Read Phom Naga EZEKIEL 2 Bible Online

EZEKIEL 2 - Phom Naga bible

EZEKIEL 2

¹Büpai ngei kü, “Oh shennyak ha, yaongtuh hatü ngei nüng kü ephüshah” shei e.

²Büpai ngei kü eshingkü Kahvang laangha ngei kü shü hatü ngei yaonghü, hatü büpai ngei kü eyei danteke.

³Büpai ngei kü, “Shennyak ha, ngei nüng Israel am touei shomnyüpeih; chebü chepa ami shinnyih thahshi ngei khüei yaongpükei jomphongi ngei khüei yaongteke, hatü nedoh-i khüei yaongnyüke.

⁴Nanglak üam touei ngei nüng shomnya, jomphongü mong vaanpü hatü laophüi deihpü mon dükpüthü khih; jom touei ngei nüng shomnyeih hatü nüngi hathü kü SHEMBÜPAi hapakei enyüke” shei etuh.

⁵Jomü khüei yaongpü mükhiphang — jomi bangjao nebangjao jomi jom touei thibü hük nyüpeih shei nyinghen,

⁶hatü nüng, Oh shennyak ha, nüngi jom kü tenyem, hatü jomei shah kü tehan. Hühchi hangchi kü hatü yiüjikaungkangthü mü nyulangmao, nüngi jomi epü shahthü kü tenyem hatü jomi nyem shaopü kü tehan; mehenangkü jomphongü khüei yaongpü jatli.

⁷Jomi bangjao nebangjao nüngi jomphong kü ngelei shahthü eyeishuoh; mehenangkü jomphongü khüei yaongpü jatli.

⁸Shejao nüng, shennyak ha, ngei mehe enya, ha kü bangtuh. Hapa khüei yaongpü jatli keiha nüngi ngei khüei teyaong; nüngei ju katuh hatü ngei mehe shuohnya, ha hahtuh.

⁹Hahepak kü ngei veishuohshingkü ngei touei lak hük yiükei-i ee, hatü hapalei laidü hük notü ngei touei hapa laiteke.

¹⁰Hapa laki laidü laiteke hatü hapa lai phinyiphen kü theppü youngpü hatü onyükei shahthü nyangei ngei eeteke.