Read Phom Naga EZEKIEL 10 Bible Online

EZEKIEL 10 - Phom Naga bible

EZEKIEL 10

¹Hahepak kü ngei veishuoh shingkü cherubimei shangjingei nyiam athen kei thuhpü shangei veiheni sapphir douvang yaongi lingpü ong uoshing kei vamei ee.

²Kahvangi nyemin ashak ümpü shennyak kü, “Cherubimei kharila aa kü shütuh, hatü awtao lakbaoh maei yah-ei daiyei hapa chingnyü kü haiyeishuoh” shei e. Ngei veijü büpa shüdai-i ee.

³Hapa shennyak shüpü hepak kü hapa cherubim phopshem pehe philei yaongshi nyu, hatü phumi mongpa shemshe mateke.

⁴Hahepak kü SHEMBÜPAlei müknyinshekhang cherubim toueipü phopshem shaden thahshi vam; phopshemü phumi maei nyu, hatü shemshe thahshi SHEMBÜPAlei müknyinshekhang nyapai maei nyu.

⁵Cherubimi yang dheüpü chingshe thahshi dan, hatü hapayü Jeiyong Kahvangi epü ngeü kei nyuteke.

⁶Mechem SHEMBÜPAi hapa nyemin ashak ümpü shennyak kü, cherubimei kharila toueipü aw yahtuh shei eshuohpa, büpa mongei shüei kharila touei yaongteke.

⁷Cherubim khongkü hüki cherubim toueipü aw kü lak lüei yiüei aw hanei yah-ei nyemin ashak ümpü shennyak kü shuoh, hatü büpai hapa yah-ei lüdai.

⁸Cherubim keyü jomei yang phangkü shennyakei lak keiha nyuteke.

⁹Ngei veishuohjü cherubim phangkü kharila ali nyu; cherub ieyei hükbaong heshap nyu, hatü veiheni kharilayü beril douvang yaong nyapükei nyuteke.

¹⁰Veiheni aliphen aihük mü, kharila ieyei kharila hük kü nyi anei vetpükei nyuteke.

¹¹Jom daishingkü lem aliphen lebü lemei neleplüki dai, shejao sheleipü kharila melemei meehen, lebüthüao neleplüki daiteke.

¹²Jomei büm, kharila kam yang, kharila aliphen kemei kü shinei mük mon nyu.

¹³Ngei hapa kharilathü kü, “Alüngleple kharilathü” shei nyükei dan.

¹⁴Cherub ieyei kü dhe ali baong shiüteke: Dhe hükü cherubei dhe kei, nyipabü dheyü shennyakei dhe kei, jempabü dheyü mailang dhe kei hatü alipabü-ü alangei dhe kei shiüteke.

¹⁵Cherubim yaongteke. Hathüyü ngei Kebar yungyenei eepü yemhathü nyuteke.

¹⁶Mechem cherubim daipa, hathü phangeipü kharilathüao kam, hatü mechem cherubim pihen yang paanhenshang, kharilathü melemeiyao neleplük.

¹⁷Mechem cherubim yaongdaihen, hathüao yaongdai; hatü mechem cherubim layaongei dai, hathüao chemi dai; mehenangkü yemhalei laangha jomphong kü nyuteke.

¹⁸Hahepak kü SHEMBÜPAlei müknyinshekhang phopshem shaden toueipü daiyei cherubimei dok kü bak.

¹⁹Mechem ngei veishi nyupa, cherubimei yang paanei kahdok leipü piyei lüdai, hatü kharilathüao hathü mü lüdai. Jomphong SHEMBÜPAlei shem heongphi shadenei shü, hatü Israel Kahvangei müknyinshekhang jomphong shak kü nyuteke.

²⁰Hathüyü Israel Kahvang phangkü Kebar yungyenei ngei eepü yemhathü nyuteke, hatü hathüyü cherubim khih shei ngei deih-ei dang.

²¹Jom peüei dhe ali baong, yang ali baong, hatü jomei yang phangei shennyakei lak kei nyuteke.

²²Jomei dhe mepa lepa shei eshuohjü, jomü ngei Kebar yungyenei eepü yemhathülei dhe kei nyuteke. Jom peü laülüki she philei daiteke.