Read Phom Naga EZEKIEL 12 Bible Online

EZEKIEL 12 - Phom Naga bible

EZEKIEL 12

¹SHEMBÜPAi ngei kü e:

²Shennyak ha, nüngü dokteikhaungkheipü nanglak chi kü nyunyüke. Jom kü veihen mük nyüke, shejao ne-eenyu; banghen dhaong nyüke shejao nedannyu.

³Mehenangkü jomü dokteikhaungkheipü nanglakthü khih. Hanangkü shennyak ha, wüpküpei daihen hanggo temtuh, hatü jomi eeshi nyihnüng nüng wüpküpei dainyu keiha shing hük kübü shing hükei jomi eeshi daituh. Dokteikhaungkheipü jatli vaijao üpai nyingpa, jomi ha nyinghen aokpeih.

⁴Nüngei hanggo jomi eeshi nyihnüng temei ngaituh. Wüpküpei daipüthüi dükpü keiha jomi eeshi om kü nüng vamei daituh.

⁵Jomi eeshi bham lowtuh, hatü hapa homei hanggo koei daituh.

⁶Jomi eeshi hanggo anei nüngei bhagchongei paitü vangnyakei ha koei daituh; nüngi meheyao ne-eehen mü mük kü shaklangtuh; mehenangkü ngei Israel am phang shingvaishi nüngü lappü hük leihünyeih.

⁷SHEMBÜPAi epü keiha ngei dük. Wüpküpei daipü amei hanggo kei temtü ngei ngelei hanggo koei nyihnüng vam, hatü om kü ngelei laki bham lowteke, hatü jomi eeshi ha kotü vangnyak kü dai.

⁸Nepnüng dhom mü SHEMBÜPAlei shah ngei touei peiteke:

⁹Shennyak ha, dokteikhaungkheipü Israel am phangi nüng kü, “Nüng mehe lingnya?” shei ne-ephaangpü je?

¹⁰SHEMBÜPAi hapakei enyüke shei hathü kü etuh: “Hapa shah-ü Jerusalem leipü ong hatü haleipü Israel phang peü kü enyeih.”

¹¹“Ngeiyü am shingvaishi lappü hük nyüpeih: Ngei dükei hupü keiha hathü kao hapakei dükhen; jomü wüpküpei daihen” shei etuh,

¹²hatü jom mü nyupü ongpai laophülei bhagchongei hanggo chantü vangnyak kü daihen; büpai bham lowei ha homei koei daihen; büpai kahdok ne-eehen mü dhe kü jümtüktü daihen.

¹³Ngei shang haenhen hatü ha kü büpa manlanghen, hatü ngei büpa Babylon kahdok büpai chemao mangeepü shingei deishihhen, hatü halei büpa dihen.

¹⁴Büpa shonei nyupü büpalei sheühbüthü, hatü veshanthü peü vanglük kü haitükhen hatü jom pheikü müshi vepathüi jühen yemhen.

¹⁵Mechem ngei jom jatthü hatü kahmükthülei haitükhenshang, jomi ngeiyü SHEMBÜPA shei nyinghen.

¹⁶Shejao jom daipü jatthü kü jomi dükpü jiühitpü douthü jung ejahen shingvaishi ngei jom hanei yanlu, shaühile hatü chamhilem kübü yangei tuhhen. Shejüang jomi ngeiyü SHEMBÜPA shei nyinghen.

¹⁷SHEMBÜPAi ngei kü e,

¹⁸Shennyak ha, kheüyaki hahtuh, nyemei nenyaki yingtuh,

¹⁹hatü hapa kahdokei nyupü shennyakthü kü etuh: Israel kahdok Jerusalemei nyupüthü kü SHEMBÜPA Kahvangi hapakei enyüke: Jomi nyemyaki hahhen, hatü mongshangyaki yung yinghen; mehenangkü halei nyupüthüi üpteilenteipü nangkü hapa kahdokei nyupü lemphüli mahdaihen.

²⁰Shennyak nyupü chingnyü lavüngtoiyei leidaihen, hatü kahmükao hapakei leidaihen; shejüang ngeiyü SHEMBÜPA shei ammi nyinghen.

²¹SHEMBÜPAlei shah ngei touei pei:

²²“Shennyak ha, Israel kahdokei amphongi, ‘Hepakü daikhan dainyeih, hatü tetpüvanpü kemei nejiüshasha hih’ shei eteipü kandok shah hayü meheang?”

²³Hanangkü hathü kü, “SHEMBÜPAi hapakei enyüke shei etuh: Ngei hapa kandok shah dohtükhen, hatü Israel kahdok kü hajük kü hapa kandok shah nenoteihen nyihthü yopailei peikünyüke, hatü tetpüvanpü kemei dhaümkahen” shei etuh.

²⁴Israel phang kü hajük kü shahshem manghkhang nevaijü yawhpüyangpü tethivan nenyuhen.

²⁵Shejao ngei, SHEMBÜPAi mehe ehünya, ha ehen hatü ha nephei-i dhaümkahen. Mehenangkü ammei nyih kü-üng, Oh dokteikhaungkheipü jatli, ngei mehe enya, ha jiühühen, shei Jeiyong SHEMBÜPAi enyüke.

²⁶SHEMBÜPAlei shah ngei touei pei:

²⁷“Shennyak ha, ‘Büpai eepü manghkhangü vangbong longi pheikü jiühen nang hih; büpai pheilei ngoikahen nang mon eenyüpeih’ shei Israel am phangi enyüke.”

²⁸Hanangkü SHEMBÜPAi hapakei enyüke shei hathü kü etuh: “Hajük kü ngelei shah hükao nedhaümi nenyuhen, shejao ngei epü peü jiükahen shei SHEMBÜPA Kahvangi enyüke.”