Read Phom Naga EZEKIEL 18 Bible Online

EZEKIEL 18 - Phom Naga bible

EZEKIEL 18

¹SHEMBÜPAlei shah ngei touei peiteke:

²Israel kahdok nangkü ammi düngei, “Chebü chepai thiok hahpü kü hühihathü bha daümnyüpeih” shei eteipü hapa kandok shah lappü meheang?

³Ngeiyü vanyangyem SHEMBÜPA Kahvang, Israel kahdok kü hajük kü ammi hapa kandok shah te-etei.

⁴Nyühipa vaituh, hashih vaituh, yangnyu kemei ngelei shei nyingtuh: Shennyak üpai mang thahnya, hapa shennyak mon dihen.

⁵Nyingshah-i daülangpü shennyak hük mehe jiüpa hatü shahhing ha mon düknyüke.

⁶Büpai Israel amei lajeithü kü nekhümnyu, nevaijü khüampü khümshingei lajeithü kü moilapü hahying nehahnyu. Büpai chingyowpalei nyüha mü douten nedüknyu, nevaijü nyüha hük hangha tenpü hepak kü nejemnyu.

⁷Büpai üpa kao neshüveinyu, shejao büpai lahtü luhahpü hang jiüshi shemtüknyüke, büpai negühnyu shejao taopathü kü hahying shuohnyüke, hatü bümkong nyupüthü kü ashakviha shuohnyüke.

⁸Büpai bhüei danghen kü lop nelushuohnyu, nevaijü lop bhüei neyahnyu. Büpai nemeipü dükhen kübü büpalei lak shümlangnyüke, hatü shahhing shahphenpü shuohnyüke.

⁹Büpai ngelei vanglemthü kü, hatü ngelei shahkungthü jiüshi noteinyüke; hapa keipü shennyakü daülangpü, büpayü nedihen shei SHEMBÜPA Kahvangi enyüke.

¹⁰Nyingshah-i hapa shennyakei hapeü hük, ahshi-üng nemei, mih kü iy-aongmashahüei nyunyüke,

¹¹chepai hathü nedükjao büpai hathü kemei düknyüke: Büpai khümshingei lajeithü kü moilapü hahying hahnyüke. Büpai chingyowpalei nyüha mü douten düknyüke.

¹²Büpai taopa hatü ne-angpüthü kü shüveinyüke, büpai gühnyüke, hatü lahtü yahpü jiüshi nyokei neshuohnyu. Büpai lajeithü kü veinyüke, büpai jiühitpü douthü düknyüke.

¹³Büpai nanglei yemei mih kü hang lushuohnyüke, hatü lop longi bhüei yahnyüke. Hapa keipü shennyak yemmü nyuhen je? Büpa nenyuaokhen! Büpai hathü jiühitpü douthü dükpü nangkü, büpa hingmei dihen, hatü büpalei iy büpalei shangjingei kohen.

¹⁴Shejao hapa shennyakei hapeü hük nyüke. Hapa hapeüi chepai dükpü mangthü kemei eenyüke; büpai ha mangthü eejao büpai hathü mang dou nedüknyu:

¹⁵Büpai Israel amei lajeithü kü nekhümnyu, nevaijü khüampü khümshingei lajeithü kü moilapü hahying nehahnyu. Büpai chingyowpalei nyüha mü douten nedüknyu.

¹⁶Büpai üpa kao neshüveinyu, nevaijü mih kü hang lushuohtü lahtuh shei ne-enyu. Büpai negühnyu, shejao taopathü kü hahying shuohnyüke, hatü bümkong nyupüthü kü ashakviha shuohnyüke.

¹⁷Büpai mang dükhen kübü büpalei lak shümlangnyüke, hatü büpai lop kü lop bhüei longi neyahnyu. Büpai ngelei vanglem, hatü shahkungnyüthü noteinyüke. Büpa chepalei mang nangkü nedihen. Hingmei büpa yemmü nyuhen.

¹⁸Shejao laophülei mang nangkü chepa dihen; mehenangkü büpai aeteisheyei, laophülei jeihinaüthü leipü güh-ei nanglakthü touei mehe mang, ha dükteke.

¹⁹Shejao ammi shao, “Chepalei mang nangkü chehayao mehekei nehanghihen?” shei enyüke. Shejao chehai mehe shahhing hatü jiüpa, ha dükei hatü kenhingei ngelei shahkungnyüthü dükpü nangkü büpa yemmü nyuhen.

²⁰Üpa shennyaki mang thahnya, hapa shennyak-üng dihen. Chehai chepalei mang nangkü nedihen nevaijü chehalei mang nangkü chepa nedihen. Daülangpü shennyak kü mei dükpü shangshi laklei shuohhen, hatü nemeipü shennyakü laophüi dükpü mang nangkü hanghihen.

²¹Shejao mang shennyak hük laophüi dükpü mang peü kübü mong lepei leiyei ngelei shahkungthü dükei, mehe shahhing hatü jiüpa, ha dükjema, hingmei hapa shennyakü nedi-i yemmü nyuhen.

²²Büpai düktükpü mang hükao büpa khüei deih-ei nedanghen. Mehenangkü büpai daülangpü douthü dükpü nangkü büpa yemmü nyuhen.

²³Mangthü dipü kü ngei mongmeinyu hiang? shei SHEMBÜPA Kahvangi enyüke. Jom mang lemthü kübü mong lepei leiyei yemmü nyuküjü ngei mongneongnyu je?

²⁴Shejao mechem daülangpü shennyak hük mang lemei nyokei daiyei mang thah-ei mangthüi dükpü jiühitnalai douthü dükei daihenshang, hapa shennyak yemmü nyuaokhen je? Hapa shennyaki dükpü daülangpü dou hükao deih-ei nedangpih; mehenangkü hapa shennyaki hingnelempü hatü büpai thahpü mangthü nangkü büpa dihen.

²⁵Shejao ammi shao, “SHEMBÜPAi dükpeyü nejiüang” shei enyüke. Ha bangtuh, Oh Israel phang: Ngelei lemthü nejiüpü je? Ammei lemthü nejiüpü nevaipü je?

²⁶Daülangpü shennyak hük mang lemei lepei leiyei mang thahjema, büpa hapa tata kü dihen; büpai thahpü mang lat büpa dihen.

²⁷Shejao mang shennyak hük mang lem kübü nyokei leiyei mehe shahhing hatü jiüpa, ha dükjema, büpai laophülei yangnyu yangnyüke.

²⁸Mehenangkü büpai thahpü mangthü peü deih-ei dangpü nangkü hatü haleipü mong lepei leipü nangkü büpa hingmei yemmü nyuhen; büpa nedihen.

²⁹Shejao Israel am phangi, “SHEMBÜPAi dükpeyü nejiüang” shei enyüke. Oh Israel am phang, ngelei lemthü nejiüpü je? Ammei lemthü nejiüpü nevai je?

³⁰Oh Israel am phang, ammei lemthü aimü ngei ammei shahphenhen shei SHEMBÜPA Kahvangi enyüke. Mong leptuh! Ammei mang kübü nyokei leituh; shejüang mangi am nevüshihhen.

³¹Ammi thahpü mangthü peü yaktüktuh, hatü mongdang ja hatü laangha ja yahhahtuh. Am mehekei dihenang, Oh Israel am phang?

³²Ngei üpayao nemahtükhünyih shei SHEMBÜPA Kahvangi enyüke. Hanangkü mang kübü mong lepei am yemmü nyutuh.