Read Phom Naga EZEKIEL 17 Bible Online

EZEKIEL 17 - Phom Naga bible

EZEKIEL 17

¹SHEMBÜPAlei shah ngei touei peiteke:

²Oh shennyak ha, Israel am kü shahlap hük eyeishuoh.

³SHEMBÜPAi hapakei enyüke shei etuh: Alang longpü hük yang longi wong kohshi, mum luangi hatü owlem longi kohshi Lebanon lemei piyei heihteke. Büpai cedar pümoung kü düktü,

⁴haleipü moungjaang bhagtü yah-ei daiyei bhei leihpü chingnyülei bhei leihpüthü nyupü kahdokei sheiteke.

⁵Hapheikü büpai Israel kahdok leipü sheilivang yah-ei sheili longhen mü yung changshi nyupü kahcheü kohpü kahdokei sheiteke.

⁶Hapa nien vamei nyalingngupai leitü chongei banei daiteke. Hapalei kaothü alang philemei longei aong, shejao tünglangü mongei shü. Hanangkü hapayü nyalingngupai lei, kaothü phaakei vamei phenlaki mateke.

⁷Shao lebü alang longpü hük yang longi longshi hatü mum longi chetshi kohtü nyuteke. Shaang hapa nyalingngupailei tünglang hapa kohpü shing leipü büpa philei banei dai hatü büpa hapa kü yung shuohhen shingvaishi hapalei kaohilak büpa lemei lüei heih.

⁸Pükao phaakhen, betjük jükhen hatü nethe meipü nyalingngupai leihen shingvaishi kahdok meipü kü yung changshi nyupü touei sheiphongpeih.

⁹SHEMBÜPAi hapakei enyüke shei jom kü etuh: Hapa nyalingngupai düngei kohshi nyuhen je? Hapa nebhitükhen, hapalei betjük nevaümlanghen hatü kaohilak tetei nekaudaihen je? Hapa bhitükhen shingvaishi wong kohpü lak nevaijü nanglak longi nadang neshiü.

¹⁰Hapa bhiyei shing chaiyei sheijao ha shao koh-aokhen je? Hapa kohpü heong vanglüki lükjü ha chemjalak kü nekaudaihen je?

¹¹Hahepak kü SHEMBÜPAlei shah ngei touei peiyei,

¹²khüei yaongpü mükhiphang kü, “Hathü mehe lappa, amphongi nenyingnyu je?” shei etuh shei ephüteke. Babylon ongpa Jerusalemei peiyei haleipü ong hatü lakchongbüthü yah-ei büpa mü Babylonei leidaiteke shei hathü kü etuh.

¹³Büpai ongpalei shem am hük yah-ei büpa mü vangpüshuwpü hük lingei büpai lahhü. Büpai shao kahmük kübü mübüthü müei lüdaiteke.

¹⁴Hanangkü hapa ongching maanpü leihen, hatü hapa nyingi paoei neyaongaokhen, hatü hapa vangpüshuwpü aimü nyujü mon meishi nyuaokhen.

¹⁵Shejao Judah ongpai khüei yaong hatü Ijip am touei koyei hatü veshanthü yüei lembü shomteke. Büpai aokpü danghen je? Hapakei dükpü shennyak yangaokhen je? Büpai vangpüshuwpü mangtüktü yangaokhen je?

¹⁶Ngeiyü vanyangyem Kahvang, shei SHEMBÜPA Kahvangi enyüke: Büpayü büpa ong uoshing kü uohüpü Babylon ongpalei kahdokei dihen; mehenangkü büpai ongpa kü lahpü hatü büpa mü vangpüshuwpü mangtükpeih.

¹⁷Pharaohlei wong kohpü veshan khongnyüi büpa kü vehok kü nesheühhen; mehenangkü yangnyu longi mahhen mü thai chanei, ching shümhen bham lingei nyüke.

¹⁸Büpai vangpüshuwpü mangei lahtükpü yakphongteke. Mehenangkü büpai laophülei laki dükei lahteke shejao hathü doutenthü dükteke, büpa neyangaokhen.

¹⁹Hanangkü SHEMBÜPA Kahvangi hapakei enyüke: Ngeiyü vanyangyem Kahvang, ngei büpa mü vangpüshuwpü büpai mangtükpü nangkü ngei büpa hanghihühen.

²⁰Ngei tai haentü büpa hapa kü manhühen, ngei büpa Babylonei deiyei halei büpa kü shahphenhen; mehenangkü büpai ngei kü hingnelempeih.

²¹Nyaiyei daipü veshanthü yani mahkemhen hatü haleipü yangei daipüthü vanglük kü haitükhen. Shejüang ngei, SHEMBÜPAi hapa ephei hih shei nyinghen.

²²SHEMBÜPA Kahvangi hapakei enyüke: Ngei cedar pü moungjaang leipü nien yah-ei sheihen. Ngei pükao ja phaakpü leipü nien yah-ei shaopü kahshang shangtaolei sheihen.

²³Ngei hapayü Israel Kahshang shaopülei sheihen; hapai pükaothü phaakei betjük jükhen, hatü nethe meipü cedar pü leihen. Hapa püdhüm kü ouhiyüh peüi jephijaan linghen, jomi hapalei pükaothü kü jom loishing danghen.

²⁴Püthü peüi ngeiyü SHEMBÜPA shei nyinghen. Ngei shaopü püthü shoh-ei leitüknyeih, hatü nyaümshi nyupü püthü shao luhünyeih. Ngei thüngshingi nyupü püthü kautüknyeih hatü kaudaipü püthüang thüngshingi leihünyeih. Ngei, SHEMBÜPAi mehe etük, ha ngei dükhen.