.

²Büpai ngei vangngai neshiüpü shangmang touei müei deiyei dhühphongpeih;

³hatü helu shoei leiyei leiyei ngei kü üppeih.

⁴Büpai ngelei hangshuw hatü phai mintükpeih; hatü ngelei vang tettükpeih.

⁵Büpai ngei shahyakpü, hatü shangpongi jümei tuhphongpeih.

⁶Mahngsha leipü mahng keiha büpai ngei vangnyak kü tuhpeih.

⁷Ngei yanglem neshiüi büpai ngei kü pe showtüktü tuhpeih; büpai ngei kü nyiamvüi shatü tuhpeih.

⁸Sheühshih shei ngei lenei nyükjao, ngei phoppü büpai nedanlangpha.

⁹Ngei dailem peü büpai yaong longpai bangtük; Büpai ngelei lem kaokeinyomei lingtükpeih.

¹⁰Büpayü sheptao kei ngei danei nyunyüke; hatü mailang keiha laongei shüknyüke.

¹¹Büpai ngei lemhaoei changei deiyei khih mü shaaktü yakphong.

¹²Büpai laophülei lah haentü ngeiyü lah phuo leihüpeih.

¹³Büpai büpalei lahhan duw kübü lahhani ngelei mongdang kü kappeih.

¹⁴Ngeiyü jom touei mihnyi pü leitük; helu shoei jomi ngei kü naamei kesho venpeih.

¹⁵Büpai ngei shahyakpai mahüpeih, hatü hahying nangjei shahyakpü phenlak ühphopeih.

¹⁶Büpai ngelei dhe kü depla yah-ei jinphopeih; ngelei bha yaongphaang kü shaihüpeih.

¹⁷Ngei chingmeivangmei ne-eehü; mongongmongle mehe shangkü ngei betük.

¹⁸Hanangkü, “Ngelei dhemeilaüma lüdaiteke, hatü SHEMBÜPAleipü ngei monglempü kemei jaangdaiteke” shei enyeih.

¹⁹Ngei shangpong yakyingpü, hatü ngei loishing neshiüpü deihpeyü shahyak hatü leü nemeipü leidaiteke.

²⁰Ngei düngei ha deihnyüke, hatü ngelei laangha mongshangnyüke.

²¹Shejao mechem ngei hapa jung deihhen, ngei kü monglempü peinyüke.

²²SHEMBÜPA bampü longpü, mechemao dohpü neshiü, büpa phahji yahyang longpü mechemao nekemdainyih.

²³Jomphongü nepjeih ja kei khanha; nüng monglempü longpü nyüke.

²⁴“SHEMBÜPA ngelei lompü” shei ngelei laangha kü e. Hanangkü ngei büpa kü monglemei danhen.

²⁵SHEMBÜPA kü hinglempüthü peü kü, hatü büpa kü nyempüthü kü büpayü meipü nyüke.

²⁶Munenei SHEMBÜPAi yangphahen shei omdanei nyupü-üng meipüba.

²⁷Shennyak hük shingvaishi thehila hepak kü-üng pang paihen meipüba.

²⁸SHEMBÜPAi hapa kophüshingkü munenei nyuhen khih;

²⁹Hapayü jiüpeih shei yah-ei maanpü leihen khih; Mehenangkü shao-üng monglem peikahen aok.

³⁰Hanei ami nameen kü apphüjao, hatü yaüeilungei ephüjao hayao nenhen khih.

³¹SHEMBÜPAi phahjinyüke; büpai jen denden kü netuhphongpih.

³²Büpai jen kü mongshang shuohjao, büpai phahji huphahen; büpa bampü longpü nyüke.

³³Mehenangkü büpai shuohhüei üpa kao hanghi nevaijü mongshang neshuohnyih.

³⁴Kahdok kü khoklatei nyupüthü peü labha-i ngümtükhen;

³⁵Jaipüba touei shennyak hük kü jiüpü nedükpü;

³⁶shennyak hük kü shahhing nedükpü kü SHEMBÜPAi henüng keipü kü neveinyu je?

³⁷SHEMBÜPAi nedükpheikü üpai mehe etü hapa vamhüaokhen?

³⁸Jaipübalei ju kübü manghimei nyiphen vamnyu nevaipü je?

³⁹Jenei mang nangkü hanghi pongshingkü mehekei jeni eelahenang?

⁴⁰Jeni jenei lem dokei veishah, hatü SHEMBÜPA touei lepshah.

⁴¹Jeni jenei mongsha apshah, hatü jenei lak haongei vangsho Kahvang kü hapakei phopei eshah:

⁴²“Hami mang thahteke, hatü nüng khüei yaongteke; hatü nüngi ham kü mang netükpha.

⁴³Nüngi laophü nyingi mongshih-i jümtü ham küchangteke, hatü phahji neshiüi jüteke.

⁴⁴Hami phoppü peih-ei neaonghen mü nüngi laophü nyingi phumnyaki jümlangteke.

⁴⁵Nüngi hamphong mih jatthü touei nyüphinya kei leitük.

⁴⁶Hamei vepathü kemei ham khüei jomei ju longi kateke;

⁴⁷Hami nyemhivüng hatü pang heühahteke; shangpong yakying hatü mahpü chahpü heüteke.

⁴⁸Ngelei nanglakthü mahdaipü nangkü ngelei mük kü mükphi yungyen kei yennyüke.

⁴⁹Ngelei mükphi nedoh-i yenhen.

⁵⁰SHEMBÜPAi vangsho leipü veiyei mangee thahshi.

⁵¹Chingnyü kü nyupü nyühathü kü mehe vampa, ha eeshingkü ngelei mongkü tüngnyüke.

⁵²Ngei meheyao shaitükpü neshiüpü kü ve vaipüthüi ngei ouha kei jütükteke.

⁵³Jomi ngei kahshalei yemmü hütü ngei kü yaongi shükpeih.

⁵⁴Yungi ngei lümlangteke, hatü ngei didainyu khih shei deihpeih.

⁵⁵Kahsha shaongdoh leipü ngei nüng kü nyüknyeih, Oh SHEMBÜPA!”

⁵⁶“Ngei kü sheühshih, nüngei dhaong tehüdai” shei eshingkü nüngi ha danteke.

⁵⁷Ngei nyükshingkü nüngi ngei yopailei pei, hatü, “Tenyem!” shei nüngi ngei kü epeih.

⁵⁸Nüngi ngei kü dongkoli, Oh SHEMBÜPA! hatü ngei yemlei.

⁵⁹Ngei kü nejiüpü dükpü nüngi eeteke, Oh SHEMBÜPA! Nüngi hapa shah phenshih.

⁶⁰Jomi nemeipü dou dükpü nüngi eeteke, Oh SHEMBÜPA! hatü ngei khüei phaüshah showpü nüngi nyingteke.

⁶¹Jomi eelapü nüngi danteke, Oh SHEMBÜPA, hatü jomi ngei khüei tempü nüngi nyingteke.

⁶²Helu jomi ngei khüei nümnümnyüke.

⁶³Veihümao, jom uopü, yaongpü shing peü kü ngei kü naam kesho vennyüke.

⁶⁴Jomei doui shangpükei, jomei lakdou aimü yah-eishuoh, Oh SHEMBÜPA.

⁶⁵Jom mongshangi mahütuh, hatü nüngei thaüvaü jom kü hethütuh.

⁶⁶Mongshih-ei jom kü changtuh, hatü kahdok shak kübü jom thittüktuh.