Read Phom Naga EZEKIEL 14 Bible Online

EZEKIEL 14 - Phom Naga bible

EZEKIEL 14

¹Israel am mübüthü hanei peiyei ngei touei uoteke.

²Hahepak kü SHEMBÜPAlei shah ngei touei pei:

³“Shennyak ha, hathü shennyakthüi lajeithü kü jomei mong kemei shuohtükteke, hatü hapai jom mang lemei mühünyüke. Jomi phepü kü ngei jom kü jangpü shuohhen je?

⁴Hanangkü ‘SHEMBÜPAi hapakei enyüke’ shei jomphong kü eyeishuoh: Mechem Israel am shennyak hüki laophülei mongdang lajeithü kü shuohtüktü hapai jom mang lemei mühütüktü thibü hük touei peihenshang, büpalei lajeithü shangshi ngei, SHEMBÜPAi büpa phepü kü janghen.

⁵Lajeithü kü mong shuohtüktü ngei yakphongpü Israel nanglakthülei mong yepei leihen shingvaishi ngei hapa dükhen.”

⁶Hanangkü SHEMBÜPAi hapakei enyüke shei Israel am phang kü eyeishuoh: “Mong leptuh hatü lajeithü leipü lepei leidaikei; jiühitnalaipü douthü peü yakphongtuh!”

⁷Mechem Israel am hük nevaijü Israel am mü nyupü kung shennyak hanei-i lajeithü kü mong shuohtüktü ngei toueipü yanei lüdai pheikü thibü hük kü pheyuhen peihenshang, ngei, SHEMBÜPAi büpa kü shangpükei jangpü shuohhen.

⁸Ngei büpa khüei yaonghen; ngei büpayü lappü hük hatü mihnyi yangnyai leihühen. Ngei büpayü ngelei nanglak khong kübü katitükhen. Shejüang ammi ngeiyü SHEMBÜPA shei nyinghen.

⁹Thibü hük lueilemei shahshem ejema, hapayü ngei, SHEMBÜPAi hapa thibüpa kü lueilempü vaihen, hatü ngei büpa khüei ngelei lak nohen, hatü ngelei nanglak Israel khong kübü büpa mahtükhen.

¹⁰Jomi jomei mang kohen hatü thibüpayao büpa kü phepü shennyak kei-üng aihük mü danghen.

¹¹Shejüang Israel nanglakthüi hajük kü ngei toueipü lemnyong kü nedaihen, hatü jom nyingi jomei mang homei nesheihhen. Jomü ngelei nanglak, hatü ngeiyü jomei Kahvang vaihen, shei SHEMBÜPA Kahvangi enyüke.

¹²SHEMBÜPAlei shah ngei touei pei:

¹³Shennyak ha, mechem kahmük hük ngei kü hingnelemi mang thahhenshang, hatü ngei jom khüei lak noei jomei hahying peipü lem kemei küppei shaühile shompü nangkü haleipü shennyak hatü yemhimak kemei dihenshang,

¹⁴halei Noah, Daniel hatü Job hathü paoh nyupü vailangmao jom hinglempai jom mon yanghen, shei SHEMBÜPA Kahvangi enyüke.

¹⁵Nevaijü ngei kahmük kü phaüyemthü shomei haleipü shennyakthü peü jütüktü üpayao halei nelongteiaokhen mü leihüshingkü,

¹⁶jom jem halei nyupü paoh vailangmao jom jem yangpü mü lenei jomei hapeüthüao neyangaokhen, hatü hapa kahmükü lavüngtoiyei leitükhen shei SHEMBÜPA Kahvangi enyüke.

¹⁷Nevaijü ngei hapa kahmük kü yanlu yah-ei peiyei hapa kahmük yani mahhütuh shei ejü haleipü shennyakthü hatü yemhimakthü kemei mahshingkü,

¹⁸hathü shennyak jom jem halei nyupü paoh vailangmao, jom mon yangpü mü lenei jomei hapeüthüao neyangaokhen shei SHEMBÜPA Kahvangi enyüke.

¹⁹Nevaijü ngei hapa kahmük kü chamhilem shomei ngelei mongshih khüpeilangei iy yenhüpai haleipü shennyak hatü yemhimak kemei jütükshingkü,

²⁰Noah, Daniel hatü Job hathü halei nyupü paoh vailangmao, jom daülangshemshepai jom mon yangpü mü lenei jomei hapeüthüao neyangaokhen shei SHEMBÜPA Kahvangi enyüke.

²¹Mehenangkü SHEMBÜPA Kahvangi hapakei enyüke: Ngei Jerusalem khüei dibenüng shahphenpü yanlu, shaühile, phaüyemthü hatü chamhilem haleipü shennyak hatü yemhimakthü jütükhen shingvaishi shomjü meshük mangpüba nyukahen!

²²Shejao haleipü yangpüthü yeshang hatü yiükhathü haleipü yangei ngaihen. Jom am touei peikahen hatü ammi jomei dükhiling hatü douthü eehen, ngei Jerusalem kü shanghah vongshüh shuohpeyü jiüpü khih shei deihkahen.

²³Mechem ammi jomei dükhiling hatü douthü eehenshang, ngeiyü ten neshiüpü kü dükpü nevai shei ami nyingei peihen shei SHEMBÜPA Kahvangi enyüke.