Read Phom Naga EZEKIEL 13 Bible Online

EZEKIEL 13 - Phom Naga bible

EZEKIEL 13

¹SHEMBÜPAlei shah ngei touei peiteke:

²Shennyak ha, Israel am thibüthü üamphong teteivanei enya, hathü nyonghüei teteivanei etuh; laophü kü deihja deihja kei tetpüvanpüthü kü, “SHEMBÜPAlei shah bangtuh” shei etuh.

³Jeiyong SHEMBÜPAi hapa enyüke: Manghkhang ne-eepü kü laophü kü lepükei epü thibüthü onyükei!

⁴Oh Israel, ammei thibüthüyü ching hahtükpü chingkongei nyupü mahuthü kei nyüke.

⁵Ammi Israel am phang shingvaishi bendaipü bham nelingpü nangkü SHEMBÜPAlei nyih kü ammei vepa kü khangei neyaongaokpih.

⁶Jomei manghkhangü nejiü, hatü jom tetpüvanpü kemei shahshem. SHEMBÜPAi jom neshomshomi, “SHEMBÜPAi hapakei enyüke” shei enyüke hatü jomi epü nyemjiüja shei deihnyüke.

⁷Ngei jom kü ne-epü kü, “SHEMBÜPAi hapakei enyüke” shei epai jomei manghkhangthüyü nejiü hatü jomi tetpüvanpeyü shahshem khih shei ne-eangpü je?

⁸Hanangkü SHEMBÜPAi hapakei enyüke: Ammi nejiüpü manghkhang eyei, hatü shahshemi tetpüvanpü epü nangkü ngei am khüei nyüpeih shei SHEMBÜPA Kahvangi enyüke.

⁹Ngelei lak nejiüpü manghkhang eepüthü hatü shahshemi tetpüvanpü epüthü khüei nyüpeih; henüng keipü shennyakthü ngelei nanglakthü mü shahdep kü ne-omhen. Israel amei bühü men nyangpü laitap kü neshüaokhen; hathüi Israel kahdokei nyokei neleiaokhen. Shejüang ammi ngeiyü SHEMBÜPA Kahvang khih shei nyinghen.

¹⁰Chingmeivangmei neshiüshiüi, “Chingmeivangmei nyüpeih” shei eyei ngelei nanglakthü lemnyongei mülangpü nangkü, hatü mechem nanglakthüi bham linghenshang, hathüi hapa kü dhoni nyiotüknyüke,

¹¹Hanangkü hapa kü dhoni nyioteipüthü kü hapa bham laamdaihen shei etuh. Vang longi keihen, shü longi vühen hatü yinglükleisho-i hapa bentükhen.

¹²Mechem bham laamhenshang, shennyakthüi, “Ammi hapa kü nyiopü dhon melei daipa?” shei nephehen je?

¹³Hanangkü SHEMBÜPA Kahvangi hapakei enyüke: “Ngei mongshihpai mangpü yinglükleisho shomhen, hatü ngei mongmangpai vang keihühen, hatü shü vüshihpai hapa bentükhen.

¹⁴Ammi dhon nyiotükpü bhamü kahdok kü jeetshi benei haütükhen; hapa bham chongnyiam shing kong leitükhen, hatü mechem hapa laamhen, amao hapa mongei mahhen. Shejüang ami ngeiyü SHEMBÜPA Kahvang shei nyinghen.

¹⁵Hapa keiha ngei mongshihpü bham hatü hapa kü dhon nyiopüthü khüei nyuhen, hatü ngei am kü, ‘Hajük kü bham hatü hapa kü dhoni nyiopüthü,

¹⁶Jerusalem kü chingmeivangmei neshiüshiüi chingmeivangmei nyüpeih shei Jerusalem nang teteivanei manghkhang eepüthü neshiü’ shei ngei ehen” shei SHEMBÜPA Kahvangi enyüke.

¹⁷Shaang, shennyak ha, laophü kü deihja deihja kei teteivanei epü ammei yiükhathü khüei veituh. Hathü nyonghütuh,

¹⁸hatü SHEMBÜPA Kahvangi hapakei enyüke shei etuh: “Mih nganhen shingvaishi meli lingei lak-üng kü sheptü hatü peü shangjing kü meli lingtü ashaki jümpü nyühathü onyükei! Ammi ngelei nanglakthü shak kü ngan hatü jomei yangnyu shak kü dihen wong noteihünyu je?

¹⁹Nük lakbaoh hük nangkü hatü aan bhaok hük tata kü ammi ngelei nanglakthü touei ngelei men yaüteke. Dihen nejiüpüthü jütük, yemmü nyuhen neshangpü yemmü tuhnyüke. Ammi ngelei nanglakthü kü shahshem enyüke hatü jomi ha kü hinglemnyüke.”

²⁰Hanangkü SHEMBÜPAi hapakei enyüke: Ouha yeppükei hangku yangnyu yephen shingvaishi meli lingei ammei lak-üngei sheppü lakshep khüei ngei nyüpeih; ngei hathü hukei yaktüktü ammi yepei tuhpü shennyakthü laiyei deishihtükhen.

²¹Ngei ammei shangjingei jümpü ashak shaaktükhen hatü ammei lak leipü shennyakthü veshihtükhen; hajük kü jom ammei ngani yepei nelomohhühen; shejüang ammi ngeiyü SHEMBÜPA Kahvang shei nyinghen.

²²Ammei shahshemi daülangpü shennyakei mong maanhüteke, hatü nemeipüthü kü jomei mang lem kübü nyokei leiyei yanghen nevai-i hapa lem kübü lepei neleihen mongnang thongteke.

²³Hanangkü hajük kü ammi shahshem manghkhang nevaijü phongyomthiphepü neeehen; ngei ngelei nanglakthü ammei lak leipü yanghen. Shejüang ngeiyü SHEMBÜPA Kahvang shei ammi nyinghen.